Read Western Highland Purepecha 1 Tesalonicenses 2 Bible Online

1 Tesalonicenses 2 - Western Highland Purepecha bible

1 Tesalonicenses 2

¹Erachicha, chájtsï mítetixaka eskaksïni jucha no ískusï p'urhembeka.

²Ka eskajtsï na míteka eskachi Filipusï nósesi kánhaska ka jamberichi atanhani; Ka Diósïjtsïni jarhuatasti eskaksïni úpiringa chánksïni uinhandirakua jinguni Diósïri uandakuani aianguni, náuejki xáni no jiókorhenhani jápka.

³Jimboka ima ambe engaksïni arhika, no ísku ambemeska, ka jimboka no nósesi jásï ambeska ka nójtuchi tándojchpexamempka.

⁴Sánderu sáni Diósïjtsïni jaiapanhentasti ambakiti aiangpekuani aiangpentani, ka ísïchi uandaska, no jimbokachi sési p'ikuastpeni uékapiringa, sánderu sánichi Diósïnisï uéjka sési p'ikuastani, engajtsïni mitsitani execheni jarhajka.

⁵Eskajtsï na mítetini jaka; nómeniksïni sési jándirachentaska óksïni ambe ma arhini engajtsïni tumina andarapiringa. Diósï indeni ambe mítetixati.

⁶Nóchi méni uékaska eskajtsïni cha o máteru nema k'éri ambeni exeaka.

⁷Sánderu sániksïni sapini kámaska, méntkueni eska nema enga sapichani exekorheani jarhajka.

⁸Xániksïni xénhchasïnga, jimboksïnisï no Diósïri Uandakuantku uékapiringa jurhendani; uékapiringaksïni juchari tsípekua jamberi íntskuni, jimbokaksïni iásï jamberi kánekuamendu xénhchasïngaia.

⁹Erachicha, chájtsï miáxaka na engachi xáni ánchekorhempka ka na engachi xáni kuatarempka nóna nitamakorheni. Chúrekua ka jurhiakuachi ánchekorhesïrempka, nóchi uékani cha nemani ójkutani engaksïni Diósïri jimbanhe uandantskuani jurhendani jápka.

¹⁰Chájtsïni exekorheriska, ka Diósïjtujtsïni exekorheristi, eskachi cha jinguni, méntkisï kaxumbeska, ka eskachi jurhimbitku jámaska engachi jamberi nómbema arhikua jukaka.

¹¹Ístu, eskajtsï na mítetini jaka, eskaksïni na kámempka chánksïni; p'ínguni ka sési arhintani eska ambe jucha chári táteni,

¹²ka juchaksïni sési arhisïrempka ka p'imarheni eska cha ísï jámani japiringa eska Diósï na uéjka, ima engaksïni imeri juramukuarhu uandajpantka ka engaksïni imeri k'érikuarhu uandajpajka.

¹³Jimbosïni juchari jimbo, Diósïni méntku diósïmaiamu arhintani jarhajka, jimboka enga cha Diósïri uandakuani kurhaka; engaksïni jucha aianguka, chájtsï Diósïri uandakuani no ísï p'iraska eska parhakpeni anapu uandakueni. Ka chájtsï sési p'iraska eska na Diósïri uandakueka, enga chári irekuarhu sési ambe xarhatani jaka, engajtsï jakajkutika.

¹⁴Jimbokajtsï chájtu erachicha, méntkuentsï jámaska eskaksï Judea anapuecha, engaksï Diósïni Jesukristuni jimbo jakajkujka; jimbokaksïni chánksïni méntkueni chári iretarhu anapuecha nósesi kámaska eskaksï imechani judiouecha na káaka.

¹⁵Ima engaksï Acha Jesusini ataka uándikuni ka engaksï máteru imecheri Diósïri uandarichani ataaka uandikuaani ka engajtsïni juchantsïni petaataka. Nóksï jaiapanhentasïndi Diósïni ka nónemaniksï ambe ma jaiapanhekuntasïndi,

¹⁶ka engachi uékani jarhajka uandaxekuani imechani engaksï no judioueka, uékaparini eskaksï imajtu p'ímutanhantaaka, nójtsïni jiáretasïndi; ísïksï jámani andangutakorhesïndi ka jámberi tsîmerani k'amanharhintskua, ka jimboksïsï xáni uinhamu ikimenhaati.

¹⁷Erachicha, engani namoni jurhia no cha jinguni jaka, náuejkiksïni no exeni jápka, méntkuksïni mintsitarhu kámaxapka ka kánekuaksïni ninhejchani jarhasïrempka exentani.

¹⁸Mémechani uéntaska jukuekani; jíchkania, Páblu, enga úka Nóambakitijtsïni no jiángusti.

¹⁹Néchka máteru nemaia andi, enga no cha enga juchari mintsikueka ka juchari tsípekueni ka juchari kanakueni imani jurhia enga juchari Acha Diósï k'uanhatseaka, nónemateru.

²⁰Jóchka, ekajtsï no jakajkujka, chájtsï juchari k'érikueska ka juchari tsípekueni.