Read Western Highland Purepecha 1 Corintios 3 Bible Online

1 Corintios 3 - Western Highland Purepecha bible

1 Corintios 3

¹Erachicha jíksïni no úspka urhetku arhini ísï eska imechani engaksï espirituerikia, ka xántku isïksïni arhispka eska náki uéjki ma k'uiripu, ísï eskajtsï iásï uénani jámani Krístuni jinguni.

²Xántku isïksïni jurhendaska, eska etsukua xurhundini, ka no t'irekuani enga xaxanhajka. Jimbokajtsï nótki úsïrempka sési kurhanguni.[56] Ka enajkijtsï méntkueni jaki

³engajtsï sapini arhirperani jaka. Jimbokajtsï ipurhperani ka arhirperani jarhaskateru,[57] ¿Nóchjkatsï parhakpeni anapueni arhijperaxakiteru, ísï eskaksï máteru k'uiripuecha?

⁴Eka nema uandajka: “Ji Páblu jinguniska” ka máteru arhini: “Ji Apolusï jinguniska”[58] ¿Andi nójtsï ísï jamaxaki eska parhakpeni anapu k'uiripu?

⁵¿Andi Apolusï o Páblu ambemendueskiksï? Jántspiristiksï, engachi jimbo jucha újka Diósïni jakajkuni ka mintsikani. Ka táchanchi jámaska isï eskajtsïni Diósï na míndaka.

⁶Jí ikaraska[59] ka Apolusï itsï jatsikusti,[60] k'óru Diósïni jimbosï újti ambe k'eni.

⁷Jimajkani Diósïjkusï k'ériti enga k'uiriperpejka, ikarati ka itsï jatsikuti nóksï úsïndi k'uiriperpeni, ka nóksï ambemesti,

⁸jucha tsimarheni méntkueniska, ikarati ka itsï jatsikuti, nájkirukachi ánchekorhetani táchani maiamunhantaaka.

⁹Jucha márku ánchekorhexaka Diósïni marhoakuni,[61] ka chájtsï Diósïri tarheteska ka Diósïri k'umanchekua.[62]

¹⁰Ka Diósïjtsïni kóndentasti eskachi táchani ambe úaka, ji pítsekua tsïntsïskuska ka máteru kújtsïtasti tsïntsïni.[63] K'óru ju je táchani exekorheni néna engachi ánchekorheni jaka.

¹¹Jimboka pítsekua májkueska, ka nóteru nema úati máteruni pérani jimboka inde pítsekua Jesukristueska.[64]

¹²Ka eka nema tiripiti ambe o taiakata o tsakapu mereari o chkári o uitsakua o chkúrhi ambeni kújtsïtaska,

¹³ka inde ma jurhiani xarhantaati jiájkani enga chpíri jimbo ts'éjkunhaaka, jimboka chpíri mándani ánchekorhetechani ts'éjkuauaka.[65]

¹⁴Ka ima enga ánchekorhetani uiuinhasï úka, ka chpíri nóma úkuni ima maiamunhantaati.

¹⁵Ka eka imeri ánchekorheta kurhiska, tsîjpaati, ka imajti jinguni kurhiati, nájkiruka ánchekorheri uaka uejpentani.

¹⁶¿Andi nójtsï míteski eskajtsï chásï Diósïri tiósteska, ka eska Diósïri Espiritu chánksïni jinguni irekaxaka?[66]

¹⁷Eka nema Diósïri tióstani xerentaska, Diósïjtu imani k'amajkuati, jimboka Diósïri tiósta pimbinhaxetiska, jimbokajtsï chásï Diósïri tiósteka.[67]

¹⁸Ka ásï nema jandiojku tandonhaskorhe: Uékani mímixeti ukorheni, Eka nema p'ikuarherajka ini parhakpeni mímixetini, úati mímixetini, k'óru uetarhesïndi urheta no jánhaskatini jámani,

¹⁹jimboka Diósïni jinguni ísku ambeska parhakpeni anapu mímixekua; jimboka karakata arhisïnga: “Diósï jimajku takipu úasïndi mímixetichani ka jimajkuksï no jánhaskerani engaksï jukari jurhendi úkorhejkia.”[68]

²⁰Ka ístu karakata arhisïndi: “Acha mítesti mímixeticheri eratsekuechani, eskaksï ísku ambe méska”[69]

²¹Jimajkani ásï nema k'éramakorhe, ísï eskaksï parhakpeni anapu k'uiripuecha; jimboka iámendu ambe cháriska:

²²Páblu uénani ka Apolusï, ka Pédru ka parhakpeni ka tsípekua ka uarhikua, ka i jurhiatekua ka pauani jamberi; iámendu ambe cháristi,

²³ka chájtsï Krístueriska, ka Krístu Diósïristi.[70]