Read Western Highland Purepecha Gálatas 3 Bible Online

Gálatas 3 - Western Highland Purepecha bible

Gálatas 3

¹¡Cháta k'ória Galasia anapuecha, xáni engajtsï chupejtsïka! ¿Andi néksïni tandosï úntaski? Nájkiksïni sési jánhastapia andi néna enga Jesukristu cháparhatanhaka.

²Ma ambejkujtsïni arhi je: ¿Cha espirituni juramukuani jimbo intsïnhaski? O ¿Jimbokajtsï jakajkuska imani engajtsï aiangunhaka?

³¿Andi xántsï no kurhangusïnki? Nájkijtsï Espirituni jimbo uénapia andi, ¿Andijtsïsï k'uiripueri úkua ambe jimbo uéjki k'amarhukuni?

⁴¿Andi ískujtsïsï xáni kómu nitamancha? K'óru enga sési jimbo ískueka.

⁵Diósï engaksïni Espirituni íntskuka, ka milagruechanksïni úcheani, ¿Juramukua jimbo ísï úski o jimbokajtsï jakajkuska imani engaksïni arhijtsïkuka?

⁶Ísï eska Abrani Diósïni na jakajkupka, ka Diósï sési jásï k'uiripu exesti.

⁷Jánhaskantsï je eskaksï Abrani uájpeska ima engaksï jakajkuparini irekaka.

⁸Karakata arhixaptia eska Diósï, jakajkukua jimbo no judiuechani sési jásï k'uiripu exeapiringa, ka Abranini íni ambakiti aiangperakuani arhirixaptia: “T'úngeni jimboksï újchakuranhaati iámendu iretecha parhakpeni anapuecha.”

⁹Ísï jimbo, jakajkutichaksï Abrani jakajkuti jinguni újchakurakatesti.

¹⁰Iámendu ima engaksï juramukuani mintsikajka, ikimekataksï jarhasti, jimboka ísï karakata jarhaska: “Ikimekate ima enga no úaka iámendu ambe enga juramukua arhijka.”

¹¹Ísï jimbo jánhaskorhesti eska nónema juramukua jimbo kaxumbiti exenhasïnga eska na karakata jaka: Kaxumbiti ma tsípekua jatsiati enga jakajkuaka.

¹²Ka juramukua no jakajkukua jimboesti, jimboka ísï arhisïnga: “Ima enga juramukuani kurhajchaaka, juramukuani jimbo tsípekua jatsiati.”

¹³Krístujtsïni juramukueri ikimekuarhu p'íjpantasti, ka juchantsïni jimbo ikimenhasti, nóchka ísï karakata jarhaski andi: “Ikimekatesti ne enga cháparhatanhaaka.”

¹⁴Ka eskaksï ísï no judiuechajtu Jesukristuni jimbo újchakuranhaaka, ísï eska Diósï Abranini na aiakupka, eskachi Espirituni jakajkukua jimbo p'iuaka.

¹⁵Erachicha, jurajkuksïni arhini eska k'uiripu na jámpka: Engaksï nema ambe ma pakatperaakia, ka karakata jimbo uinhaperanksï, nóteru nema úsïndi xerentani o ambe ma kúnharhitani.

¹⁶Kóru Abranisï ka imeri sïrukua jémbasï aiamenhati ambe, no iámendu sïrukuanisï arhikuekani jati, májkunisï arhini jati, Krístunisï arhini jati eska sïrukua jémbeska.

¹⁷Ji jinisïni uandani jaka: Eska Diósïri aiatsperakua no úaka juramukua jimbo xerenhantani, enga ma irepeta ka ma ekuatse témbeni uéxurhini tátsekua janoka. Inde no úati Diósïri aiatsperakuani xerentani.

¹⁸Enga aitsperakua juramukua jimbo p'inhapiringa, nóteru aitsperakuepirindia, k'óru Diósï Abranini aiakusti ísku íntskuni.

¹⁹Jiájkani, ¿Juramukua ambe marhoasïnki? K'amanharhintskuechani jimbosï únhati enga jamberi Abraniri sïrukua jémba janopiringa enga aiakata jápkia. Iman juramukua engaksï Diósïri ánjelicha uandantaka uandapitspiri ma jimbo.

²⁰K'óru enga nema jandiojku aiakorheka, uandapetspiri no uétarhisïndi ka Diósï májkuesti.

²¹¿Andi juramukua, Diósïri aiatsperakuani támu pérasïnki? ¡Nómbe! Eka juramukua úpiringa ambakiti tsípekua íntsïpeni, jiájkani juramukua jimbo kaxumbenhantapirindi.

²²K'óru karakata arhisïndi eskaksï iámendu parhakpeni anapuecha k'amanharhintstiska, ísï jimbo, ima engaksï Jesukristuni jakajkujka, Diósïri aiatsperakuanksï p'iuati.

²³Enga jakajkukua nótki janoempka, juramukuajtsïni katsijkutixapti, ka erokorhexapkachi eska jakajkukua uandanhantapiringa.

²⁴Ka juramukuajtsïni arhistachepuxapti, eka jamberi Krístu janoka ka jakajkukua jimbojtsïni p'ímutantasti.

²⁵Ka iásï enga jakajkukua janokia, nóteru májtsïni juramukua arhistachexati.

²⁶Jimbokajtsï iámenduecha Diósï uájpeska Jesukristuni jakajkutini.

²⁷Ima engaksï Jesukristuni jimbo itsï atajtsïka, Krístuenksï járhantastia.

²⁸Ka nóteru arhisïndia judioueni ójtu gríegueni, jántspirini ójtu juramutspirini, tatakeni ójtu nanakeni, jimbokajtsï cha Krístu Jesusini jinguni májkuentatixakaia.

²⁹Ka engajtsï cha Krístuerintakia, jiájkantsï Abraniri sïrukua jémbeska ka aiatsperakuantsï cha p'iuaka.