Read Western Highland Purepecha Efesios 6 Bible Online

Efesios 6 - Western Highland Purepecha bible

Efesios 6

¹Uátsïticha, Achani jimbo chári tátechani kurhajchaa je; jimboka i ambe sésiska.

²“Janhanharhi táteni ka nándeni,” inde juramukua urhetisti enga ma ambe aiatspeni jaka:

³“Ísïri úaka parhakpeni sési irekani ka ióniri irekani.”

⁴Tátecha, chári sapichani ásï ikiataa je, sánderu sáni jurhendakorhea je ka Acheri ambe aiangua je.

⁵Jántspiricha, imani engajtsï parhakpeni ánchekorhekuajka méntkisï kurhajchaa je, ka sési p'ikuarhenheparini ísï eskajtsï Krístuni na kurhajchajka,

⁶ka no jiájkantku engajtsï exenhani janhaaka, sési pakaratspeni uékani. Sánderu sáni ísï jáma je eskaksï Krístueri jántspiricha engaksï mintsita jinguni újka ambe enga Diósï uéjka;

⁷únhchaparini, ísï eska ima enga Achani marhuakuni jámka, ka no ísï eska ambe marhuatspeni jámani.

⁸Mítetini ja je eska mándani arhini náuejki jántspirini o no jántspirini, Acha maiamuantauaka ambe engaksï sési ambe úaka.

⁹Ánchetpiricha, chári jántspirichani májkueni kaa je, ásteru chéraaparini kaa je; mia je eska chári ka indecheri Acha, auandarhu jarhaska, ka eska ima iámenduechani májkueni exeasïnga.

¹⁰Ka iásï Achani jimbo ka imeri xáni k'éri uinhapekua jimbo uinhapekorhe je.

¹¹Ka Diósïri uarhiperatarakuani jukantsï je, engajtsï nóambakitiri tandojchperakuani kuájpetarakorheaka.

¹²Jimboka juchari uarhipekua no k'uiripuni jinguniska, jinisï juramuticha ka uinhapekuecha jinguniti, ima nósesi járhaticha jinguni engaksï íni parhakpeni juramujka, espiritu nósesi járhaticha engaksï tarhiatarhu jámka.

¹³Ísï jimbo Diósïri uarhipetarakuechani p'íkua je, engajtsï jiájkani enga nósesi jánhaskorheaka kuájpetarakorheaka, ka engajtsï iámendu ambeni andaakia, útasïjtsï sési anhaxurhitini jauaka.

¹⁴¡Sési anhaxurhikorhetini ja je! Ka jóngorhekua sési juángorhentatini ja je eska jurhimbekua néka, ka ambe tánhentsï je, ka ambe enga Diósï uéjka imani tatsunhe je.

¹⁵Ka ambakiti aiangperakua sési pájperakuerini jimbo kuarhachichani sési jukantsï je,

¹⁶ka jakajkukuani kuájchatarakorhe je, eska ch'urhurhpetarakuechani enga Nóambakiti étskutini k'uanirajka, pátauaka.

¹⁷Úra je inchajtsïntskua tiámuerini enga p'ímutantskueka, ka k'éri akuarhpetarakua Espirituerini enga Diósïri uandakueka;

¹⁸ka méntku uandamukorheni ja je ka kómarhijpe je, ásï kuatantsï je Espiritu jimbo uandamukukorheni, ka iámendu Diósïrichani kómarhijpekua je.

¹⁹Ka jíndentujtsïni kómarhijpeche je, engani ji uandakuekani jámaaka, eskani uandakua intsïnhaaka, ka eskani úaka ts'iueparini ambakiti aiangperakueri ambe aiangpentani enga no uánekua mítenhapka:

²⁰Imani engani ji uandantani jámani jaka, engani jimbo jótakata jaka, eskani ji nósani chéparini úaka indeni ambe uandantani eska na uétarheni jaka.

²¹Tíkiku, juchari erachi xáni xénhchakatanksïni axachexaka, ima Achani no jurajkuntasti marhuakuni, indeksïni iámendu ambe aianguati eskajtsï míteaka néna engani nitamakorheni jaka ka ambe enga xáni jaka.

²²Indenksïni axachexaka jimbokani uékasïnga eskajtsï juchari ambe míteaka ka eskaksïni inde sési uinhaperantaaka.

²³Erachicha eskajtsï Diósï Táteni ka Acha Jesukristuni mintsikatini, sési pájperaaka ka xénhchperantsï.

²⁴Újchakuranheksï iámendu ima engaksï juchari Acha Jesukristuni méntkisï mintsita jinguni xénhchajka.