Read Western Highland Purepecha Hebreos 9 Bible Online

Hebreos 9 - Western Highland Purepecha bible

Hebreos 9

¹Ióntki anapu pakatperakuajtu p'indekuechani kángorheasïrempti ka tióstani jatsikorhespti ixu parhakpeni.

²Tátsepani jatsinhasïrempti kandela jatakua ka kurhinda Diósï mindakata p'íjtsïtakua,

³jima tátsepani enga tsimandarhu arhunhepka jima Santisimurhuespti,

⁴enga xunhanda jatsikutarakua tiamu tiripitiri kéjtsïtatarakua jápka, ka pakatperakata jatakua[9] ka jima máteru mana jatakua, imajtu tiámu tiripitiri, ka Aaroniri chkári enga ménderu tsikirhuntapka, ka pakatperakateri juramukuecha.

⁵Jimaksï anhajtsïkutixapti[10] ánjelicha engaksï Diósïri uinhapekua xarhatempka ka engaksï iámu k'umajtsïtempka púatsperantskuarhu. Eka úka, iáiasïksïni inderi ambe no k'amak'amasï aianguaka.

⁶Enga xáni ambe ísï pérakata jarhempka, tátechaksï méntkisï jimajku inchasïndi enga inchani jámantkueka ka jimaksï marhuasïndi Diósïni uandatsekorhekuni.

⁷Ka k'éri táta santismurhu ma xánharku inchasïrempti ma uéxurhini jimbo ka jandiójku, ka no úsïrempti inchani enga no páni japiringa iurhiri enga imeri k'amanharhintskua jimboepiringa ka támu pásïrempti enga ireteri jimboepiringa.

⁸Espiritu Santu indeni jimbo jánhastpesïrempti eska santisimurhu nótki mítakorhesïrempka jiájkani jámberi enga útasï japiringa tiósta enga urhetipka.

⁹Iámendu inde ambe íni jurhiatekuecheri eranhaskatarakuesti, májkueni eska jima na mámaru ambe kéjtsïtanhempka enga uandatsekorherichani no marhuakuempka k'amak'amasï séserantaani.

¹⁰Ka akua ka itsïmakua ka iámendu jásï pímbinhajkperantskua p'indekua ambejkuespti, enga jiájkani jamberi únhempka enga jamberi janopiringa jurhiata enga ménderuenipiringia.

¹¹Ka Krístu k'éri tátestia imani ambakiti amberi enga jurhani jaka, tióstarhu sándeu k'éri ka sánderu séserantskata, engaksï no parhakpeni anapuecha úka, ka enga no ixu parhakpeni anapueka.

¹²Ka ma xanharku ka méntku inchasti ka nóteru méni uéntaati, ka no máteru amberi iurhiri aiatspentani, imeri iurhirisï aiatspentaati engajtsïni jimbo k'amanharhintskuarhu p'ímutantaka.

¹³Ísïsti eska manakorhericheri iurhiri ka úakasï kurhirakateri pakajpekata marhuasïrempka enga atarhekorhenhempka, enga úka, jinijkusï p'ikurhpentempti.

¹⁴¡Náxantsïni no sánderu sési pímbinhajkuntajki Krístueri iurhiri! Enga Diósïni jinguni nómbema arhikua jukaka ka enga Espíritueri jimbo, enga méntkisïka, aiakorhentaka ka eskachi ísï jámani Diósïni marhuakuaka, enga tsípiti jámani jaka.

¹⁵Jimbosï jimbanhe pakatperakueri ima pakaratspititi; eska imeri uarhikua p'iuaka iámendu nósesi úkata ambe enga ióntki anapu pakatperakua jimbo nósesi niátanhapka, ka eskaksï p'iuaka ima engaksï uandajpanhantakia intsïnhani engaksï méntkisï anapu aiamenhatini jaka,

¹⁶jimboka uétarhesïnga eska úrheta uarhiaka ne enga karakata jimbo jurajkutini jarhajka aiatsperakua,

¹⁷jimboka karakata jiájkani marhuasïngia enga na uarhinhajkia, ka nótki marhuasïndi enga útasï jámani jauaka ima enga aiatspitika.

¹⁸Urheta anapu pakatperakuajtu uénakuarhu iurhiri tsîtanhaspti.

¹⁹Moisesijtu jiájkani enga na k'amarapkia imeri iretani juramukua arhikuntani, imajtu manakorhericheri iurhiri itsï jinguni jeuetatini ka takusï charhapiti ka isopo jimbo, karakatani jamberi atarhespti ka iámu atarhpespti

²⁰uandaparini: “I iurhiri pakatperakueristi engaksïni Diósï axacheka”

²¹Ka k'éri tióstantu atarhespti ka iámendu ambe enga uandatsekorhetarakueka;

²²jimboka juramukua arhisïnga eska iámendu ambe jatsispka iurhiri jimbo pímpinhajkunhantani, ka enga no tsîncheska iurhiri eska no púatsperanhantaaka.

²³Jimbosï uétarhejti, eska p'imbinhajkunhantaaka iámu ambe enga auandarhu anapu ambe ts'éndantajka, enga úka, auandarhu anapu ambe sánderu ambakitiri iurhiri jimbo p'imbinhajkunhantasïndi.

²⁴Jimboka Krístu no jima sánderu pímbinhandekuarhusï inchaka enga parhakpeni anapu nema úka, enga imani ts'éndantajka enga ísïka, aundarhumendusï inchati, Diósïni kurhandirakuni juchantsïni arhijpecheni,

²⁵ka no mémechani uéntani aiakorhentani, eska táta k'éri na jámka mándani uéxurhini ka útasï máteru amberi iurhiri aiatspentani.

²⁶Enga ísïpiringa mémechani uéntapirindi nósesi nitamakorheni, jiájkani uératintki enga parhakpeni uénaka. Sánderu sáni iásï xarharasti ka ma xanharku, iásï enga sánderu sési jándekuarhueka, imeri aiakorhentskua jimbo jurhasti k'ámanharhintskuani méntku k'amajkuni.

²⁷Ka májkueni eska na jaka, eska parhakpeni anapuecha ma xanharkusï uarhiaka ka eska tátsekua janoaka arhinharhikperakua,

²⁸Krístujtu májkueni, eska na aiakorhentaka iámenduechani k'ámanharhintskua p'ikurhpentani, ménderu xarhantaati, nóteru k'amanharhintskua p'ikurhpentania, p'iuantanisï juuati imechani engaksï erontani jaka.