Read Western Highland Purepecha 2 Corintios 13 Bible Online

2 Corintios 13 - Western Highland Purepecha bible

2 Corintios 13

¹Tanimu xanhari niraxamkia cha jinguni, tsímani o tanimu uandantsticha jimbo méntkuchi sési péntaka indeni ambe.

²Arhispkaksïnia engani nípka, ka iásïjtuksïni ixu jatini arhixaka, eskani nóma k'amanharhintstini ísku exeaka,

³ekajtsï uéjka míteni eskani ji Krístu jimbosïni uandajka, chájtsï p'ikuarheraaka eska imeri uinhapekua no sapichu ambeska.

⁴Nájkiruka k'uiripueni cháparhatanhaka no uarhiri pakarasti, Diósïri uinhapekua jimbo tsípiti jarhasti. Jucha engani májkueni nósesi kánhani jaka, juchajtuni tsípekua jatsiaka ima jinguni Diósïri uinhapekua jimbo.

⁵Ts'éjkukorhe je ka exeni náxantsï jakajkuxaki. ¿Andi nójtsï míteski eskajtsï Jesukristueriska? ¿Ójtsï tsîrhukuskia?

⁶Mintsikaxaka eskajtsï exeaka eskani jucha sési jámaxaka.

⁷Kómarhixakachi Diósïni eskajtsï cha no nósesi jámani jaka; no jimbokani jucha sési pakarakuekani jaka, jurajkue xarharani eskaksïni no úska sési arhistacheni, cha sési jáma je,

⁸xarhantaati ambe enga ísïka, nóchi úaka támisï páni.

⁹Jucha tsípesïnga ekajtsï cha uinhapentajka no arhiparini eka juchari uinhapekua no xarharamaaka; kómarhixakachi eskajtsï iámu sési kurhaguaka.

¹⁰Jimboksïnisï ixu uératini karakacheni jaka, nóksïni uéksïnga jima uinhamarhecheni jarhani, Diósïri uinhapekua jarhojpetarakuesti nóchi úaka arhirpetarani.

¹¹Jimajkani tatecha ka nanecha, Diósïri p'amsperata ka sési jakua cha jinguni jauati ekajtsïni sési kurhajchaska ka jarhojperantsï ka sésijtsï pájperani.

¹²Sési uandajpera je. Iámendu jakajkutichaksïni ixu uératini uandajperata ma axachexati.

¹³Acha Jesukristueri kóntperakua ka Diósïri p'amsperakua ka Espiritu Sántueri jarhojperakua chánksïni jinguni jaue.