Read Western Highland Purepecha Hebreos 11 Bible Online

Hebreos 11 - Western Highland Purepecha bible

Hebreos 11

¹Jakajkukua maiamperakuesti imeri engachi erokorheni jaka; ima jimbo jánhaskorhesti eskachi jakajkusïnga iámendu ambe engachi no exejka.

²Diósï juchari ióntki anapuechani jaiapanheantaasti jimbokaksï jakajkusïrempka.

³Jakajkukua jimbojkuchi míteska eska Diósï uandakua jimbo úska eska xáni ambe auandarhu jaka, ka arhikuekasïndi; eska ambe anga xarharajka, jima uérateska enga no xarharempka.

⁴Abelijtu jakajkukua jimbo Diósïni sánderu k'éri ambe aiakuntasti eska Kaini, ka imani jimbo kaxumbiti únhasti, jimboka Diósï jaiapanhekuntaska enga ima aiakuntaka; ka náuejki Abeli uarhikia Diósï útasï míantaxati.

⁵Ka jakajkukua jimbo, Enoki tsípiti pánhantasti, eska no mítepiringa néneski uarhini, jimbosï nómeni xénhantapti imeri anhanhatakua, jimboka Diósï pántaska. Karakatarhu arhisïndi eska Diósïni jaiapanherantasïrempka.

⁶Jimbo, Diósïni no úsïndi jaiapanherantani enga no jakajkuaka, jimboka ne enga Diósïni andarhentaaka, urheta uétarhesïndi eska jakajkuaka eska Diósï jarhaska, ka jakajkuni eska imechani engaksï jirinhantajka sési maiamuantasïnga.

⁷Jimboka Noe jakajkuspka enga Diósï aiangupka imani ambe enga nótki exempka, jimbosï ima, chérheparini teparini ma úpti ka engaksï imani jimbo imeri márkuecha no itsïrhu uarhimepka; ka jiájkani jakajkukua jimbo jánhastaraasti parhakpeni anapuechani eskaksï támisï jámaxapka ka ísï jámani újchakurakua intsïnhaspti engaksï imecha intsïnhajka engaksï jakajkujka.

⁸Abranijtu jakajkukua kurhandiraspti enga Diósï uandajpapka, ka uérasti nirani, jini echerirhu enga jurajkumenhapiringa, ka uéraspti, no míteparini nanisï niárani jámempki.

⁹Jakajkukua jimbosï Abrani, echerirhu enga aiamenhapka, kómu jámapti, enajki ambe ima no jima anapuepi, uapajtsïtakuarhu irekaparini, májkueni eska Isaki ka Jakobu, jimbokaksï imajtu májkueni ambe aimenhatixapka.

¹⁰Jimboka ima k'éri iretani enga pítsekua sési jukaka mintsikaxapka, enga Diósï úka ka eratseka néna enga jáxepiringa.

¹¹Sárajtu jakajkukua jimbosï intsïnhapti uinhapekua eska úpiringa sapini kámani, náuejki kutsïmepkia, jimboka jakajkukuspka imani enga aiakupka.

¹²Jimbojtusï uánekua sapichani kángorheapti náuejki kánekua k'éripkia, xáni uáni eskaksï jóskuecha xáni uáneka, xáni uánekua enga jámberi no újka miiuani, eska na no úkorheka k'éri japundarhu uanamukuni kutsarini miiuni.

¹³Imaksï iámendu, jakajkuparini uarhisti ka nóksï intsïnhasti engaksï aiamenhatini jápka: Ka jíani jatintkuksï ústi eranhaskani ka exeni ka uandakorhenksï eskaksï no ixu parhakpeni anapueska ka eska nónema míteaska.

¹⁴Ka ne enga ísï uandajka, sóntku jánhaskorhesti eska máteru parhakpeninisï jirinhani jámani jaka;

¹⁵ka eskaksï no íni parhakpeninisï jirinhani jámani jaka, jimboka ekaksï íni parhakpenini míani japiringa engaksï uéjpentapkia, eratsepirindiksï méni ísï k'uanhatsentani.

¹⁶Sánderu ambakiti ambeksïsï jirinhajti, imani enga auandarhu jaka. Jimbosï Diósï no k'uratsenharhiajti, engaksï ima arhiaka eska uandaparini jámaaka eska imecheri Diósïska, jimboka k'éri iretani ma míndaatixakaia.

¹⁷Abrani jakajkukua jimbosï uékapti Isakini Diósïni aiakuntani jiájkani enga ts'éjkunhapka, ka ima enga aiamenhatini jápka tsípekua jinguni uékaspti májku uájpani aiatspentani,

¹⁸jimboka arhinhatixapka; Isakini jimbori uánekua sïrukua jatsiaka.

¹⁹Ka eratsentasïrempti útasï, néna enga Diósï xáni uinhapekua kámka enga újka tsítantani. Ka inde arhikuekasïndi eska Abrani, uájpa Isakini uarhikuarhusï p'íjpantaka.

²⁰Isaki jakajkukua jimbosï Jakobuni ka Esauni újchakurati eskaksï uánepiringa.

²¹Jakobujtu, jakajkukua jimbosï újchakuraapti iámendu Jose uájpechani, jiájkani enga uarhini jámempkia ka k'ámaratini tsérhukua tenhexkorhekuarhu p'ijtsïtani.

²²Josejtu jakajkukua jimbosï Israeli anapuechani arhiapti eska méni jatsipiringa Ejiptu uéakuntani ka aiakuaspti eskaksï imeri anhanhatakuani imechani jinguni pántapiringa.

²³Moisesiri tátjembaksï jakajkukua jimboksïsï Moisesini tanimu kutsï jískapti enga andajpenutintku jápka, jimbokaksï exespka eska sapi kámekua sési jáxespka, ka nóksï chéspti irecheri juramukuani no kurhandirakuni.

²⁴Moisesï k'éritinia, jakajkua jimbosï no jiókorhepti eska faraoniri nimakua arhinhapiringa.

²⁵Sánderu sáni uékaspti eska Diósïri iretani jinguni nósesi kánhapiringa eska namoni jurhiajku k'amanharhitskueri áspekua ts'émupiringa.

²⁶Sánderu sáni uékaspti Krístueri nósesi nitamakorhekuani jukaparharani, jimboka exerixapkia ambesï intsïmbenhantapirinki.

²⁷Jakajkuparinisï Ejiptu uékuantapti; sési anhaxurhikorhespti eska ambe Diósïni exeni jarhani.

²⁸Jakajkukua jimbosï páskueri k'uínchekua úntapti ka iurhiri atamutatspeni, eska ísï jámani k'amajkpiri, nómbema úkuapiringa Israeli anapu charhaku urhetichani.

²⁹Jakajkukua jimboksïsï k'éri japunda charhapitirhu k'arhindueni parhimepti; jiájkani engaksï Ejiptu anapuechajtu uékapka májkueni parhimeni ka jimaksï uarhimeni.

³⁰Jerikojtu jakajkukua jimbosï ótakua xerenhantati, ka urhetaksï iúmu tsimani jurhia iurhipkurhanhaspti.

³¹Rajabi, uarhiti ísku jándi, jakajkukua jimbosï no márku uarhipti, imani no kurhandicha jinguni, jimboka tsípekua jinguni mintsikorheraaspka Israeli anapuechani, engaksï urhepapka erantskani.

³²Ka ambeteruni úni arhia sánderu, jurhiata no andangutapirindi engani uandantapiringa Gedeoniri ambe, Barrakiri ambe, Sansoniri ambe, Jefteri ambe, Dabiri ambe, Samueliri ambe, ka iámendu Diósïri uandaricheri ambe.

³³Imaksï jakajkukua jimbo uánekua juramukuechani kétsekua pérasti, terujkanksï anhaxurhisti, intsïnhastiksï engaksï aiamenhatini jápka, púkichanksï pínasku jatsiasti;

³⁴nósesi jásï chpírinksï pátasti, uarhikuanksï uérakusti, ambakekorhentastiksï, nóksï sáni chésti enga uarhipeni k'uanika, ka p'urhejkutichanksï andaasti engaksï jínguni xani uarhipernga;

³⁵Máruksï nanecha uámbechani tsípiti intsïnhantasti, ka máruksï jámberi no jiókorhesti eskaksï jurajkunhapiringa ka náuejkiksï atanhani jápka, mintsikaparini eskaksï sánderu ambakiti ma irekuarhu tsíntapiringa;

³⁶máteruksï nómbema uandasti engaksï teresmarhunhani jápka ka engaksï k'uikirhenhani jarhempka ka jámberi tiámu jimbo jótanhani ka ónhanhani;

³⁷tsakapkueranhastiksï, nósesi ambeksï úmenhasti, kachundurhinhastiksï, tiámu atajpetarkua jimboksï atanhasti uándikunhani; ísterkuksï jámasti mirinchetini karichiri ka chibueri sïkuirijku jukarini, nómbema jinguni; iámu xukakata ka nósesi kángata

³⁸¡Parhakpeni no nitatarhespti eskaksï andajpenupiringa! Ka k'óruksï jimesï jámaspti enga no nema irekaka ka juátarhu ísï, p'orhotarhu ka inchanharhikutini ísï irekaparini.

³⁹Iámenduksï míanhantasïndi jimbokaksï jakajkusïremka ka k'óru nónema intsïnhaspti enga Diósï aiakuatini jápka.

⁴⁰Diósïjtsïni míndatixapti sánderu ambakiti ambe, ka uékasti eskaksï ima, juchari jimbo péranhapiringa jima enga k'amak'amasï sésika.