Read Western Highland Purepecha Hebreos 2 Bible Online

Hebreos 2 - Western Highland Purepecha bible

Hebreos 2

¹Jimbosï uétarhejti eskachi sési kurhajtsïtaaka imani engachi kurhakia, eskachi no jámaaka tsîncheni.

²Ka jimboka uandakua engaksï ánjelicha uandantaka xáni uinhapeska, jimboksïsï no maiampetaranhantati ka nójtuksï jukari maiampetaranhani ima engaksï no kurhandiraka ka k'amanharhintanksï.

³¿Juchachi nénasï púamenhantaia engachi xáni k'éri p'ímutantskuani no patsapatsandakorhejka? Ima p'ímutantskua enga Acha uénaka uandantani, ka engajtsïni tátsekua ima ts'ïrimeracheka engaksï kurhajchakorheka,

⁴enga támu, Diósïjtu mámaru jásï milagruecha jimbo ts'ïrimeraka ka enga xáni ambe Espiritu Sántu jurhenaka úni, engajtsïni ima íntskuka eska ima na eratseka.

⁵Ka ísïsti eska Diósï no ánjelichani jurajkukuaska imani jimbanhe parhakpenini enga jurhani jaka ka engachi uandaxeni jaka.

⁶Jimboka nema, nani karakatarhu exekorheska eska arhisïnga: “¿Andi ambeksï xániski parhakpeni anapuecha engari imechani miáuajka? ¿O ambejtuksï xániski acheti uájpecha engari imani uandanheajka?

⁷Ánjelichani jinguniri sóndi sánderu kétsekua péraska ka tátsekuari t'íntskuarhu ka k'érikuarhu péraska;

⁸iámendu amberi pérakuska eska ima juramukuaka.” Ka ísï jámaniri iámu ambe pérakutini, nómbema ima no juramukusïndi. Enga úka, útasïchi nótki exexaka eska iámendu ambe imani kurhandirakuxaka.

⁹Ka imani enga sánderu kétsekua péraka eska ánjelichani, Jesusini; exexakachi eska t'íntskuarhu jarhaska ka eska k'érikuarhu jarhaskia, jimboka úska uarhikuani uérakuni, jimbokajtsïni Diósï xáni kóndentaska, jimbosï uékati eska iámenduecheri jimbo uarhipiringa.

¹⁰Sési jarhasti eska imani enga iámu ambe kurhandirakujka ka enga iámendu ambe imerika, eska uánekua uájpechani t'íntskuarhu pérauaka; eska nósesi nitamanchakua jimbo iámendu séserantaapiringa imani enga p'ímutantskuarhu urhekupaapiringa.

¹¹Jimbokaksï májkueni úkateska ima engaksï pímbinhajkpintstika ka májkueni eska ima engaksï pímbinhajkuntskateka. Jimbosï Jesusi no k'uratsejti erachi arhiani.

¹²Enga karakatarhu arhijka: “Aianguauaka néna engari arhinhajka chéti ka jucheti erachichani; ka k'éri ambekini p'irecheaka enga tángorhenhantatini janhaaka.”

¹³Arhisïndijtu: “Ji imani mintsikani jauaka.” Ka ménderu arhisïndi: “Ixujtsïni jatsiska, jíndeni sapichani jinguni engarini Diósï íntsaaka.”

¹⁴Ka jimbokaksï uájpecha májkueni iurhiri ka k'uiripeteka, jimbosï imajtu májkueni únhapti. Ka eska ísï uarhirini, Nóambakitini méntku k'amajkupiringa, imani enga uarhikueri k'érika.

¹⁵Ka iámendu imechani p'ímutantaani engaksï méntku uarhikuani chérheparini irekani jápka.

¹⁶Jimboka ísïska eska ima no ánjelichanisï juka p'ímutantaani; Abraniri sïrukuechanisï juti p'ímutantaani.

¹⁷Jimbosï uétarhepti eska Jesusi iámendu ambe jimbo, iámenduechani jinguni májkuenipiringa ka eska ísï jámani úpiringa K'éri Táta no jurajkpirini ka kóntpirini, ka Diósïni marhuakuni jámani, ka eska k'ámarhintskuechani maiampetspentapiringa.

¹⁸Ka Jesusi úati jarhuataani imechani engaksï ts'éjkunhaaka jimboka imajtu ts'éjkunhaska.