Read Western Highland Purepecha 2 Tesalonicenses 3 Bible Online

2 Tesalonicenses 3 - Western Highland Purepecha bible

2 Tesalonicenses 3

¹K'amarhuni jámani, erachicha, sáni juchantsïni jimbojtu uandamukukorhe je, ka eska ísï jámani Acheri Uandakua sánderu etsakurhiaka ka eska sánderu k'érikuarhu niáraaka, ísï eskaksïni chánksïni na niáracheka,

²ka eskajtsïni kuájpeaka, nójtsïni ísku jándicha ka nósesi ambe niátaticha ambema úcheni; jimboka jakajkukua no iámenduecheriska.

³Acha no méni jurajkpiristi; imajtsïni uinhaperaati ka exentsïni jarhani eskajtsïni Nóambakiti nómbema úcheaka.

⁴Juchaksïni chánksïni nósani chéjkusïnga eskajtsï ísï jámka, ka eskaterujtsï ísï jámaaka eskaksïni na juramucheni jaka.

⁵Eska Acha urhekupaaka chári p'ikuarhenhekua Diósïri xénhchperatani andarherani ka Krístueri tekaantskua jurhengorheni.

⁶Erachicha, Acha Jesukristueri juramukua jimboksïni arhixaka eskajtsï jarhareauaka imechani engaksï nónanimaru irekorheni jaka, ka engaksï no ísï irekani jaka eskajtsï cha juchantsïni jinguni na jurhengorheka.

⁷Míteskajtsïa néna enga uétarhejka eskajtsïni eranhekua p'itacheni jauaka, jimboka, jucha, engachi cha jinguni jámani jápka, nóksïni méni xépekua xarhatacheska,

⁸ka nójtuchi méni némani ambe euamukuska, sánderu sánichi chúrekua ka jurhiakua no kuatantaska ánchekorheni ka ísï jámanichi nónemani chánksïni ójkutaska.

⁹No jimbokachi no andakorhetini jatsipka, sánderu sániksïni, chánksïni exeranisï ísï jámapka, eska chájtu ísï jámaaka.

¹⁰Ka támu, jiájkani engachi cha jinguni jámani jápka juramuchespkaksïni eska, enga ambe nema no uéjka ánchekorheni, ásï t'ire.

¹¹Jimbokachi aiangunhaska eskaksï máru, jimini nónanimaru irekaxaka, eskaksï no ánchekorhesïnga, sánderuksïnha arhisïndi máteruechani inchaakukuani.

¹²Imechanichi, Acha Jesukristuni jimbo arhiaxaka eskaksï jángorheaka ánchekorheni, ka táchani ísï t'irekua andakorhenhe.

¹³Iáchka je erachicha, ásï jáma je kuatantani sési ambe niátani.

¹⁴Eka nema no kurhandirajka eskaksïni na juramucheni jaka íni karakatarhu, k'uratseta je, ka ísku xe je, jurajku k'uratsetakorheni.

¹⁵K'óru ásï juchari ikiatspirini exe je; sánderu sáni ísï xuka je eska juchari erachi nemeni.

¹⁶Eskaksïni Acha sési jakueri, íntskuaka méntkisï ka iápuru ísï sési jakua. Eska Acha cha jinguni jauaka.

¹⁷Uandajperataksïni jucheti jájki jimbosï axacheni jaka, ji Páblu. Iámendu karakatecharhu engani axaajka ísï ts'ïrimerasïnga.

¹⁸Ka eskaksïni Acha Jesukristu kóndeni jauaka.