Read Western Highland Purepecha Gálatas 5 Bible Online

Gálatas 5 - Western Highland Purepecha bible

Gálatas 5

¹Krístujtsïni euajpentasti ka nóteruchi jántspiriskia, anhatsekorhe je ka ásteru jurajkutakorhe je eskajtsï jántspekuani uanajchantaaka.

²Ji Pábluksïnisï ísï arhini jaka, ekajtsï ts'iuekuarhu pasïri p'ikujtsïkumenhaska, Krístuksïni no marhoacheati.

³Ménderuni imani arhiaxaka engaksï pasïri p'ikujtsïkumenhajka, eska ima jatsiska juramukuani iámu ambe jimbo kurhajchani.

⁴Cha engajtsï juramukua jimbo kaxumbeni uéjka, Krístuntsï jarharentaska ka Diósïri kóntperakuantsï jurajkuska.

⁵Juchachi Espirituni jimbo mintsikasïnga eskajtsïni jakajkukua jimbo Diósï kaxumberantaaka.

⁶Jimboka Krístu Jesusini jakajkuparini, nómbe méska pasïri p'ikujtsïtani o no p'ikujtsïtani, jakajkukuasï arhijti engajtsïni xénhchpetarajka.

⁷Sésijtsï niraxapkia, ¿Néksïni tsîrhukutaraski engajtsï nóteru chúxapaka indeni enga ísïka?

⁸Inde no Diósïristi, ima engaksïni uandajpaka.

⁹¿Andi nójtsï míteski eska? “Sántku xarhiperakua iámu tsïrerini k'úrasïnga”

¹⁰Ji Táteni mintsikaxaka eskajtsï cha no ménderueni kurhanguaka, ka ima engaksïni xerejka ikimenhaati néuejkinini.

¹¹Ji, erachicha, engani jíjtuni útasï uandantani japiringa eska uétarhisïnga tsiuekuani pasïri p'ikujtsïkuni, ¿Andi útasïjtsïni judiuecha atani uékapirinki? Ka nóteruksï ikiapirindi Krístueri cháparhatakuani kurharini.

¹²¡Ima engaksïni ójkutajka, méntkuksï kachujchupirindia!

¹³Erachicha, chájtsï uandajpanhaska eskajtsï nóteru katsijkunhatini janhaakia, ásï indeni jimbo néna uéjkinini jáma je, jinijtsïsï xénhchperaparini jarhojperaaka.

¹⁴Jimboka iámendu juramukua imantkusï arhikuekati: “Xénhpe ísï eskari t'u na xénhchakorhejka.”

¹⁵Ekajtsï chájku uénaska uarhiperani ka arhinhchperani, chájkujtsï k'amajperaaka.

¹⁶Jíksïni arhixaka: Engajtsï ísï irekorheaka eska Espiritu na uéjka, nójtsï úaka imani nósesi jásï ambe engajtsï tsitinhchaaka.

¹⁷Jimboka anhanhatakua méntku máteru ambe tsitisïnga eska Espiritu; indeksï no pájperasïndi, ísï jimbo ásï u je ambe engajtsï cha únhchani jauaka.

¹⁸Ka engaksïni Espiritu urhechepaaka, jiájkantsï nóteru juramukuani jantspekuakia.

¹⁹Ambantku xarhatanhasïndi engaksï nósesi jásï ambe únhchajka: Ísku jánhchakua ambe, néna uéjkinini jámani, uíchueni jángua,

²⁰eratakatechani diósïraani, sïkuajperakua ambe, arhirperakua, uarhiperakua, jáarhatsperakua, kurhunhperakua, uandandirakua, támisï jánhastperakua,

²¹epuperakua, kauikua, tsîchentani k'uíncheni; ka uánekua ísï járhati ambeteru. Kurhachkajtsïni je, arhispkaksïnia ima engaksï íni ambe újka, Diósïri irechekuanksï no p'iuati.

²²Ka Espiritu jimini ménderuenisti, jimboka xénhchperakueska ka tsíperpentasïndi ka sési pájperpeni ka tekaatspentskua ka sési uandajperakua ka p'amojperakua ka jakajkutarpentasïndi,

²³ka kétsekua uérani ka p'ínhpesïndi. Indeni ambe jimbo, nóma juramukua jarhasti.

²⁴Ka ima engaksï Krístuerikiia, k'uiripueri nósesi jásï únhchakuani ka eratsekuanksï cháparhatatixatiia.

²⁵Ekachi Espiritu jinguni irekaska, ísïchi jámaaka eska Espiritu.

²⁶Ju je no k'éramakorheni, ju je no arhirhperani ka ni epurhperani.