Read Western Highland Purepecha Gálatas 1 Bible Online

Gálatas 1 - Western Highland Purepecha bible

Gálatas 1

¹Páblu, Jesukristueri uandakua pári, no parhakpeni anapuechani jimbo, Acha Jesukristuni jimboesti ka Diósï Táteni jimbo enga tsítantaka.

²Iámendu erachicha engaksï jíndeni jinguni jaka, ka tángorhekuechani engaksï Galasia jaka.

³Eskaksïni Diósï juchari Táte ka Acha Jesukristu kánekua kóndeaka ka sésiksïni p'íkuastani.

⁴Jesukristu, juchari k'amanharhiskuecha jimbo intsïnharhitakorhesti, ka p'ímutantastijtsïni iásï enga xáni nósesi jánhaskorheka, jimboka juchari Diósï Táte ísï uékaxapka,

⁵Ima méntkisï k'éri ambe arhinhe. Jo, k'éri arhinhe.

⁶Ji no jánhaskaxaka néna jámantsïsï Diósïni xáni kókuani jarharenta engaksïni Krístueri kóntperatani jimbo uandapapkia, ka xáni kókuantsï máteru jásï aiangperakuani chúngumani.

⁷Ka no jimboka jaka máteru aiangperakua, jiniksïsï máru jati engaksïni manatka ka uéksïndiksï Krístueri ambakiti aiangperakuani tsîjpani.

⁸Ikimenhe ima, náuejkini jucheni o auandarhu anapu ánjeli ma engaksï no imani ambakiti aiangperakuani aianguntaaka engaksïni jucha aianguntapkia.

⁹Arhiskaksïnia ka ménderuksïni arhixaka: Engaksïni nema, no imani aiangperakuani arhijtsïkuska engajtsï cha p'itini jápkia, ¡Ima ikimenhe!

¹⁰¿Andi ji iásï k'uiripunisïni sési pakarakuni uéjki? O ¿Diósïnisïni uéjki sési pakarakuni? ¿Ji k'uiripu jingunisï uéjki sési pakarani? Engani ji útasteruni sési pakaratspeni uékapiringa, ji nóteruni Krístuni jántspekuni jámapiringia.

¹¹Erachicha, uéksïnga eskajtsï míteaka eska i ambakiti aiangperakua engani ji uandantani jaka, no k'uiripueri jurhentperakueska;

¹²nónemarini aianguntasti, nírini nema jurhenda, Jesukristurinisï exerati.

¹³Chájtsï mítetixaka na engani ji jámempka engani judiuecheri jakajkukuani jakajkuempka, ji Diósïri jakajkutichani nósesi káasïrempka ka jángorhentaxapka k'amajkuani.

¹⁴Ji uánokumaaspka uánekuechani engaksï sánderu k'érati judiuecheri jakajkukuarhu, ka sánderuni uékasïrempka juchari iótki anapuecheri p'indekuechani chúxapaani.

¹⁵K'óru Diósï, imeri kóntperatani jimborini t'uíni erakutixaptia engani ji nótkini andajpenuni jápka, ka sésekuarini íntskusti,

¹⁶eskani ji uájperi ambe jánhaskapiringa, ka eskani ambakiti aiangperakuani no judiuechani aianguantaapiringa. Jiájkani ji nónemani kurhamarhespka,

¹⁷ka nójtuni karhamaspka Jerusaleni, jini engaksï máteru uandakua páricha jaka engaksï t'uíni jápkia. Ji Arabia ísï niraspka ka tátsekua Damasku k'uanhatsentaspka.

¹⁸Tátsekua tanimu uéxurhini jimbo, Jerusaleni karhamaspka Pédruni míteni, ka témbeni iúmu jurhia ima jinguni pakaraspka.

¹⁹Ka nóteru ma Jesusiri uandakua párini exespka, Santiaguntku, Jesusiri erachi jémbani.

²⁰Íni ambe engaksïni karacheni jaka, Diósï exexati eskani no chkuándiraxaka.

²¹Tátsekua Síria ka Silisia ísï niraska;

²²ka Judea anapu Krístueri tángorhekuajtsïni nótki úxapti míteni;

²³jinijkuksï kurharini jápti: “Ima engajtsïni jupikani jámempka, iásï ambakitini aiangperakuani uandantaxatiia imani enga k'amantskantani uékempka.”

²⁴Ka jíndeni jimboksï Diósïni k'éri ambe arhisïrempti.