Read Western Highland Purepecha Hebreos 1 Bible Online

Hebreos 1 - Western Highland Purepecha bible

Hebreos 1

¹Tata Kuerajpiri, mémechani uéntani, ka imeri uandaricheri uandakua jimbo juchari ióntki anapuechani mámaru uandaxekuasti.

²Íni jurhiatekuechantsïni Tata Kuerajpiri, Uájpani jimbo uandajpasti Uájpa enga iámu ambe míndakuka jurajkukuni, imani engajtu jimbo iámendu ambe kueraaka.

³Uájpani, enga Diósïri k'érikueri t'íntskueka, ka enga xarhatajka Diósï néna enga jáxeka, ka enga imeri uandakua uinhapiti jimbo iámendu ambe exeni jaka, enga urheta k'amanharhintskuechani p'ímbinhajkpentatini auandarhu anapu irechani t'irerkandani uaxantaka.

⁴Sánderu kánekua k'érikua jinguni eskaksï ánjelicha, xáni sánderu eska na jakangurhikua p'ika.

⁵Sésitkiru exe je, Diósï nóma ánjelini méni arhisti: “T'úri jucheti uatsïtiska; jíkini úska iásï.”[1] Ka nójtu ma ánjelini arhiristi: “Ji imeri táteuaka, ka ima jucheti uátsïtiuati.”[2]

⁶Ka ménderu uéntani, enga Uájpa urhetini parhakpeni kéjpani jámempka uandaspti: “Eskaksï iámendu Diósïri ánjelicha k'éri ambe arhiaka.”[3]

⁷Ánjelicheri ambe Diósï uandasïndi: “Ánjelichani jémbechani tarhiateni manataasïndi, ka jántspiri jémbechani chpírini t'íntskaasïndi.”[4]

⁸Ka Uájperi ambe arisï uandasïndi: “Chéti juramukua, Acha Diósï, méntkisïsti, ka inde juramukua terujkani anhaxurhitixati.

⁹Sési jásï amberi xénhchaska ka nósesi jásï amberi ikichaska; Diósïkini jimbosï t'úngeni erakuti, ka iámukini tsípekua íntskusti sánderu eska máteru chéti pámpirichani.”

¹⁰Ka uandastijtu: “T'úri Acha, t'úri uénani jámantki echerini sési uaxastaska, ka t'úri úska auandani.

¹¹Iámendu ima ambe k'amakurhiati, ka t'u k'óruri méntiksï jauaka. Iámendu ima ambe takusïni niuati k'amakurhini.

¹²¡Eska takusï ambe, ísïri irhintaaka, ísïri mójtakuaka eska ambe mórhekorheni! Ka t'u k'óruri májkueni jauaka ka chéti irekua nómeni k'amarhuati.”

¹³Ka Diósï ¿Náki ánjelini méni arhiski?: “Jucheti t'irerkandanirini uaxanda, engani jámberi chéti ikiatspirichani péracheauaka eskari jatanduantauaka.”

¹⁴¿Andi nóksï iámendu ima espiritueski engaksï Diósïri jántspirika imecheri engaksï p'ímutperatskua p'iuaka?