Read Western Highland Purepecha 1 Corintios 9 Bible Online

1 Corintios 9 - Western Highland Purepecha bible

1 Corintios 9

¹¿Andi ji no sésikua jatsi úni ambe engani sési exeaka? ¿No Jesusiri uandakua páriski? ¿Andi ji no exeriski juchaari Acha Jesusini? ¿Andi no cha jucheti anchekorheteski, engaksïni ji jurhendaka?

²Ka nájkirukajtsïni máteruecha no míteka eskani Jesusiri uandakua páriska, chájtsïni k'óru míteska; jimbokajtsï cha xarhataxaka eskaksïni Acheri uandakuani aianguska.

³Ísï mókukuantaxaka imechani engajtsïni ambe arhimarhejka:

⁴¿Andi, t'ireni ka itsïmani jucha nósesikua jatsiski?

⁵¿Ka jamberichi úaka pájtakorheni juchari uarhiti jakajkutichani, ísï eskaksï máteru uandakua páricha na újka, ka Acheri erachi jémbecha, ísï eska Séfasi na újka?

⁶¿O juchajkusïni Bernabe jinguni, no sésikua jatsi t'ireranhani jarhani?

⁷¿Andi náki uarhipiti enga juramutini marhuakujka jandiojku maiamukorhesïnki? ¿Ne tsíri jatsïsïnki ka no p'ikuntani? ¿O náki karichi eranguti etsukua p'ikusïnki ka no arhani?

⁸Ásï arhi je eskani ji p'itsïkorhexaka ini ambe uandani ¿Andi juramukuajtu no ísï arhixaki?

⁹Jimboka Moisesiri juramukua arhixaka: “Úechani ásï sutumukua jatsimukua engaksï tríju t'auani jauaka.” ¿Andi Diósï uéchani jimbojtu uandanhiajki?

¹⁰O juchantsïni jimbo ísï arhijki. Juchantsïni jimbosï ísï arhini jati karakata. Tarheri ma mintsikaparini tarhesïndi ka t'auari mintsikaparini ánchekorhisïndi eskaksï p'ikuntskatani p'intaka.

¹¹Ka ekani jucha espiritueri ambe chánksïni jinguni sési ambe tsikiraka, ¿Andi kánekua ambeski eskajtsïni cha sáni akua ambe íntsïmbentaaka?

¹²Ka máteruechaksï andisï k'óru chári ambe sésikua jatsi p'irani, ¿Andi jucha no sánderu sésikua jatsi intsïnhani? K'óruni jucha no uekaska indeni sésikuani jukaparharani, ka iámu ambechi tekantaska Krístueri ambakiti aiangperakuani no uékani p'inguni.

¹³¿Andi nójtsï míteski eska tiósïo jandicha jima t'ireranhasïnga ka irekanhani, ka eska kéjtsitakua enga Diósï kéjtsïtamenhajka jarhojpirichaksï imani t'iresïnga enga kéjtsïtanhajka?

¹⁴Májkuentu juramusti Acha ne engaksï ambakiti aiangperakua uandantajka, eskaksï jarhuatanhaparini irekaaka, imani anchekorheta jimbo.

¹⁵Ka ji nómeni p'itsïkoreska jarhojperata ambe kurhajkorheni ka nójtuksïni kurhachexaka. Íni jasï sési p'ikuarherakuarini nónema euantaati, uarhikuajkurinisï euantaati.

¹⁶Jucheti jimbo no k'éramakorhekuesti ambakiti aiangperakua uanantani, sánderu sáni juramukuesti uandanta jámani; ka nósesi p'ikuarherasïnga ekani ambakiti aiangperakua no uandantani jauaka.

¹⁷Jiájkani ekani íni anchekorhetani jucheti p'ikuerharakua jimbo upiringa, sési maiamunhantapiringa, sánderu sáni juramumenhaska, ka ji aiatspeska.

¹⁸¿Jiájkani nakiski jucheti andakua? Eskani ambakiti aiangperakuani uandantaaka, ka nómbema kurhajkorheni, nájkirukani sésikua jatsiaka kurhajkourheni.

¹⁹Jiájkani, najtukani nónemani ambe kánguni jaka, iámenduecheri jántspiri úkorheskia, jimbokani uéksïnga eska uánekua kurhankunhanka Krístueri ambe.

²⁰Judioueni jámaska judiouecha jinguni, nóna jakajkutaraani ka andakorhiani; nájkirukaksï inde juramukuantku kurhajchajka, ka jíjtuni chúxapaska, nóna p'ímutantani ka nájkirukarini juramukua jindeni nóma arhistachejka.

²¹Ka juramukua no mítetini jámaska imecha jinguni engaksï juramukuani no míteka, nóna p'ímutantaani ka andakorheani, nájkirukani ji Diósïri juramukuani kurhandirakujka, ka Krístuni kurhajchaparini jámasïnga.

²²Ka jimbanhe jakajkuticha jinguni no kani mítetini jámaska, nándikani ísï úaka jakajkutaraani ka p'ímutantaani. Jangorhentaska mámaru jasï k'uiripuni terukuni, nóna p'ímutantaani.

²³Ambakiti aiangperakua jimbosïni ísï jámka, jimbokani jíjtuni uékasïnga p'ímutantskateni.

²⁴Chájtsï míteski eska uiriani antaperani uanenhasïnga, ka eska andapiti májkuesïnga, uiriachaka je, ka anda je.

²⁵Ka ístu iámendu ch'anarichaksï mámaru jángorhentasïndi jurhengorheni, jimbokaksï andankchasïnga, nájkiruka andakua sóntku k'amakurhiaka, ka juchajtuchi andaaka ka juchari andakua nómeni k'amakurhiati.

²⁶Ísï jimbosïni, ji no ísku jatini uiriani jaka no míteparini andaa o no andaa, ka jangorhentaxaka no ískuni tarhiatarhu uarhipitini níjkurhani jarhani.

²⁷Ménderuenisïni jámani jaka, méntkuni no p'amojkukorhentaxaka marhoatspeni ka aiangpentani, nándikani ji no úaka niárani engani máteruechani jámaka arhistakuani.