Read Western Highland Purepecha 2 Tesalonicenses 2 Bible Online

2 Tesalonicenses 2 - Western Highland Purepecha bible

2 Tesalonicenses 2

¹Erachicha, kómarhixaksïni eskajtsï juchari Acha Jesukristueri junguakua jimbo, ka imani jimbo engachi exejperantaaka imani jinguni.

²Indeni ambe jimbo, ásï jáma je chári eratsekua sóntku mójtakuni, ásïjtu jáma je támu jánhaskani, ni nemeri espiritu jimbo, ni uandakua jimbo, níjtu karakata jimbo, ásï jakajkuku je engaksïni arhijka eskani jucha ísï karaska.

³Ásïksïni nema tandojche; jimboka ima nótki junguani jauaka, engaksï no urheta Diósïni jinguni uarhiperani uékaaka, ka inde no úkorheati enga no urheta xarharaaka nósesi jásï uájpa, ima enga andakorhetini jakaia eska tsînchekorheaka.

⁴Ima enga atarhukujka ka uarhipeni iámendu ambe jinguni enga xáni Diósïri ambeka, ka iámendu imani ambeni no xénhchani enga jakajkutarakueka, kánekua nósesi jámaati ka jamberi Diósïri tióstarhu uaxandikuati diósï eratakorheni.

⁵¿Andi nójtsï miásïnki? Engani ji útasï cha jinguni jámani jápka, jíksïni indeni ambe arhisïrempkia.

⁶Ka chájtsï mítetixaka embe enga p'ínguni jaka, eska jiájkani xarhatakorheaka enga jurhiata niáraaka.

⁷Jimbokaksï axanhaskia no p'amojkpekueri ánchekorhericha. Imaterkusï kénditanhaatia enga terujkani jatini p'ínguni jaka

⁸jiájkani xarharaati ima nósesi jasï, imani enga Acha Jesusi jirejtakua jimbojku k'amajkuaka ka enga iámu chkéraaka imani jimbo enga junguaka.

⁹Imani nósesi jásïni, Nóambakiti jarhuataati; kánekua juramukua jinguni janoati, ka uánekua ambe xárhataati ka milagrueni jásï ambe xárhatauati.

¹⁰Ka iámendu nósesi ambe úraati nóna tandojchaani imechani engaksï no xénhchaka imani enga ísïka, engaksï jimbo p'íjpanhantapiringa.

¹¹Jimbosï Diósï, juramukua tandojchpiri ma axakuajti, eskaksï ísï jámani chkuándirakuani jakajkukuaka.

¹²Eskaksï ísï jámani arhinharhikunhaaka ima engaksï no uékaka jakajkuni imani enga ísïka, ka engaksï tsípekorhejka nósesi ambe niátani.

¹³Enga úka, jucha jatsiska chánksïni jimbo, méntku Diósïni diósmaiamu arhintani jarhani. Erachicha, Diósïksïni xénhchasïndi, jimbokaksïni erakuska eska cha urheta p'íjpanhantaaka, Espiritu ka imani jimbo enga ísïka ka engaksïni kaxumberantajka ka engajtsï jakajkuka.

¹⁴Diósïksïni indeni úranisï uandajpati ambakiti aiangperakua jimbo, engaksïni jucha aianguka: Eskajtsï ísï jámani úaka Acha Jesukristuni jinguni niántani imeri k'érikuarhu.

¹⁵Ísï jimbo, erachicha, sánderu sési anhaxurhikorhe je, ka ásï mirikurhi je p'indekuechani engaksïni jucha jurhendakorheka ka engaksïni karakata jimbo jurhendani jaka.

¹⁶Eska Acha Jesukristu ka juchari Diósï Táte, engajtsïni xénhchaka, ka engajtsïni méntkisï anapu sési p'ikuarherakua íntskuka, ka engajtsïni imeri p'amojkperakua jimbo aiacheka eskachi erokorheni jauaka,

¹⁷eskaksïni ima mintsitechani uinhaperacheauaka, ka eskaksïni sési anhaxustatini jatsiaka eskajtsï méntkisï sési ambe úaka ka uandani.