Read Western Highland Purepecha 1 Corintios 2 Bible Online

1 Corintios 2 - Western Highland Purepecha bible

1 Corintios 2

¹Erachicha, engaksïni Diósïri ambe jámapka aianguntani, imani ambe enga no mítekorhepka, nóksïni ióstarachepaska óksïni mímixetini uandaxecheni.

²Jesukristueri cháparhatakueri[41] ambejkusïni uékapka uinhajtsïtani uandani, engani chánksïni jinguni jápka, ka máteru ambe jurhengua támu péraspka.

³Ka chéparini ka manaraparini niáraspka cha jinguni,[42]

⁴ka nójtuksïni jurhendiri[43] uandaxechespka arhijtsïkperakua jinguni, sánderu sáni Espiritu ka Diósïri uinhapekuanksïni xarhatachespka:[44]

⁵Jimboka chari jakajkukua Diósïri uinhapekua jimboeska, ka no k'uiripueri mímixekua jimbo.

⁶Nájkirukani k'óru jánhaskasticha jinguni mímixekueri ambe uandontskorhepka; k'óru no iásï anapu mímixekuespti ójtu juramuticheri engaksï iásï jaka,[45] enga Diósï imani juramukuani ísku ambe erataka.

⁷Jucha Diósïri mímixekua ambesïni uandontskorheni jápka, enga no mítekorhepka[46] ka engajtsïni Diósï uénakuarhutki juchantsïni míndachetini jápka ka engachi jimbo úaka andani,

⁸enga nóma iásï anapu juramuti kurhangujka; ekaksï kurhangupiringa, nóksï cháparhatapirindi Achani enga t'ímarhandekueka.[47]

⁹Sánderu sáni eska karakata na arhijka: “Nónema exerixati, ka nónema kurharixati, ka nónema p'ikuarhenhesïndi ambe emanga Diósï k'ejtatakuauaka, imechani engaksï xénhchajka.”[48]

¹⁰Ka Diósïjtsïni Espirituni jimbo janhastasti, jimboka Espiritu iámu ambe mítetixaka, imani jamberi enga Diósïjku míteka.

¹¹Jimboka nónema míteska ambe enga máteru eratsejka, imeri espiritujkusï míteti, ka ísïjtu nónema mítesti Diósïri ambe, Diósïri Espiritujkusï míteti.[49]

¹²Ka juchachi no parhakpeni anapu espiritu intsïnhaska, Diósïjtsïnisï íntskuti imeri Espirituni engajtsïni kurhakuntarajka, na engajtsïni Diósï xáni kóndentaka.[50]

¹³Ka imani ambechisï uandani jaka engajtsïni Espiritu jurhendaka ka enga Espiritueri ambeka,[51] ka no imani ambe enga k'uiripueri mímixekueri jimboeka.

¹⁴Ne enga, nósesi jasï Espirituerika[52] no úati kurhanguni Diósïri ambe, jimboka imeri jimbo ísku ambe méska. Ka nómeni úati kurhanguni, jimboka inde ambe espiritu jinguni kurhankunhantasïnga.[53]

¹⁵Ka ne enga Diósïri espirituerika, iámendu ambeni úati arhinharhikuni, ka imani nonema úati arhinharkuntani.[54]

¹⁶Jimboka, “¿Andi néchka míteski Acheri eratsekua? ¿Ka andi nésï uaia Achani arhijtsïkuni?”[55] ka juchachi Krístueni eratsesïngia.