Read Western Highland Purepecha Gálatas 4 Bible Online

Gálatas 4 - Western Highland Purepecha bible

Gálatas 4

¹Arinisïni arhikuekani jaka, eka sapi ma, náuejki iámendu ambe míndamenhatini jatsimenhani, májkuenisti eska jántspiri ma, náuejki iámendu ambe imerini.

²Jarhasïndiksï máru engaksï k'uiriperani jarhajka, ka máteru enga ambe patsakuni jauaka jiájkani jamberi na enga jatini tátjemba uandarini jaka.

³Májkueni juchajtuchi engachi sapipka, parhakpeni anapu uinhapekua ambejtsïni míngorhetixapti.

⁴Ka niárasti jurhiata enga Acha Diósï uandarini jápka ka uájpani axasti, imani enga iurhitskiri ma kángorheka ka ima juramukuani kurhandirakusïrempti,

⁵ka p'ímutantastijtsïni juchantsïni engachi juramukuani kurhajchani jápka, ka isïjtsïni Diósï, uájperakorhesti.

⁶Iásï engajtsï chájtu uájpentakia, Diósï, uájperijtsïni Espirituni juchari mintsitecharhu pérachesti; ka inde Espiritu uandasïndi: “¡Abba! ¡Táte!”.

⁷Iásï k'óruri nóteru jántspiriskia, iásïri Diósï uájpeskia, ka jimbokari ima uájpekia, t'újturi p'iuaka imani enga Diósï aiatspeka.

⁸Urhetku engajtsï Diósïni nótki mítempka, diósï eratakatechantsï jántspekuaxapka.

⁹Ka iásï engajtsï Diósïni mítekia, o sánderu sési arhiparini engaksïni Diósï chánksïni mítekia, no úsïnga jánhaskani, ¿Andijtsïsï ménderu parhakpeni anapu ambeni jántspekuntani uékani jaki enga nósani uinhapeka ka no marhuarini?

¹⁰Chájtsï sóntku jatini mámaru járhati k'uinchekua eroantaani jarhasïnga.

¹¹Jíksïni chéjkuxaka, ásï ísï, ka ji ískuni xáni ísï ánchekorheni chánksïni jinguni.

¹²Erachicha, kómarhixakaksïni eskajtsï ísï jámaaka eskani ji, ísï eskani ji na chéni jáxentapka. Ka no jimbokajtsïni nósesi ambe úcheka.

¹³Chájtsï míani jaka engani urhetku cha jinguni pakarapka, engani uinhamendu p'amenchapka, ka jiájkanksïni uénaspka ambakiti aiangperakuani aianguntani.

¹⁴Ka jucheti p'amenchakua jimbojtsï ambakiti ma ts'éjkukua nitamanchaspka, no méntsïni ikichaspka níjtsïni jurarkuni, sánderujtsïni Diósïri ánjelini kámaspka, o eskani ambe ji Jesukristueni.

¹⁵¿Nákia ima sési jásï p'ikuarhenhekua? Jíksïni exekorheska eskajtsï eskuechani jamberi p'itanharhiapiringa jíndeni íntsaani.

¹⁶¿Andi ikiataskiksïni engaksïni imani ambe arhika enga ísïka?

¹⁷Nósesi jásï p'ikuarhenhekuesti engaksïni ima xarhatachejka, jiniksïsï uéjti eskajtsïni cha jíndeni jarhareaka, ka eskajtsï imecha jinguninhchaaka.

¹⁸Sésisti jarhojpenhchani, enga sési jimboeuaka; ka méntkisï, no jiájkantku engani ji chánksïni jinguni jauaka.

¹⁹¡Jucheti uátsïticha! Chánksïni jimbo ménderuni ísï p'amearhaxaka eska uarhiti ma enga charhakuni kángorhekuekani jarhajka, enga jamberi chári irekuarhu Krístu sési uinhapeaka.

²⁰Uékapiringa cha jinguni jarhani ka arhikorheniksïni, jimbokani nóteruni jánhaskasïnga nénateruksïni arhini.

²¹Arhijtsïni je cha engajtsï juramukuani uéjka kurhajchani, ¿Andi kurhanguskijtsï ambe enga juramukua arhijka?

²²Karakatarhu arhisïndi eska Abrani tsimani uájpechani kóndenhaaspka: Ma jántspiri Agari jinguni, ka máteru Sára jinguni enga témbepka ka no jántspirini.

²³Jántspiri uájpa, k'uiripueri eratsekua jimboespti; témba uájpani k'óru Diósï aiatspespti.

²⁴Ka indeni uarhiticha jinguni terukuntasïndi eskaksï tsimani aiatsperakua jarhaska; uénani, Sinai juátarhu anapu, jántspiri uájpecha, ka Agari jinguni terukuntasïndi,

²⁵Agari, Sinai juátani arhikuekasïndi enga Arabia jaka, ka iásï Jerusaleni jinguni terukuntasïndi jántspirini, jimbokaksï jima anapuecha juramukuani jántspekuxaka.

²⁶K'óru auandarhu anapu Jerusaleni no jántspiristi ka juchachi jima anapueska.

²⁷Nóchka ísï karakata jarhaski andi: “Tsípe t'u engari no újka sapi kángorheani. T'u engari nómeni p'ikuarheraka néneski sapini ma kángorheni, jiuakorhe xáni tsípeni. Jimbokari t'u engari mirikurhikata jápka, sánderu uánekua sapichaniri kóndenhauaka eska ima enga uámbani kángorhejka.”

²⁸Ka iásï cha erachicha, májkueniskajtsï eska Isaki: Diósïri aiatsperakua uájpeskajtsï.

²⁹Nájkiruka ísï eska jiájkani enga k'uiripueri eratsekua jimbo kángorhekata, atani uékempka imani enga Espiritueri uinhapekua jimbo andajpenupka. Iásïjtu májkueni úkorhexati.

³⁰¿Andi násï arhijki karakatarhu? Jima arhisïndi: “Jántspirini, uájpa jinguni chúntsï, jimboka no úaka jántspiri uájpa, no jántspiri uájpa jinguni p'irani, imani enga míndakata jaka.”

³¹Ísï jimbo erachicha, juchachi no jántspiri uájpeska, juchachi imasï uájpeka enga no jántspirika.