Read Western Highland Purepecha 2 Corintios 2 Bible Online

2 Corintios 2 - Western Highland Purepecha bible

2 Corintios 2

¹Ji nóteruni tekaaxapkia chánksïni nirani uandanheatani,

²nóchkani ji cha jimbosïni tsípejki andi, ka ekaksïni uandanheataska, ¿Andi ne jimboteruni tsípeni jaua?

³Ka nóchkaksïni uékaspka uandanheatani, jimboksïnisï karachepka, jíchkani cha jimbo tsípentasïnga ka sésiksïni mítetixaka eska niárantsïni sési exeni jarhani, chájtujtsï sési p'ikuarherantasïnga.

⁴Kánekuaksïni mískorheparini karachespka ka uandanheaparini, no jimbokaksïni uékapiringa nósesi p'ikuastani, jinisïni uéjka eskajtsï iámenduecha míteaka na engaksïni kánekua xénhchajka.

⁵Nóchi jukari arhiaka íni ambe, inde engarini nósesi p'ikuastaka, chánksïntu pájtamaxati nósesi p'ikuastani,

⁶sésku jati engajtsï cha arhikia,

⁷k'óru sánderu sési jauati ekajtsï púakuntaska ka sési arhintani, jimboka tsîncheni jámaka xáni mískorheni.

⁸Kómarhixakachkaksïni eskajtsï sési arhintaaka.

⁹Exekuekaxapka náxantsïni kurhajchasïnki jimboksïnisï karachepka.

¹⁰Ka néni engajtsï cha púakuntaaka, jíjtuni púakuntaaka, eka púatani uétarhini jaka. Jíjtuni Jesukristuni jimbo púatspentaaka ekajtsï cha púatspentaska,

¹¹ásïchkajtsïni Nóambakiti terungute, jimbokachi mítetixaka néna enga terungutpejka.

¹²Engani Troasi niárapka Jesukristueri ambakiti aiangperakuani uandantani, sóntku tángorhenhantaspti Acheri ambe kurhakuekanhani,

¹³k'óruni ji sóntku uéakuntaspka ka Masedonia niraspka jimbokani nósesi p'ikuarhenhexapka jucheti jarhojpiri Títuni no xéntatini.

¹⁴Jíchkani Diósïni diósïmaiamu arhixaka, engajtsïni Krístuni jimbo pájka nani engachi sési uéranchaaka, ka juchantsïni jimbo imeri jurhentperakua etsakorhepaxati.

¹⁵Jimbokajtsïni Diósï, Krístueri p'untsumekua jimbosï mítentajka, p'ímutantskatechani ka tsînchekatechani.

¹⁶Máruksï uarhirini jájkundini jarhasïndi, ka máteruksï p'untsup'untsujkundini jarhasïndi. Ka ¿Nésï ua íni ambe kurhanguni?

¹⁷Jimboka jucha no tumina andakuekaxamka Diósïri aiangperakuani uandantani, ísï eskaksï uánekua na jámani jaka. Jucha sési jimbo Diósïriska, ka Diósïni japarini Krístueri ambechisï uandantajka.