Read Western Highland Purepecha Filemón 1 Bible Online

Filemón 1 - Western Highland Purepecha bible

Filemón 1

¹Jucheti pámpiri Filemoni, jucha Páblu ka Timoteo íni karakata jimbo uandajperakuaksïni axachesïnga. Ji Jesukristuni jimbo k'atakata jarhaska.

²Ístuni uandajperakua axakuasïnga nana Apiani ka tata Arkipuni, juchari pámbetpiri, ka ístu iámendu engasï Diósïni mintsikani jaka engaksï chénio tángorhejka.

³Diósï juchari Táte ka Acha Jesukristuksïni íntskue sési jakua ka sésiksïni p'ikuaste.

⁴Méntkisï engani uandamukukorheni jarhajka ka míjpanikini, Diósïni t'úngeni jimbo diósïmaiamu arhintasïnga.

⁵Jimbokani kurhachpeska eskari Acha Jesukristuni kánekua mintsikasïnga ka imeri jakajkutichanturi kánekua xénhchaasïnga, ka ísturi xénhchaasïnga iámenduechani engaksï Diósïni andarhentaka.

⁶Engari xáni jakajkuni jaka eska marhuatspeaka ka eska iámendu sési ambe xarharaaka engachi jucha Krístuni jimbo jatsikorheka.

⁷Jucheti pámpiri, kánekua tsípexaka, jimbokari Diósïrichani chéti xénhchperata jimbo mintsita uinhaperakuntaaska.

⁸Ísï jimbo, nájkirukakini Krístueri sésikua jimbo úaka juramucheni ambe engari úaka,

⁹jíkini uéksïnga kómu arhini jimbokachi jucha xénhchperasïnga. Ji Páblu, engani t'arhepekia, ka engani Jesukristuni jimbo k'atakata jaka.

¹⁰Jucheti uátsï Onesimu jimbokinisï kómu arhini jaka, inde enga ixu k'ataperakuarhu jucheti uátsïntaka.

¹¹Urhetku ísïkini Onesimu[1] chéti jántspiri no marhuachesïrempti, ka iásïjtsïni sési marhuachexati.

¹²Jíkini jucheti uátsïtini axachentaxaka engani ji xánimenduni xénhchajka.

¹³Ji uékapiringa eska jíndeni jinguni pakarapiringa, ka eskarini marhuachepiringa engani jamberi ixu ambakiti aiangperakua jimbo k'atakata jauaka, ísï eskarini t'u na marhuachejka.

¹⁴Jíkini urheta sésikua kurhacheni uéksïnga, jimbokani no uékasïnga eskarini jíndeni sési pakaracheaka, jínisïni uéjka eskari mintsita jinguni úaka.

¹⁵Nándikakini Onesimu ísï jimbo sóndi kéndikuchepka, jimboka iásï k'óru méntkisï t'úngeni jinguni jauaka;

¹⁶nóteru jántspiri k'uanhatseatia, iásï sánderu sési jásï k'uiripueuatia eska juchari erachi xénhchakata ma. Ji kánekua xénhchasïnga, k'óruri t'u jatsiska sánderu kánekua xénhchani, eska sési jimbo chéti erachi ma, Acheri jimbo.

¹⁷Ekarini ambe jindeni ísï exejka eskani t'u jingunini, Onesimuni ísï eroka eskarini jíndeni erokani jarhani.

¹⁸Engakini ambe Onesimu ambema úcheka, ókini ambema káncheni jarhani, kántsperatarini jíndeni kundache.

¹⁹Ji, Páblusïni ísï karani jaka, eskani ji maiampentaaka. Jíkini úpiringa jamberi arhini eskarini t'újtu chéti tsípekua jamberi kánchexaka.

²⁰Ísïsti erachi, kurhachexakakini eskarini ísï jarhuataaka, Acheri xénhchperata jimbo ka ísï jámanirini karhoataaka Krístuni jimbo.

²¹Ka ísïkini karachesïnga jimbokani sési mítetixaka eskarini jukari jámberi kurhandiracheaka.

²²Ka jíndenturini ambantskacheniti jáia, nani engani úaka inchantani mintsikorheni; jimbokani mintsikaxaka eska chári uandamukukorhekua jimbo, Diósïrini íntskuaka sésikua ménderu cha jinguni jarhani.

²³Epafrasi, inde enga jíndeni jinguni Jesukristuni jimbo k'atakata jaka, uandajperakuakini axachexati,

²⁴ka ístu Márkusï ka Aristarkusï ka Démasï ka Lúkasï, ánchekorheteri pámpiricha.

²⁵Eska Acha Jesukristueri kóntperakua, chéti espiritu jinguni jauaka.