Read Western Highland Purepecha 1 Corintios 13 Bible Online

1 Corintios 13 - Western Highland Purepecha bible

1 Corintios 13

¹Ekani ji úpiringa iámendu jásï uandakuechani uandaani, ka jini no kámani kaxumbekua, ka nájkirukani ánjelini jamberi uandaaka, ji ískuni tiamueni xamonheaka ka tintinaskani.

²Ka nájkirukani jurhenaaka Diósïri uandarini, ka iámendu ambe enga no mítekorheka ji sési kurhanguni ka míteni; ka nájkirukani Diósïni xani mintsikaaka ka jamberi úni juatechani móskuani, nómbemeska ekani no kámaaka xénhchperata ka kaxumbekua.

³Ka nájkirukani jucheti jatsikorhekua iámu intsïmpeaka, ka jucheti anhanhatakua jamberini íntspeni eska kurhinhataka, ka no kámani xénhchperata ka kaxumbekua, nórini ambe ma marhoacheati.

⁴Xénchpeni ma, iámendu ambe tekantasïndi ka méntkisï jarhojpeni; xénhchpejka no epurpesïndi ka nójtu k'éramakorhesïndi o teparakorheni,

⁵ka nójtu nósesi mokukorhesïndi, ka níjtu uarhiseni, ka ni kurhunkpeni o patsahentspeni.

⁶Ka enga nósesi únhaaka no jamasïndi tsípeni, jurhimbekua ambe jimbosï tsípejti.

⁷Iámendu ambe tekatspentasïndi ka iámendu ambe jakajkusïndi, ka iámendu ambe kurhangutspesïndi.

⁸Xénchpekua nómeni k'amakurhisïndi, uandatskua ambe k'óru k'amakurhiati, ka úni mámaru jasï undakua undani k'amakurhiati, ka mímixekuajtu k'amakurhiati.

⁹Jimbokachi no iámu ambe míteska ka nóchi iámu ambe uandantasïnga,

¹⁰ka enga jurhimbekua mítekorhiaka, k'amandeati ambe enga no jurhimbekueka.

¹¹Engani ji sapipka, sapini uandaxesïrempka ka sapini eratsïsïrempka, ka engani k'érikia, jurajkuska sapiri jángua ambe.

¹²Juchachi iásï eratekorhekuekaxaka ka nóchi úsïnga jimbokachi xuranhaskasïnga, ka niáraati jurhiata engachi sési míteaka jurhimbekua ka sésichi exeni, ka jíani k'óruni míteaka Diósïni ísï eskarini ima na míteka.

¹³Jiájkani tanimu ambesti enga nómeni k'amakurhijka: Diósïni mintsikani, ka aiatsperakua erokorheni, ka xénhchperakua. K'óru xénhchperatasï sánderu jukaparhakueti.