Read Western Highland Purepecha 1 Tesalonicenses 5 Bible Online

1 Tesalonicenses 5 - Western Highland Purepecha bible

1 Tesalonicenses 5

¹No uétarhesïndi eskaksïni karacheaka na jatini ísï úkorhea.

²Chájtsï sési mítetixaka eska Acha jiájkani junguaaka enga cha sánderu no erontani jauaka, eska sïpajkurha enga chúrekua janojka.

³Enga uandanhaaka: Iámu ambe ka iámendu ambe sési janhasti, jiájkani janokuauati, eska uarhitini ma enga sapi kángorheni jámaaka, ka nóksï úati sïpakorhekuni.

⁴Enga úka, chájtsï no pájpakandu jarhaska, nóksïni úati sïpajkurheni p'iárani.

⁵Iámendu chájtsï jurhiakueri t'ímarhandekueska; nóchi chúrekueriska nichi pájpakandekueri.

⁶Jimbochisï no k'uíni jauaka eskaksï máruteruecha, sánderu sánichi tsínharhitini jauaka ka sési ambonhaskatini.

⁷Ima engaksï k'uíjka, chúrekuaksï k'uísïndi ka ima engaksï kauijka, chúrekuaksï kauisïndi

⁸enga úka, jucha engachi jurhiakua jámka, uétarhesïndi eskachi sési ambonhaskatini jámani jauaka. Uétarhesïndi eskachi jinguntku jauaka ka xukuparhantatini, ambema jukajtsïntatini, ka mintsikaparini eskachi p'íjpanhantaaka.

⁹Jimbokajtsïni Diósï no erakuska juchantsïni eskachi ikiamenhaaka, sánderu sántsïni erakusti eskachi Acha Jesukristueri jimbo p'íjpanhantaaka.

¹⁰Jesukristu jucha jimbo uarhisti, eskachi ísï jámani jucha p'íjpanhantaaka, ekachi uarhirini jarhajka o ekachi útasï ima jinguni tsípiti jámani jarhajka.

¹¹Jimbo, uinhaperperantsï je, ísï eskajtsï na jámani jakaia.

¹²Erachicha, kómu arhixaksïni eskajtsï janhanharhiauaka imechani engaksï cha jinguni ánchekorheni jaka ka engaksïni Acheri úkuarhu urhechepani jaka ka engaksïni xukani jaka.

¹³Uétarhesïndi eskajtsï sési káuaka ka eskajtsï xénhchauaka, jimbokaksï uánekua ambe úxaka. Ka sési arhijperaparini ireka je.

¹⁴Arhixakajtuksïni erachicha, eskajtsï xukaauaka xépitichani, ka eskajtsï uinhaperantauaka imechani engaksï no káni sési jámani jaka, ka eskajtsï jarhuatauaka imechani engaksï no káni uinhapekorhejka, ka eskajtsï iámenduechani tekaakuantauaka.

¹⁵Exejperani ja je eskajtsï no jámaaka nósesi útsperantani, enga nema nósesi útspeska. Sánderu sáni jángorhe je méntkisï sési ambe úni, cha sési arhijpera je iámenduecha jinguni.

¹⁶Méntkisï tsípeni ja je.

¹⁷Méntku uandamukukorheni ja je.

¹⁸Diósïni iámendu ambe jimbo diósïmaiamu arhintsï je, jimboka ima ísï uékasïnga eskajtsï cha jámaaka engajtsï Jesukristuni jakajkujka.

¹⁹Ásï jiáreta je eska Espritueri chpíri párhuaka.

²⁰Diósïri uandakuechani ásï no jiókorhea je.

²¹Iámendu ambe urheta erarhentsï je, ka ambakiti ambe patsakorhe je.

²²Iámendu nósesi jásï ambeni kéndikuku je.

²³Eskaksïni Diósï, enga sési jakueri Diósïka, eskaksïni ima iámumendu kaxumerantaaka, ka eskaksïni iámu sési jatsiaka, eska iámu chári espiritu ka álma sési jauaka, ka eskajtsï iámu cha sési jámani jauaka, eskajtsï nómbema arhikua jukaaka, jiájkani enga Acha Jesukristu janonguaaka.

²⁴Ima esgaksïni uandajpani jaka no jurajkpitisti ka iámu ambe ísï úati eskaksïni xáni arhini jaka.

²⁵Erachicha, juchantsïntujtsïni Diósïni arhiche je sáni.

²⁶Kaxumbitku putinharhikperakua ma jimbochi uandakua axakuaaxaka, iámendu erachichanichi kurhangorheaxaka.

²⁷Acheri juramukua jimboksïni arhixaka eskajtsï íni karakatani iámendu erachichani arhikuantauaka.

²⁸Ka eskaksïni juchari Acha Jesukristu kánekua kóntperata axacheaka.