Read Western Highland Purepecha Efesios 5 Bible Online

Efesios 5 - Western Highland Purepecha bible

Efesios 5

¹Ísï jimbo Diósïni jáma je, eskaksï uájpa xénhchakatecha,

²ka xénhchpera je ísï eskaksïni Krístu na xénhchajka ka chánksïni jimbo tsípekua íntspesti, ima ísïsti eska Diósïri sési jásï p'untsumekua kéjtsïtakata.

³Eskajtsï na jimbo Diósïrika; méntku ásï jamberi uanda je ísku jánhchakua ambe, iámendu nósesi jásï ambe o ambe kánhchakua ambe.

⁴Ka ásï jáma je ísku ambe ma uandani ch'anach'anameparini, ísku ambe uémuskorheni enga nósesi jaka, jinijtsïsï sánderu sáni diósïmaiamukua arhijpentaaka.

⁵Ka méntku mítetini ja je eska nónema p'iuaka Krístueri ka Diósïri irechekuani enga ísku jándiuaka o no kaxumbeni, o ima enga jatsikorhenhchakuani ambe k'éri exejka, jimboka ima máteru ambeni k'éri úni jarhasïnga.

⁶Eskaksïni nónema ísku ambe ma arhiparini tandosï úntaaka, jimboka Diósï no kurhandirechani ikiakuasïnga.

⁷Ásï jáma je imecha jinguni kúngorheni.

⁸Jimbokajtsï cha urhetku pájpakandu irekaxapka, ka iásïjtsï Achani jimbo t'íntskuarhu irekaxakaia. Ísï jimbo t'íntskua uájpeni ireka je;

⁹jimboka t'íntskua kaxumberpesïnga ka úrpeni eska Diósï na uéjka ka ísï jámani eska néka.

¹⁰Exe je ambesï Acha jaiapanhentajki.

¹¹Chájtu ásï imani ambe u je enga no marhuajka eskaksï ima engaksï pájpakandu jaka, sánderu sáni xarhatakua je ambeksïsï nósesi úni jaki.

¹²Nóchka k'uratsekorheski uandani jamberi andi ambe engaksï sïpatekuarhu újka;

¹³k'óru iámendu ambe enga t'íntskua t'íntskakuajka, ambantkuksï xarharasïndia.

¹⁴Jimboka iámendu ambe enga mítekorhejka t'íntskuesïndi. Jimbosï uandanhajti: “Tsínharhi t'u engari k'uíni jaka, ka jurajkua uarhirichani ka tsíntsï ka Krístukini t'íntskaracheati.”

¹⁵Ísï jimbo, exekorhe je néna engajtsï irekajka; ásï no míakua jukarini irekorhe je, sánderu sáni míakua jukarini ireka jeia.

¹⁶Sési marhuataa je jurhiatechani, jimboka iásï kánekua nósesi jándekorheska.

¹⁷Ísï jimbo, ásï no míakua jukarini jáma je, jinijtsïsï jánhaskaaka Acha ambesï uéjki.

¹⁸Ásï kaui je, jimboka inde tsîtpiriska; sánderu sáni jinijtsïsï Espiritu Sántuni uinirhekorheaka:

¹⁹Iámendu jakajkuticheri pirekuechani ka k'éri ambe arhikuechani pireaparini jáma je. Ka sésimendu andanheantsï je Achani pirekuni ka kústakuni,

²⁰ka méntku iámendu ambe jimbo Diósï Táteni, Acha Jesukristuni jimbo diósïmaiamu arhi je.

²¹Krístuni janhanharhini, máteruechani janhanharhia je.

²²Uarhiti acheti jémbani sésimendu janhanharhi ísï eskaksï Achani na janhanharhijka.

²³Jimboka acheti uarhiti jémbani urhejtsïkusïnga, ísï eska Krístu jakajkuticheri tángorhekuani na éjpueni jakuaka urhejtsïkuani, ka jakajkutichaksï anhanhatakueni jarhasti, ka Krístu jakajkuticheri p'ímutantspiristi.

²⁴Ísï eskaksï jakajkuticha Krístuni na janhanharhijka, uarhitichajtu iámendu ambe jimbo uámbani janhanharhi.

²⁵Tatecha, uarhitichani xénhchakorhea je, ísï eska Krístu jakajkuticheri tángorhekuani na xénhchajka ka imechani jimbo tsípekua jamberi íntspesti.

²⁶Íni ambe ísï ústi imerirakorheni ka imeri uandakua jimbo pímpinhajkuntasti,

²⁷ka sési mereari xarhatakorhentani; eska no nósesi eraakorheaka o uachoni ambe o xásï ambe, sánderu sáni eska pímbinhaxeaka ka sésimendu jáxeni.

²⁸Tatechaksï uarhitichani ísïsï jatsiti xénhchaani, eskaksï jándiojku na xénhchakorhejka. Ima enga uarhiti jémbani xénhchajka, imasï xénhchakorheni jati.

²⁹Jimboka nómeni nema jandiojku jatini ikimchakorheska; jinisï jamberi sési t'irejti ka kánekua xénhchakorheni, ísï eska Krístu jakajkuticheri tángorhekuani na xéani jarhajka,

³⁰jimbokachi juchajtu Krístueri anhanhatakueska.

³¹Ísï jimbosï ts'iuerati tátjembani ka amambani jurajkuati ka tembuchaati ka uarhiti jémba jingunksï májkuentaati.

³²I ambe enga no uánekua mítenhapka kánekua k'éri ambesti: Krístueri ka jakajkuticheri tángorhekueri ambesïni uandani jaka.

³³Ka cha sánderu sáni uarhitini xénhchakorhe je, eskajtsï cha na xénhchakorhejka; ka uarhiti uámbani janhanharhi.