Read Western Highland Purepecha Colosenses 1 Bible Online

Colosenses 1 - Western Highland Purepecha bible

Colosenses 1

¹Diósï, Pábluni kóndesti Jesukristuni uandakua pákuni jámani, ka iásï Timoteu jinguni

²Kolosasi anapu jakajkutichani uandajpaxatiksï, chánksïni engajtsï Krístuni jakajkukia ka mintsikantsïa. Diósï juchari Táteksïni sési jakua kóndente.

³Ji juchari Acha Jesukristueri tátjembani kánekua diósïmaiamu arhisïnga chánksïni jimbo engajtsï uandamukukorheni jarhajka,

⁴jimbokachi kurhaska eskajtsï Jesukristuni mintsikaskia ka eskajtsï jakajkutichani xénhchaxaka.

⁵Jimbokajtsï kurhanguskia eska ambakiti aiangperakua auandarhu anapu maiamperakueri ambe jurhentpesïnga,

⁶chájtsï kurhanguskia ka iápuru isïjtu mítepanhaxati, ka etsakorhepaxati. Ka ísï jánhastpepaxati eskaksïni chánksïni na jánhastapka jíani uénani engajtsï Diósïri kóntperakueri ambe kurhapka,

⁷engaksïni juchari pámpiri Epafrasi jurhendapka, sési mintsika je jimboka ima Krístueri jarhojpiriska.

⁸Imajtsïni aianguntasti eskajtsï Espiritu jimbo xénhchperaxaka.

⁹Juchachkani kurhaska ka jiáni uératinksïni kómarhijpechexaka eskajtsï mintsita jinguni iámu jánhaskaaka ambe enga Acha uéjka;

¹⁰ka eskajtsï jámaaka eska néka ima jinguni jámani; ka eska ima jaiapanhentaaka chári ambe; ka eskajtsï ambakiti úkuechani úani jauakia; ka eskajtsï Diósïri ambe sánderu mítepani jauakateru;

¹¹ka eskaksïni ima uinhaperantaaka. Jimboka ima kánekua uinhapekua jatsiska ka jarhuatatiksïni tsípentani ekajtsï uándanheata ambe tekantani jáuaka,

¹²ka Diósïntsï k'éri ambe arhiaka, engajtsïni t'íntskua kóndentaka engaksï uájpecha míndakata jatsika.

¹³Nóterujtsïni p'ájpakandekua juramuchexatiia, Uájperi irechekuarhujtsïni irestantastia, Uájpa jinguni enga xáni xénhchajka,

¹⁴ima jimbochi p'ímutantskata jarhaskia ka k'amanharhintskuechanchi púamenhantaskia.

¹⁵Diósïni nónema úsïndi exeni, Krístu jimbo xarharasti jimboka ima urhejtsïkuska iámendu kuerakata ambeni,

¹⁶ka iámendu ambe imani jimbo kueranhasti, enga auandarhu jaka ka echerindu, enga xarharka ka no xarharani, ka ístu espiritu uinhapiticha engaksï juramutspejka. Imeristi iámendu ambe jimboka ima jimbo kueranhaska.

¹⁷Ima t'uíni jarhasptia enga nótki ambe ma jápka, ka iámendu ambeni juramukuxati.

¹⁸Ka tángorhekuajtu imeristi jimbosï juramukujti. Ima urhejtskpiristi, ima urheta tsíntasti ka iámendu ambeni urhejtsïkuxati,

¹⁹iámendu uinhapekuani ima p'itixati,

²⁰ka Diósï imani jimbo iámu ambe andarhetakorhentaxati, enga xáni echerindu jaka ka enga xáni eranchekorheka, ka imani jimbo sési uandajpentaxati iurhiri jimbo enga krúsirhu tsîtapka.

²¹Ka chánksïni engajtsï urhetku jarharetini jápka ka ikiatspirintsï, engajtsï nósesi eratsempka ka nósesijtsï jámani,

²²iásïksïni imeri uarhikua jimbo sési uandajpantaxati, jimboka ima k'uiripu méni irekaspka, sésiksïni jájkuntasti ka nóma kántsperata jingunksïni andarhetakorhentaxati.

²³Uétarhisïndi k'óru eskajtsï uinhamu mintsikaaka, ásï mirikurhi je ambejtsïsï piua ambakiti aiangperakua jimbo. I ambesï iápuru isï uandanhantani jati ka jíjtuni jarhopexaka uandantani.

²⁴Iásï tsípentasïnga engani cha jimbo nósesi p'ikuastanhani jaka, jimboka tángorhekua Krístueri anhanhatakueska ka ji p'íntaxaka chári uandanheatechani.

²⁵Ji axanhaska tángorhekuani marhuakuni, Diósïrini cha jinguni axasti imeri uandakuani jánhastataranksïni.

²⁶Indeni ambe enga xáni ióni nónema jánhaskempka, iásï kurhangutarpeni uandajpentaxati.

²⁷Diósï uékasti eska i xáni ambakiti jurhengorhekua iápuru isï mítenhaaka. Eska Krístu cha jinguni jarhaska, ka eskaksïni t'íntskua kóndentaaka.

²⁸Jucha imeri ambe uandantani jámsïnga, mímixekua jinguni arhistakuaparini ka jurhendaaparini, uéksïngachi eskaksï iámenduecha Krístuni sési kurhangukuaka.

²⁹Imarini uinhaperantaxati jimbosïni incharhetakuntani jaka ánchekorheni.