Read Western Highland Purepecha Hebreos 13 Bible Online

Hebreos 13 - Western Highland Purepecha bible

Hebreos 13

¹Méntkisï xénhchperani ja je.

²Ásï miripakurhi je sési eropeni; ísï jámanksï ma xanhari, no jámberi míteparini ánjelichani sési eroaspti.

³Ásï mirikurhia je imechani engaksï ónhakorheni jaka, chájtu májkueni p'ikuarherani ja je eskajtsï ambe imecha jinguni márku ónhakata jarhani, imechantu ásï jurajkua je engaksï nósesi kánhka, mía je eskajtsï chájtu méni nósesi kánhaaka.

⁴Iámenduecha janhanharhpera je tembuchaticha, eskaksï tembuchaticha no inchaakutsperaaka; jimboka Diósï arhinharhikuauaka ísku jándichani, ka máteru néma jinguni ísku ambe úrichani.

⁵Ásï tumina kánhcha je; tsípe je imani jimbo eskajtsï xáni ambe jatsikorheka, jimboka ima uandaska: “Nókini méni jurajkuaka, níkini méni jurarkua.”

⁶Jimbochisï nósani chéparini arhiaka: “Acharini jarhuataati; no chéaka. ¿Ambejtujtsïni úchea?”

⁷Míaua je imechani engaksïni urherukuchejka, imechani engaksïni Diósïri uandakuani aianguntaka ka exea je néna engaksï uarhika, chájtu májkueni jakajku je eskaksï ima.

⁸Jesukristu méntkisï májkueniuati, ka méntkisï ísïuati.

⁹Ásï jurajkutakorhe je eskaksïni máteru ambe jurhendaaka. Sánderu sésisti mintsitani kóntperakua jimbo uinhaperani, eska t'irekua jimbo uékani uinhaperani, enga nómbema marhuakuauaka imechani engaksï xáni ambe aka.

¹⁰Juchachi kéjtsïtatarakua ma jatsikorheska engaksï tátecha no újka jima arhani.

¹¹Manakorhericheri kuiripeta engaksï k'érati tátecha tióstarhu pérka, enga k'ámanharhintskua maiampetarakueka, ekuarhuksï kurhinhantasïndi.

¹²Jimbosï Jesusijtu iretani kaxumberantani imeri iurhiri jimbo uérakua atanhapti uándikunhani.

¹³Ju je juchajtu uérani jurajkuchi juchajtu méntkueni k'uratsetanhani;

¹⁴jimbokachi ixu parhakpeni no májku k'éri iretani jatsikorheska, sánderu sánichi imanisï jirinhani jámani jaka enga jimbanhe ireteuaka.

¹⁵Ju je méntku Jesusini jimbo aiakuntani jarhani k'éri ambe arhikua. ¡Ju je juchari penchumekua jimbo k'éri ambe arhini!

¹⁶Ásï miripakurhi je sési ambe úni ka jarhojperani; Diósï indeni jásï aiatspentskuasï jaiapanhentajti.

¹⁷Kurhandirakua je chári úrhejtsïkurichani, ka iámu kurhajchaa je, jimbokaksïni ima méntku uandanheaxaka eskajtsï Diósïni aianguntaaka, eskajtsï tsípeparini uandantaaka ka no ueparini, ískuepirindia uerani jarhani.

¹⁸Arhijpechejtsïni juchantsïni, jimbokani jucha iámu ambe sési miákorhexaka úni, ka iámendu ambechi sési uékaxaka úni.

¹⁹Ka sánderu uinhamujtsïni arhijpeche eskani úaka sóntku ménderu cha jinguni jarhani.

²⁰Ka eska Diósï enga sési jakueka, enga Jesusini tsítantaka, imani enga karichi Erangutika enga imeri iurhiri jimbo ts'ïrimeraka pakatperakuani,

²¹chánksïni iámu ambe jimbo séseraaka, ka eska juchantsïni kámaaka eska ima na uéjka, Jesukristueri jimbo enga méntkisïuaka. Ísïchi jakajkuni jauaka.

²²Kómu arhixakaksïni tatecha eskajtsï íni sapichu p'imarhperatani jiókorheaka.

²³Aianguxakaksïni eska erachi Timoteo jurajkunhaskia. Enga no ióndaska junguani márkuchi niuaka chánksïni exentani.

²⁴Uandakua axakuaxaka iámendu urherukutichani ka kaxumbitichani. Italia anapuechaksïni uandakua axachexati.

²⁵Kóntperakua cha jinguni jaue.