Read Western Highland Purepecha 2 Corintios 11 Bible Online

2 Corintios 11 - Western Highland Purepecha bible

2 Corintios 11

¹Kurhajtsïni je ka sántsïni tekachentani, engani ísku ambe uandani jámka.

²Diósïri jimbo, jíksïni uandanheachexaka, engaksïni iurhitskiri méni aiatspetini jáka Krístu jinguni tembuchatani.

³Ka chéxaka eskajtsï tsîjpekia ka nóterujtsï Krístuni erokorheni jarhania, ísï eska Ébani akuitse tandojchpiri na támisï pápka,

⁴jimbokajtsï sóntku néuejkini sési erokasïnga enga niárajka Jesusini uandantaparini, ima nema engani jucha no míteka, ka máteru espirituntsï p'iraxaka ka máteru jásï jurhentperakuani.

⁵Ji no sapichu ambeska inde k'érati uandajtsïkpirichani japarini.

⁶Nájkirukani pájpamejka ji sési míteska ambesïni uandajki, chájtsïni mémechani exeriskia.

⁷¿Andi nósesi niátaski engani kétsekua uéraka ka nómbemaksïni kurhacheni engaksïni Diósïri aiangperakuani aianguntapka? Ji uékaspka eskajtsï cha k'éramakorhepiringa.

⁸Ji máteru tángorhekuechani euaspka, imaksïni maiampechesti, engani úka cha jinguni ánchekorheni.

⁹Ka nájkirukani uétarhenchani jápka, nónemani ambe kurhakuspka; jimbokaksï Masedonia anapu tatecha janospka ka imajtsïni maiampechespti. Nómbe máksïni uékaspka kurhacheni ka nójtuksïni kurhachexaka.

¹⁰Ji sési jimbo Krístueri ambesïni uandantajka, ka iápuru Akaia ísï nónema úati májkueni jámani

¹¹Nóksïni no xénhchanisï ísï arhini jaka, Diósï mítesti eskaksïni xénhchasïnga.

¹²Ka útasteruni májkueni ánchekorheaka, jurajkueksï inde exeni engaksï májkueni uékani jaka jámani eskaksïni ji nómeni ambe ójkutaska, óksïni ambe euani.

¹³Indeksï k'arhajpexamti, jimbokaksï ískusï Krístueri uandarinhchajka.

¹⁴Ka nójtu xáni nósesi xékuesti, jimboka Noambakitijtu májkueni ánhjelini t'it'ijkusïnga,

¹⁵ka imeri jarhojpirichajtuksï sési úrini xarharakuekaati, nósesi ambeksï andakorhexati engaksï ísï ambe niátajka.

¹⁶Ménderuksïni arhiaka, k'óru ásï uanda je eskani mirijtsïskia. Ka nójtu arhiati ekajtsïni ísï xéska jimbokani k'érkusïni uandaaka,

¹⁷arini ambe enga no Acha jimboeka, jísïni k'éramakorhenhchani jaka, nájkiruka nósesi xarharani jauaka.

¹⁸Jíjtuchkani k'éramakorheakia jimbokaksï uánekuasï k'éramakorheni jaka,

¹⁹ka cha engajtsï sési eratsetika, indechantsï kurhajchaaxaka;

²⁰náuejkiksïni jántspiri úntani ka náuejkiksïni euarheni ka náuejkiksïni k'arhani ka náuejkiksïni ikichani ka náuejkiksïni páksanharhikuni.

²¹Nájkiksïni jucha no tekapi ísï kámani andi, jimbojtsïnisï k'uratsetani jaka. Ekachkaksï k'éramakorheni jaka, jíjtuchkani k'éramakorheakia, nájtuka nósesi xarharani jauaka.

²²Ekaksï inde ebreo uandani jurhenaka ka israelinksï ka Abrani uájpeniksï, jíjtuni jurhenaska ka jini anapueska ka jíjtuni Abrani uájpeska.

²³Ekaksï inde Krístueri jarhojpirika, ji andaaska sánderu incharhetakuni, nájkiruka nósesi kurhakorheka. Sánderu ánchekorheska ka sánderu k'atanhaska ka sánderu k'uikirhenhaska ka mémechani sano uándikunhaska.

²⁴Judiouechajtsïni iúmu xanhari uéntasti, sánderku no tsímani ekuatse k'uikirheni.

²⁵Tanimu xanhari uéntani pirimu jimbo k'uikirhenhaska; ma xanharijtsïni tsakapkuerantasti. Tanimu icharhutechaksï uekamespti engani ji jatapani jápka, ma xanhari chúskuspka ka erantskuni japondarhu xarhiani.

²⁶Uápurusïni nitikia, iurhekuechajtsïni páxaptia, kuárhukptichani uéjkuaska, jucheni anapuecha ka máteru ísï anapuechajtsïni atakuekani kámasti, iretecharhu jámaska ka juátecharhu ka japundarhu, ka jakajkuti arhikorherichani jinguni.

²⁷Uinhamusïni jámaka ka kánekua úkua jinguni, mémechani erantskutaska no k'uíni, ka uarhini k'arhimani ka k'arhichani; ióni jámaska nómbe ma t'irerini; ka uarhini ts'irani nómbema xukuparhatini.

²⁸Ka no indeni ambejku, támujtuni tángorhekuechani jimbo mándani pauani uandanheaska.

²⁹Ji nósesi p'ikuarhenheska enga nema p'amenchaka o terungutaranhani.

³⁰Ekani ambe ma jimbo újka k'éramakorheni, jucheti kétsekua uérakua jimbojkueuati.

³¹Diósï juchari Acha Jesusiri tátjemba, mítesti eskani sési uandantaxaka, imajkusï méntkisï k'éri ambeti.

³²Damasku anapu juramutirini jupirkorhespti, ima enga Aretasï irechepka,

³³jiáni úspka sïpakorheni jimbokajtsïni máru tatecha tsïntsïata jimbo késkuspka xúndirhu ma jatsiratini.