Read Western Highland Purepecha Filipenses 2 Bible Online

Filipenses 2 - Western Highland Purepecha bible

Filipenses 2

¹Jiájkani, engaksïni Krístu uinhaperantajka, ka xénhchperata ka Espiritu jimbojtsï p'ikuarhenheni máteruechani jarhuatani, ka eska iámendu inde, p'ikuarhenhekua mintsita jinguniuaka,

²ji kánekua tsípeaka, exeparinksïni eskajtsï márku sési irekaxaaka, iámenduecha májku jásï xénhchperata jinguni, ka májku xasï espiritu ka p'ikuarhenhekua jinguni.

³Eska nómema nemani ikiakuaka, ójtsï k'éramakorheni jámani jinijtsïsï máteruechani sánderu sési káuaka, ka eska chári kaxumbekua máteruechani sánderu k'eri p'ikuastauaka,

⁴ásï jame je jandiojku uékani ambe kánerakorheni, jinijtsïsï máteruechantu jarhuatauaka.

⁵Eskajtsï iamenduecha ísï p'ikuarhenheparini jámaka eska Tata Jesukristu,

⁶Jimboka náuejki ima: Ísïpka eska Acha Diósï no jámasti imani ónharhini ka uékani méntkuenini eska Acha Diósï.

⁷Sánderu sáni jinisï, jurajkupti imeri k'érikua ka k'uiripuechani jinguni márkuentani ka k'uiripueni jántspiri úkorhentani, ka k'uiripueni jámaspti;

⁸ka jurajkutakorheni, uarhikuarhu jamberi kurhandirani ka krúsirhu uarhini.

⁹Jimbosï Diósï sánderu k'éri arhinhatarati ka iámenduecha jinguni sánderu k'éri ambeni imeri jakangurhikua,

¹⁰Ka eska, Jesusiri jakangurhikua jimbo, auandarhu iámendu tinguixurhinhaka ka parhakpenirhu, ka echerindu inchatsekua,

¹¹ka eskaksï iámendu uandanhaataka eska Tata Jesukristusï Acheka, ka Diósï Táte k'éri arhinhe.

¹²Ka ísï jimbo, jucheti erachicha, eskajtsï na jimbo méntkisï sési kurhandira jarhajka, ka no jíantku engani cha jinguni jápka, iásichka sánderu sési kurhandira je engani iauanisï jámani jaka, chári p'ímutantskua jimbo chéparini ka xéparini jáma je,

¹³jimbokaksïni Diósïsï p'ikuastaka ka cha uékani sési ambe úni, ka imaksïnisï p'ikuarhenhetaati nénajtsï jáma,

¹⁴Iámendu ambe pínasku ka sési u je, nóma uandaparini,

¹⁵ka nónanijtsï no jaiapanhanheantaka, ka jima enga xáni nósesi irekanhanka, ka no kurhandiranhani, chájtsï jima meremerejkuaka eska t'íntskua parhakpenirhu anapu jimbokajtsï cha Diósï uájpeska,

¹⁶ka uandakua tsípekuerijtsï uandantapari. Ka jiáni enga Krístu junguaka, ji ísï k'éramakorheni chánksïni jimbo mítetini eskani no ískusïni incharhetakuka jini ka jini nirani ánchekorheni.

¹⁷Ka náuejkini ji jamberi uándikunhani imani kéjtsitakua nóna andangutani enga cha jakajkukua jimbo aiátspentajka, ji tsípekua jinguni uarhiaka ka cha jinguni aiákorhentaaka.

¹⁸Chájtuchka tsípe je, ka ju je márku tsípeni.

¹⁹Acha Jesusini mintsikaxaka eskaksïni úaka sóntku Timoteoni axacheni, ka jíjtuni tsípentani ka sési p'ikuerherantani chári ambe kurharini ka mítetini,

²⁰jimboka nónema jarhaska máteru nema ixu, enga chánksïni jimbo xásï p'ikuarhenhekua kámaaka ka uandanheani chari sési jakua jimbo,

²¹iámenduechaksï jínisï sési jakua jirinhakorhentajti, ka nóksï Jesukristueri ambe jirinhantani.

²²K'órujtsï cha Timoteoni míteskia, na enga sési kurhandirajka, jimbokarini jucheti uátsïtini chúxapuska ambakiti aiangperakua uandantani.

²³Ka ísï mintsikaxaka imanksïni axacheni, engani jamberi míteaka nénasï pakara jucheti ambe,

²⁴nájkirukani Acha Diósïni mintsikani jaka eskani úaka ji sóntkuni nitsikorheni.

²⁵Nájkiruka uétarheaka erachi Epafroditunksïni axachentani, jucheti pámpiri ka jarhojpiri engani ji uétarhenchani jápka, chájtsïni axachespka eskarini jarhuatapiringa.

²⁶Imaksïni jirinhantaxati ka uandanheaxati, mítetini eskajtsï cha inderi p'amenchakuani míteskia.

²⁷Ísïspti p'amenchaxapti ka uinhamu jarhaspti ka jamberi uarhixaptia. K'óru Diósï p'amojkusti imani, ka no imantku jíndenturini p'amojkusti, eskani ji no sánderu mískorhepiringa.

²⁸Jimbochkaksïnisï kókuani axachentani jaka, eska cha tsípeaka erontatini ka ji jámberi nóteru xáni uandanheani jauakia.

²⁹Tsípekua jinguni ka Achani jinguni erontsï je, ka sési arhi je, ka sési arhia je indeni jarhati achetichani,

³⁰jimboka ima Krístuni jimbo sáno uarhiska, ka íntskukorhentaspti chánksïni jimbo jíndeni marhoacheni ka sano uarhispti, jimbokajtsï cha no ixu jarhaspka.