Read Western Highland Purepecha Hebreos 5 Bible Online

Hebreos 5 - Western Highland Purepecha bible

Hebreos 5

¹Jimbokaksï iámendu k'érati tátecha parhakpeni erakunhasïnga ka imaksï uandapetspesïndi ka imaksï iámu ireteri k'amanharhintskuechani jimbo Diósïni kéjtsïtakua ambe íntskuntasïndi.

²Ka p'amojkuasïndi imechani engaksï no mítetini ka xerejtsïtini k'amanharhintajka, jimbokaksï imajtu k'amanharhintstiska.

³Ka jimbosï jatsiti eska mámaru járhati ambe intspentaaka imeri k'ámanharhintskuechani jimbo ka iámu ireteri k'amanharhintskuechani jimbojtu.

⁴Ka nónema uandakorhesïndi eska ima k'éri táteuaka, imajku enga Diósï arhiaka, májkueni eska Aaronini na erakuka.

⁵Ka májkueni, Krístujtu no uandakorhesti eska ima k'éri tátepiringa, sánderu sáni, Diósïsï k'érikua íntskupti enga arhipka: “Jucheti uátsïtiskari; iásïkini tsípekua íntskuska.”[6]

⁶Ka máteru nanijtu arhisïndi: “T'úri méntkisï táteska, májkueni eska Melkisedeki.”

⁷Enga Krístu íni parhakpeni jámani jápka, uinhamu ka ueparini kómarhispti imani enga úpiringa uarhikuarhu p'ímutantani, ka Diósï kurhajchaspti jimboka kaxumbespka.

⁸Ka náuejki uájpepka, imani jimbo eska na kánhapka, jurhengorhespti kurhandirani;

⁹ka enga na iámu ambe úkorhepkia, Jesusi p'ímutantspiri úkorhesti imecheri engaksï kurhandirakujka,

¹⁰ka Diósï k'éri táteni pérasti, májkueni eska Melkisedekini.

¹¹Inderi ambechi uánekua uandakua kámaxaka, k'óru úkua jukasti sésiksïni jánhastani, jimbokajtsï ióndasïnga kurhanguni.

¹²Jimbokajtsï ióniskia, jamberijtsï jurhentpiripiringia, ka chájtsï uétarhenchasïnga eskaksïni ménderu uéntaaka Diósïri uandakua uénatarakua ambe jurhendani, xántsï k'uanhatsentaska eska sapi ma enga etsukua no újka jurajkuni, ka enga nótki újka xaxani.

¹³Jimboka ne enga útasteru etsukua p'irani jaka, charhakuestiteru ka nótki úsïndi sési eratsekuntani.

¹⁴Ka k'ératicha k'óruksï xaxasïndia ka únksïa chuperi ambe arhani; ka engaksï xáni ióni ísï úrini jurhengorhekia erakuni ambesï sési ka ambesï nósesi.