Read Western Highland Purepecha 1 Timoteo 5 Bible Online

1 Timoteo 5 - Western Highland Purepecha bible

1 Timoteo 5

¹Ásï xukaa tata k'eratichani, jinirisï arhistakuauaka, ísï eskari na arhistakupiringa chéti táteni. Ka tumbichani ísï kaa eskari na kámapiringa chéti erachechani.

²Ka Nana k'eratichani chéti nándeni káua ka uáchechantu májkueni eskari na kámapiringa chéti pirenchitichani.

³Jarhuata tsîndichani, imani engaksï nóteru nemani kángorhejkia.

⁴K'óru enga tsîndi ma uájpechani o nimakuechani kángorheajka, imaksïsï urheta uénaati tsîndini jarhuataati urheta imecho uéne sési úni ambe, ka xénhchani tátjembani ka amambani. Ísï eskaksï ima na xénhchaaka t'arhexeraani jámani, Diósï ísïsï jaiapanhentajti.

⁵K'óru tsîndi ma enga nónemanderu jatsikorhekia, Diósïnderkusï mintsiktia, kómarhiparini mándani pauani, chúrekua ka jurhiakua.

⁶Ka ima tsîndi enga ísku jándinhchajka, isïsti eska uarhirini irekani jarhani.

⁷Ísï jimbo, juramukua eskaksï íni ambejtu ísï úaka, ka nómbe máksï arhikua jukaati.

⁸Eka néma no xéauaka imecho anapuechani, jakajkukuani no jiókorhesïndi ka sánderu nósesi jasïsti eska no jakajkuti ma.

⁹Ima tsîndichajkuksïsï karakorheati engaksï jukari tanimu ekuatse uexurhini jatirikia ka ma xanharkuksï uambuchatini.

¹⁰Ka engaksï sési jásï k'uiripueni mítekateuaka ka engaksï uájpechantu sési t'arhexeraaka, ka engaksï chéni jémbo tsípekua jinguni eropepka, ka engaksï jarhuatapka jakajkutichani ka ístu imechani engaksï kómu nitamakorheni jápka, eskaksï méntku ísï sési ambe niátatiuaka.

¹¹K'óru ásï jáma tsîndi sapirhatichani karaani, jimbokaksï ima no úaka p'íngukorheni ka ménderuksï uambuchantskuekaati ka ísï jámanksï jarharhesïndi Jesukristuni.

¹²Imaksï ísï úrini no úxati ambe engaksï aiakorhetini jápka.

¹³Ka támuksï ísku jini ka jini jámasïndi inchatspeparini ka ísku ambeksï arhiparhatasïndi nemani ka iápuru ísïksï uékani inchaakurhani ka iámuksï xépiti úkorhesïndi.

¹⁴Jimbosïni uéjka eskaksï tsîndi sapirhaticha uambuchantaaka, ka eskaksï sapichani káuaka ka irekorhentani ka ísï nónema ambe arhiparhatauati.

¹⁵Máruksï no kurhandirasti ka tsînchestiksïa ka nóambakitinksï chúxapasti.

¹⁶Eka uarhiti jakajkutio tsîndi ma jaka, jiájkani jarhuata ambe kéndani, ka ísï jamani tiósïo úati máteruechani jarhuataani engaksï jandioterkuekia.

¹⁷Tatechani engaksï sési juramuni jaka tiósïo, kánekua sési arhia je, ka sánderu imechani engaksï jángorhentajka sési jurhentpeni ka arhijtsïkpeni.

¹⁸Jimboka karakata arhisïnga: “Ásï jatsimuku sutumukua tekechuni enga triju t'auani jauaka” ka máteru arhisïndi: “Ánchekorheri ma andakorhesïndi maiamukua”.

¹⁹Ásï jáma jakajkuni eka nema tata k'éri urhejtsïkurini ambe arhiparhataaka, jiánirisï jakajkuaka engaksï tsimani o tanimu májkueni uandakuntaaka.

²⁰Imechani engaksï útasï kamanharhintani jaka, kuiripu japarini xukaa, ka ísïksï máteruecha chéati.

²¹Diósï ka Jesukristuni ka ánjelicha japarinkini kómarhixaka, eskari sési marhuatauaka íni juramukuechani.

²²Ásï jáma ísku nemani újchakurani, sési eratsentsï urheta, jimbokari t'ú jamberi jukanchaaka máteru nemeri k'amanharhiskuechani, p'ínpinhasï ja méntku ísï.

²³Ka ekari méni sóntku jatini p'amearhani jaka, ásï itsïterku aía, úberi ísïrhukuajtu a sáni.

²⁴Máruksï ambantku xarhatakorhesïndi k'amanharhintskuechani, nájtukaksï nótku arhinharhikunhani jauaka, ka máruksï tátsekua xémenhantasïndi.

²⁵Sési úkuechaksï ambantku xarharasïndi; ka nósesi ambe no úati méntkisï jískakata jarhani.