Read Western Highland Purepecha 1 Corintios 14 Bible Online

1 Corintios 14 - Western Highland Purepecha bible

1 Corintios 14

¹Cha Jángorhetsï je xénhchpeni, k'óru imani engajtsï sánderu úaka ka jirinhantani, Diósïri uandari je.

²Ima enga mámaru jasï uandakuechani uandaajka, no k'uiripu jingunisï uandaxejti, Diósï jingunisï uandaxejti. Jimboka k'uiripu no kurhangukusïnga imani enga uandajka, Diósïjkusï kurhangukujti. Nónema kurhangukusïndi jimboka Espiritusï uandarajka, imani ambe enga no mítekorheka.

³Ka ima k'ória, enga Diósï jimbo uandajpejka uinhaperpentasïndi ka p'ímarhpentani ka karhoatpentani.

⁴Ka ima enga mámaru jasï uandakuechani uandaajka, jandiojkusï uinhapekorhentajti, ka ima enga Diósïri uandarijka, tángorhetichanisï uinhaperantajti.

⁵Uékapiringa eskajtsï cha iámendu mámaru jasï uandakuechani uandaapiringa, k'óru sánderu sésiuati ekajtsï Diósïri uandariuaka; Diósïri uandari sánderu k'éri ambesti, eska ima enga mámaru jasï uandakuechani uandaajka, ka jíani k'ória, enga nema uandakuechani kuerantauaka, iámendu tángorhekua uinhapentaati.

⁶Erachicha, ¿Andi ambeksïni marhoachea, engaksïni nipiringa p'urhembeni ka máteru uandakua jimboksïni uandaxecheni? Ka nóksïni sési arhistacheni ambe engajtsïni Diósï exeraka, o ambe enga ísïka, óksïni Diósïri uandakua ambe arhini óksïni jurhendani.

⁷Ka májkuenisti kústakuechani jinguni, Eka pírurhi o sétimu májkueni kuskapiringa, ¿Nénachi kurhapirini nakisï kustanhani japirini?

⁸Ka enga uarhipekuarhu, trompeta no ísï kuskaka eska na mítenhaka, ¿Ne jauara nirani uarhipeni?

⁹Ka ístu cha jinguni: Uétarhesïndi eskasï sési kurhankuantauaka chári uandakuechani, eska no ísku uandauandamekueuaka ka nómajtsï arhini jarhani.

¹⁰Miteskachi eska parhakpeni mámaru jasï uandakua jarhaska, ka iámenduksï kurhangunhasïndi.

¹¹K'óru ekani ji máterueri uandakua no kurhanguska, jimboka máteru jáxeska engani ji uandajka, méntkuchi no úaaka kurhangutsperani, jimbokachi máteru iretecharhu anapueuaka.

¹²Jiájkani cha, engajtsï xáni tsitijka espiritu jimbo sési p'ikuarhekua ambe p'irani, jangorhe je imani ambe xarhatani enga tángorhetichani uinhaperauaka.

¹³Isï jimbo, ima enga máteru jasï uandakuechani uandajka, kómarhijpekorhe eska jurhendanhaaka úni kuerantaani.

¹⁴Jimboka ekani ji, máteru jasï uandakua jimbo Diósïni komuarhiaka, espiritu jimbojkuni komarhijpekorhini jarhasïnga, jimbokani nómbema kurhangupani jarhasïnga.

¹⁵¿Ka jiájkani ambesïni úa? Espiritu jingunchkani, ka míakua jinguni kómarhijpekorhiaka; ka mintsita jinguni ka míakua jinguni pirekuechani pireauaka.

¹⁶Jimboka enkari espiritu jinguntku Diósïni k'éri ambe arhiaka, ¿Nénakini kurhangunchea máteru enga t'u jinguni jauaka? Ima enga nótki uénajka jánhaskani jarhani ¿Ka néna ua imajtu Diósïni diósmaiamukua arhini?

¹⁷Jandiojkurisï Diósïni diósmaiamukua arhikorheni jauaka, k'óru máteru nemani nóma marhoakuaati.

¹⁸Ji Diósïni diósïmeiamukua arhisïnga, engani sánderu mámaru jasï uandakuechani uandaajka eska cha.

¹⁹K'óruni tángorhekuarhu jankorhentasïnga iumu uandakuajkuni uandani, ka engani úaka kurhangumenhani, ka no méntkuni mámaru jasï uandakua uaraani enga nónema kurhanguaka.

²⁰Erachicha, ásteru xani sapini eratse jeia, k'erini eratse jeia miaku jukarini. Ka arhirperatechani jimbo k'óru sapini púatsperantsï je.

²¹Diósïri Karakatarhu jarhasti: Ka arhixati: “Ini iretani máteru jásï uandarichani juáuaka, ka máteru uandakua jimbo uandajpauaka, ka níjtujtsïni ísï kurhanguchea”

²²Ka ísï jimbo, máteru uandakua jimbo uandani, mínda mesti engaksï no jakajkuticheka, no imechani engaksï jakajkujka. Ka Diósïri uandari k'óru jakajkuticheristi, no imecheri engaksï Diósïni no mintsikajka.

²³Ka jiájkani enga iámenduecha tángorhentatini janhajka, ka uénantsï mámaru jasï uandakuechani uandaani, ka no jakajkutichaksï máru jiani niarani, ¿Andi nóksï uandaa eskajtsï xerejtsïskia?

²⁴Ka enga no jakajkuti ma, o nema enga jimbanheuaka jiani niáraaka, ka chájtsï Diósïri uandakua úrani jarhani, p'ikukorhentaati ka ándajsïraati eska k'amanharhintstiska,

²⁵ka xarhatakorheati ambe enga mintsita jinguni p'ikuarhenheni jauaka, ka Diósïni tinguixurhikuati ka k'éri ambe arhini, uandaparini eska Diósï cha jinguni jarhaska.

²⁶Ka jiájkani erachicha, íni ambesïni uejka k'amarhutani uandani: Engajtsï tángorhiaka, nemaksï piree ka máteruksï jurhentpe ka máteruksï janhastpe ambe enga Diósï janhastaaka, ka máteruksï mámaru jásï uandakua jimbo uande, ka máteruksï kuerante. Ka isï jámajtsï iámendu tángorhetichani uinhaperantauaka.

²⁷Eka máteru jasï uandakuecha uandanhaaka, tsimani o tanimuksï uande; mándani arhiparini, ka eska nema kuerantapaaka.

²⁸Ka eka tángorhekuarhu no jauaka nésï kuerantaa, ima engaksï uandani jauaka pínameksï, ka sïpatekuarhuksï uandamukukorhe Diósï jinguni.

²⁹Ka májkueni, ekaksï Diósïri uandaricha jima jauaka, tsímani o tanimu ískuksï uande, ka máteruechaksï sési kurhaue ambeksïsï uandajki.

³⁰Eka ambe ma Diósï némani janhastaaka, enga jima uaxakatini jauaka, ima enga uandani jauaka erokorheati sóndi, ka jurajkuati imani urheta uandani, enga uekani jauaka uandantani.

³¹Jiájkani iámenduechaksï úati Diósïri ambe uandani, mándani arhiparini, ka eskaksï iámenduecha jurhengorhiaka ka jarhojperanhani.

³²Ka Diósïri uandarichaksï espiritu jimbo jarhasïndi, ka mítenksï na jatini uétarhesïnki uandani ka na jatini nómbe,

³³jimboka Diósï pínandekueska ka no tandojtsïtperakua, ka sési jakuasï imeriti, eska iámendu tángorhekua erakukatecha.

³⁴K'uanisïndi eskaksï nanecha tángorhekuarhu pínasku jauaka, jimboka nósesikua jarhasti eskaksï jima uandani jauaka. Eska juramukuarhujtu na karhakata jaka.

³⁵Úatiksï chénjembo uámbani kurhamarhentani ambe engaksï no kurhangukuaka; jimboka tángorhekuarhu no kasïpesïnga eska uarhiti ma uandaaka.

³⁶Mia je eska Diósïri karakata no chánksïni jimbosï uenaka, ka ni chájku míndamenha.

³⁷Eka nema Diósïri uandarini p'ikuarherajka, o Espiritu Santuni p'ikuarhenheni, kurhanguati eska i ambe engaksïni karacheni jaka Diósïri juramukueska.

³⁸Ka eka nema no ísï jiókorhejka, imajtu no jiókorhenhaati.

³⁹Jiájkani erachicha, Diósïri uandari je, ka ásï ojkutpe je, eska máteru uandakuecha jimbo uandanhaaka,

⁴⁰k'óru eska iámendu ambe sési únhaaka ka kaxumbekua jinguni únhaani.