Read Western Highland Purepecha Filipenses 1 Bible Online

Filipenses 1 - Western Highland Purepecha bible

Filipenses 1

¹Ji Páblu ka Timoteu, engachi Jesukristueri jántspirika, Filipusï anapu Jesukristueri jakajkutichanichi karakuaxaka, chánksïni ka ístu chári urhejtsïkurhichani ka tángorhekuarhu anapu jarhojpirichani.

²Juchari Diósï Táteri ka Acha Jesukristueri kóntperata ka sési pajperakua cha jinguni jaue.

³Ji chánksïni jimbo Diósïni méntkisï diósmaiamukua arhini jarhasïnga,

⁴ka engani uandamukukorheni jarhajka, tsípekua jingunksïni komarhijpechesïnga,

⁵jimbokajtsï uénakuarhutki sési jakajkuska ka iásï jamberijtsï sési jarhaskia;

⁶Diósïni k'amak'asï mintsikaxaka, eskaksïni na uénakia sési ambe kóndeni, eskaksïni sánderu ambe kondentani jauaka eka jamberi tata Jesukristu júnkuaaka.

⁷Ji sési jimbochkasï chaksïni jimbo ísï sési p'ikuarhenhejka, jimbokaksïni mintsitarhu kámasïnga ka jamberijtsï chájtu p'ikuarherasïnga ambe engarini Diósï kóndejka, ka nauejki engani ónhakata jaka ka enga uétarheaka ambakiti aiangperatani uandantani, juramutichani japarini uandantasïnga.

⁸Diósï mítesti na engaksïni xáni xénhchajka, ísï eskarini Jesukristu jíndeni na xáni xénhchajka.

⁹Ka kómarhijpechexakaksïni eska chári xénhchperata sánderu ka sánderu kánepani jauaka ka eskajtsï sánderu jánhaskapani jauaka,

¹⁰ka jurhenantsï erakuni ambeski sési irekani ka sési jámani. Ka sésijtsï anhaxurhikorhetini jarhani jiáni enga Krístu junguaaka,

¹¹jimbokajtsï chasï xarhataaka chári sési jángua ukuecha jimbo, enga Tata Jesukristuni jimbo jurhajka, ka eska Diósï k'éri ambe arhinhaka.

¹²Erachicha uékasïnga eskajtsï míteaka ambe engani úkorhenchaka, eska marhuaska, ambakiti aiangperakuani uandantani, eska sánderu mítenhaaka;

¹³Ka engani ísï ónhakata jaka, marhuasti jimbokani iámendu jurahamutichani aiankuantaxaka eskani Krístuni jimbosïni ónhakata jaka.

¹⁴Ka uánekua erachicha isï exerintsïni na engani jamani jaka, ts'iuentastiksï ka indejtuksï sánderu tsípekua jinguni íni ambe uandantaxati.

¹⁵Máruchkaksï Krístueri ambe uandantaxati jimbokajtsïni epurhesïnga ka andakuekantsïni, k'óruksï máteruecha sési jimbosï uandantajti,

¹⁶kaxumbekua jinguni, jimbokaksï míteska eskani ji ónhanhaska jimbokani ambakiti aiangperakuani kuájpesïnga,

¹⁷ka máteruechaksï nósesi jimbosï uandantajti, sánderujtsïni uékani nósesi jájpacheni andakuekantsïni iásï engani ónhakata jaka, eskani sánderu nósesi p'ikuarheraaka.

¹⁸¿Ka ambejtu nósesi iua? Krístueri ambesï uandanhantani jati, ísku ísï uandaparinhani o ambakiti mintsita jinguni, ka ji tsípesïnga indeni jimbo ka méntkisï tsípeaka.

¹⁹Jimbokani míteska eska marhoauaka chári komarhikuecha jindeni jimbo, ka Jesukristueri Espiritu jarhojperata jimbo, ji no íoni jimbo jurhajkunhaka.

²⁰Ka mintsikaxaka eskani no k'urhatsetakorheaka, sési ambesïni erokorheni jaka uinhapiti jarhani ka úni Krístuni k'éri ambe arhini ka ekani nótki uarhini jauaka, Krístueri t'íntskua jíndeni jinguni iámu xarharaati,

²¹jimboka jucheti tsípekua jíndeska, Krístuni marhuakuni, ka ekani uarhiska imanisïni andakorheaka.

²²Ka engani no uarhini jauaka jimboka jucheti anchekorheta kánekua ambeteru kuerataxaka ¿Nénasïni jamaia?

²³Tsimapuru uékapiringa jarhani: Ji kánekua sési p'ikuarheransïnga ka uékapirinkia Krístu jinguni niántania, jimboka indesï sánderu sésika;

²⁴k'óru sánderu uétarhexati eskani íni parhakpenirhu pakaraka chánksïni jarhuatanderu.

²⁵Ka jimbokani íni ambe sési inchajtsïtini jakaia, míteska eskani pakarakateru ka eskani cha jinguni jauaka ka jarhuatanksïni eskajtsï sánderu tsípekua jinguni jakajkuaka,

²⁶ka engani menderu cha jinguni jauakia, úaka eskajtsï cha Jesukristuni jimbo sánderu k'éramakorhiaka Jíndentsïni exerini.

²⁷Cha jangorhentsï je, Jesukristueri ambakiti aiangperakua jimbo sési irekani jarhani, náuejkini ji niranksïni p'urhembeni o no nirani, eskajtsï sési anhaxurhitini jáuaka májku espiritu jinguni, ka ambakiti aiangperakuantsï májku mintsita jinguni jakajkuni,

²⁸ka eskajtsï no jámaaka chéparhakuni jarhani chári ikiatspirichani jinguni, jimboka íni jimbosï xarharaaka, eskaksï ima tsinchekuarhu niraxaka, ka xarharani eskachi juchasï p'ímutantskateka. Ka i ambe Diósï jimbosï ukorhejti.

²⁹Jimboka Krístuni jakajtuni no kóntperatajkusï p'inhajka, imani jimbojturi nósesi kánhaaka,

³⁰márkuchkachisï jángorhentani jaka íni ambe niatani, chájtsïni exeriskia eskani uinhamu jámaspka ka kurhaxakajtsï eskani iásï jamberi incharhetakuxakateruni.