Read Western Highland Purepecha 1 Tesalonicenses 4 Bible Online

1 Tesalonicenses 4 - Western Highland Purepecha bible

1 Tesalonicenses 4

¹Ka iásï erachicha, Acha Jesusini jimboksïni arini ambe kómarhixaka ka kurhacheniksïni: Eskajtsï sánhani arhiaka sánderu sési jámani, isï eskajtsïni juchantsïni na exekia, eska Diósï tsípeni jauaka ísï eskajtsï na jámani jakaia.

²Míteskajtsïa engaksïni Acha Jesusiri jimbo xáni ambe arhistacheka.

³Diósï ísïsï uéjti eskajtsï kaxumbeaka, eska nónema ísku jándi úkorheaka,

⁴ka eska táchani ísï jurhenaaka p'íngukorhenhani, janhanharhikua ka kaxumbekua jinguni,

⁵no ísku ikichakueni jásï xénhchperakua jimbojku eskaksï na jámka ima engaksï no jakajkutika.

⁶Ísku jánguarhu ásï nema tandosï úe máteru nemani, jimboka Acha indeni ambe uinhamu ikimpesïnga, eskaksïni na ióni ísï arhirikia,

⁷jimbokajtsïni Diósï no ísku jándinisï uandajpantaka, kaxumbiti úntanijtsïnisï uandajpantati.

⁸Ísï jimbo ne enga íni jásï jurhengauani no jiókorhejka; no máteru nemanisï no jiókorheni jati, Diósïnisï no jiókorhejti, imani engaksïni Espiritu Sántuni íntskuka.

⁹Erachicha, xénhchperateri ambeksïni no uétarhesïndi eskaksïni karacheaka, jimbokaksïni Diósï jurhendakorheska néna xénhchperani.

¹⁰Jimbokajtsï iámendu erachi Masedonia anapuechani jinguni ísï jámasïngia, enga úka, erachicha kómarhixaksïni eskajtsï sánderu útasï xénhchpeaka.

¹¹Jángorhentsï je sési irekani ka ánchekorheparini ambe enga cha jurhenaka úni, eskaksïni na arhikia

¹²eskaksïni ísï jámani uérakuecha janhanharhiaka ka eskajtsï nómbema kueratanchaaka.

¹³Nóchi uékasïnga eskajtsï no mítetini jauaka uarhirichaksï néna nirasïni, ísï jámanijtsï no mískorheaka eskaksï ima máruteruecha engaksï nómbema mintsikajka.

¹⁴Májkueni eskachi na jakajkujka eska Jesusi uarhiska ka ménderu tsíntani, májkuenichi jakajkusïnga eska Diósï uarhirichani Jesusini jinguni márku tsítantauaka imechani engaksï ísï uarhika Jesusini mintsikaparini.

¹⁵Jimboksïnisï arhini jaka, ísï eska Acheri jurhengua na arhijka eskachi jucha engachi nótki uarhini jauaka jiájkani jamberi enga Acha junguaaka, nóchi urhekupauaka imechani engaksï uarhikia.

¹⁶Jimboka juramukua ma jarhamekua jinguni kurhaakorheaka, Acha ánjelicheri juramuti ma, ánjeli ma enga k'érikuarhu uératini juuaka ka Diósïri kústakua kúskaati, ka Acha jutsïkorheati, ka imaksï urheta tsíntaati engaksï Krístuni mintsïkaparini uarhika.

¹⁷Tátsekua jucha engachi tsípiti pakaraska, juchajtuchi imecha jinguni janikuarhu pánhaaka eskachi Acha jinguni tarhiatarhu kúperaaka; ka ísï jámanichi méntkisï Acha jinguni jauaka.

¹⁸Íni uandakuechani jimbo uinhaperajpera je.