Read Western Highland Purepecha Colosenses 2 Bible Online

Colosenses 2 - Western Highland Purepecha bible

Colosenses 2

¹Uéksïnga eskajtsï míteaka eskani cha jimbo uinhamusïni jángorhekuntani jaka, ka Laodisea anapuechani jimbojtu ísï, ka imechani jimbojtu ísï engajtsïni no méni exerika,

²uéksïnga eskajtsï karhoanhantaaka, ka eskajtsï méntkisï sési xénhchperaaka, ka ísï jámantsï Krístuni sési kurhanguaka, ísï eska Diósï na eratsetini jápka,

³iámendu mímixekua ka jurhengorhengua ima jatsirixati.

⁴Ásïksïni nema churichurimeparini tandonhaste, jimboksïnisï sési arhistacheni jaka,

⁵nájkirukani no cha jinguni jaka, p'ikuarhenhexaka cha jinguni jarhani ka tsípeni jarhani exeparini eskajtsï sési jámaxaka ka eskajtsï Krístuni sési mintsikaxaka.

⁶Ekajtsï jiókorhekia eskaksïni Acha Jesukristu juramucheaka, janhanharhichka je,

⁷sési kurhanguku je, iámu kúrhetini ka iámu mintsikatini, ísï eskajtsï na jurhendanhaka, ka diósïmaiamu arhiparini.

⁸Ásïksïni nema sési eranhastaparini tandonhaste, k'uiripueri p'indekua ambenksï uinhajtsïtaxati ka nóksï Krístuni chúxapasïndi engaksï parhakpeni anapu uinhapekuechani chúxapajka.

⁹Jimboka Diósïri uinhapekua Krístu jinguni iámu jarhaska,

¹⁰ima jinguntsï nómbe ma kueratanchaxaka jimboka ima juramukuxaka náki uéjki juramutini ka terujtsïkurini.

¹¹Ka ima jimbojtsï mínda jukarixaka, nóksïni máteru nema jatsikusti, Krístueri míndesti enga k'amanharhintskua únhchakuani kénditatspejka.

¹²Engajtsï itsï atajtsïkua jimbo ima jinguni jatsinhantapka, ka ima jinguntujsï tsítanhantaska engajtsï mintsikaka eska Diósïri uinhapekua tsítantaska.

¹³Chájtsï urhetku uarhirixapka k'amanharhiskua jimbo ka nósesi únhchakua jimbo, ka iásï ima jingunksïni tsípekua íntskusti ka iámendu k'amanharhintskuechanksïni púacheantaasti.

¹⁴Juramukata jimbochi kánekuasï kántspeni jápka, ima krúsirhu cháparhasti ka jima k'amajkusti juchari kántsperatani.

¹⁵Ka juramutichani ka nósesi jarhati uinhapekuechani késkuantaasti ka antsikupaani jiáni enga Krístu uanajtsïkuntapka andarinia.

¹⁶Jimajkani ásïksïni nema arhinhche t'irekua o itsïmakua ambe jimbo o k'uínchekua erontskua ambe jimbo o nana kutsï ambe jimbo o sábadu jurhiatekua jimbo.

¹⁷Inde ambe jimbosï erokorhenhani jarhajti ambe ma, ka Krístu k'óru ambantku xarharasti.

¹⁸Ásïksïni nema tandonhaste, náuejkiksï kaxumbiti arhikorheni o ánjelichanksï uandani k'éri ambe arhiani, ískuksïsï exeni uandajti ka teparakorhesïndiksï xántkisï eratseparini,

¹⁹nóksï Krístuni kurhandirakusïndi, jimboka ima iámu anhanhatakuani sési k'uiriperasïnga ka uinhaperantani, ísï eska Diósï na uéjka.

²⁰Ekajtsï Krístu jinguni uarhikia, nóterujtsï parhakpeni anapu uinhapekuechani kurhandirakuakia, ¿Andiksïnisï uandanheatani jarhajki? Parhakpeni jángua ambe enga arhijpejka:

²¹“Ásï p'árhe íni”, “Ásï a indeni”, “Ásï ts'ému amani”.

²²Inde ambe k'uiripueri arhistatsperakuesti enga no ióni jimbo miripakurhinhajka.

²³Sési arhijpeni jarhasïndi engaksï sési niántani miátarpentajka ka eska kaxumbenhantaaka ka eska no xáni jurajkutakorhenhaaka, k'óruksï no úsïndi arhistatspeni enga tsitikua ambe jarhajka.