Read Western Highland Purepecha 2 Corintios 1 Bible Online

2 Corintios 1 - Western Highland Purepecha bible

2 Corintios 1

¹Chári sésikua jimbo Korintu anapu jakajkuticha, ji Páblu ka jucheti jarhojpiri Timoteu uandajpaxakaksïni chánksïni ka ístu iámendu Akaia anapu erakukatechani. Diósïrini jíndeni kóndesti Jesukristuni uandakua pákuni jámani.

²Eskaksïni juchari Diósï Táte ka Acha Jesukristu tsípekua kóndeaka ka sési jakuaksïni íntskuni.

³K'éri ambe arhinhe Acha Jesukristueri Tátjemba, juchari Diósï Táte p'amojkpiri ka karhoatpiri,

⁴imajtsïni karhoatantasïndi engachi nósesi nitamanchani jarhajka ka juchajtuchi úaka nósesi nitamanchatichani karhoatantani.

⁵Ekachi jucha Krístueni nósesi nitamanchani jaka, Krístuni jimbochi karhoatanhaaka.

⁶Jucha uéksïnga eskajtsï cha karhoatanhaaka ka p'ímutanhantani jimbochisï iámu ambe tekantajka; ekani jucha karhoatanhaska, chájtsï xéaka ka uinhapekorhentakajtsï, jiáni engajtsï nósesi nitamanchani jauaka, ísï eskani jucha na p'ikuarherani jarhajka.

⁷Jucha mintsikaxaka eskajksï sési p'ikuastanhantaka; jimbokachi míteska eskajtsï chájtu sési karhoatanhaaka engajtsï nósesi kánhani jaka.

⁸Tatecha ka nanecha, aianguxakaksïni eskajtsïni Ásia anapuecha jukari nósesi kántaspka, k'amajkuntaxaptijtsïnia, nóteru mintsikuesptia eskachi uérakuapiringa,

⁹uarhikuanchi axuterkusï p'íkuarherani jápkia, nóteru juchespkia, Diósïnderkuchisï mintsikani jápkia, enga uarhirichani tsítantajka.

¹⁰Ka Diósïjtsïni uarhikuarhu p'íjpantaspti. Ka mintsikaxakachi eskajtsïni p'íjpantani jauakateru

¹¹eskajtsïni cha kómarhijpecheni jauaka, eskajtsïni uánekuecha diósïmaiamu arhijpecheaka, imani engachi jurhengua uánekuecheri jimbo intsïmbenhaka.

¹²Jucha tsípeni p'ikuarheraxaka, mítetini eskachi iámenduechani sési káaspka ka chánksïni sánderia, nóchi juchari mímixekuani mintsikaspka, jucha Diósïri kóntperakuani mintsikaspka.

¹³Nóchkaksïni jukari ambesï arhini jaka, xántku engajtsï cha úaka arhintani ka kurhanguni, ka mintsikaxaka eskajtsï iámu kurhanguaka,

¹⁴ísï eskajtsïni na kurhanguchekia sáni. Ka chájtujtsï jucha jinguni k'éramakorheaka jiáni enga juchari Acha Jesusi junguaaka.

¹⁵Ísï mintsikaparini uékaska urheta cha jinguni nirani, eskaksïni janochepiringa ménderu kóntperakua tsimani xanhari úni jámani,

¹⁶uékaspka Masedonia jamani, nirani jámani, ka ménderu jamonguani, ka tátsekuajtsïni cha jarhuatapiringa Judea nirani.

¹⁷¿Andi ji nósesi eratsentaspki? ¿Andi ji ísku jatini eratseni jápi nirani ka tátsekua no ísï úni?

¹⁸Jucha ma ambejkuni uandasïnga jimbokachi Diósïri jakajkukua jimbo uandasïnga.

¹⁹Nóchka Jesukristu, Diósï Uájpa, méntku íntskukorhentaski andi, nómeni mómuntasti, ka jucha Silbanu ka Timoteu jinguni, imeri ambechisï aiangpeni jámka,

²⁰jimboka Uájpa juáska iámendu Diósïri aiatsperakuechani. Ka Diósïnichi k'éri ambe arhisïnga engachi Jesusini jimbo arhijka: “Ísïmendu ústi” arhini.

²¹Ka Diósïjtsïni Krístu jinguni márku úntasti ka újchakurantsïni,

²²ka míndajtsïni jatsikukorhesti ka imeri aiatsperakuani juchari mintsitarhu pérani engajtsïni Espiritu Santuni íntskuka.

²³Kurhajtsïni je, Diósï mítetixati eskani chári sési jimbosïni nótki nirani jaka Korintu.

²⁴Jucha no uéksïnga chári jakajkukuani míngorheni, jinichisï uéjka cha jinguni márku sési p'ikuarherani, jimbokajtsï sési uinhapentatixaka engajtsï Diósïni jakajkuka.