Read Western Highland Purepecha Santiago 1 Bible Online

Santiago 1 - Western Highland Purepecha bible

Santiago 1

¹Ji Santiagu, engani Diósïni ka Acha Jesukristuni jántspekuni jámka, uandajperata axakuaxaka témbeni tsimani (12) Israeliri sïrukuechani engaksï ma parhakpeni jámani jaka.

²Erachicha, kánekua tsípe je engaksïni ts'éjkuni jauaka.

³Chájtsï mítetixaka eska chári jakajkukua ts'éjkunhaaka, ísïjtsï jurhengorheaka sánderu tekaantani.

⁴Ka jángorhentsï je eskaksïni chári tekantskua sési jájkuaka, eskajtsï sési míakua jukaaka, eskajtsï nómbe ma arhikua jukaaka.

⁵Eka cha ma ísï no xáni mímixeka, Diósïni kurhakue ka ima mímixekua kóndeati, jimboka ima iámendu ambe kánekua tsípekua jinguni íntspesïnga.

⁶K'óru uétarhesïndi eska kánekua mintsikaparini kurhajkorheaka, ka nósani tsimantsimaneaparini: Jimboka ima enga tsimantsimaneajka, ima ísïsti eska k'éri japunderi jenguerakua enga tarhiata axueni ka axueni kántka.

⁷Ima enga xáxeka, ásï ambe ma mintsikani jaue eska Acha íntskuaka;

⁸ne enga méntku mómuntani jarhajka, iámendu ambe jimbo tsimantsimaneani jarhasïndi.

⁹Ásï k'uratse engari no jatsikorheka, k'éri p'ikuarhera jimbokakini Diósï k'érikuarhu péraaka.

¹⁰Ka t'u jatsikorheri, ásï k'uratse engakini Diósï ísku nemeni exejka. Jimboka jatsikorhekua ísku k'amandeaka ísï eska tsïtsïki juátarhu anapu,

¹¹jimboka enga uinhamu tsándeni jarhajka, tsïtsïki k'arhisïndi ka tsïpata uauarhuni ka nóteru kasïpesïndia. Jatsikorherijtu xántku ísïsï nóneuati iámendu imeri úkua ambe jinguni.

¹²¡Tsípe ima enga ts'éjkperatani jakujka! Jimboka enga sési uérakuaka, tsípekua méntkisï anapuni andaati, enga Diósï imechani aiakuaka engaksï xénhchajka.

¹³Ásï nema uande eska Diósïsï ts'éjkuni jaka enga nósesi ambe únhchani jarhajka, jimboka Diósïni, nósesi jásï no úsïnga terungutani, ka Diósïjtu nónemani terungutasïndi.

¹⁴Méntku ménderuenisti, juchachi jandiojkusï terungutakorhejka juchari ísku jánhchakua jimbo engajtsïni antsitka, ka antsitasïndijtsïni ka ísku ambemajtsïni únhchatarasïndi.

¹⁵Ísku jánhchakua, tátsekua k'amanharhintskua úkorhesïndi, ka k'amanharhintskua úkorhetinia, uarhikuesïndia.

¹⁶Jucheti erachicha engani ji xáni xénhchajka, ásï támisï jánhaska je.

¹⁷Iámendu sési jásï ambe engachi intsïnhajka, ka sési jásï ambe engachi kóndenhajka auandarhu anapuesti, Diósïjtsïnisï axachejti; ima enga jóskuechani kueraaka, ima enga no mójtakorhejka o k'umandeni nipani.

¹⁸Jimboka Diósï ísï tsípentaska, tsípekuajtsïni íntskusti uandakua jimbo enga ísïka, jimbokajtsïni ima juchantsïni sánderu urhepani pérakorheska imeri kueraakatecha jinguni.

¹⁹Jucheti erachicha, míani ja je: Iámenduechajtsï jinguntku jauaka kurhakuekani; ka nójtsï sóntku ambe uandakuekaaka, ka nójtsï jámaaka sóntku ikiani.

²⁰Jimboka ne enga ikiatku jámka no úsïndi sési irekani ísï eska Diósï na uéjka.

²¹Ísï jimbo, jurajku je iámendu nósesi jásï ambe, ka jurajku je nósesi úkua ambe enga xáni japuka, ka kaxumbekua jinguni kurhajtsïta je imani uandakuani engaksïni Diósï intsïmpekia, jimboka ima uandakua uinhapeska ka úatiksïni p'ímutantani.

²²K'óru no marhuasïndi uandakuani ísku kurhani; k'uanisïndi marhuatani, ekajtsï ísku kurhaska, ísïuati eskajtsï ambe jandiojku tandojchakorheni jarhani.

²³Ima enga tsípejka uandakuantku kurharini, ka jini no ísï irekani; ima ísïsti eska ima enga eratekorhejka,

²⁴ka enga na eratekorhejka kéndikusïndi ka mirikurhisïndi nénasï jánharhi.

²⁵K'óru ima enga sési arhintajka ambakiti juramukuani enga p'íjpentajka, ka sési kurhanguni; ka no mirikurhini ka marhuatani ambe enga jima arhijka, ima tsípeati ísï jámatini.

²⁶Eka nema ísï p'ikuarherani jaka eska kánekua jakajkutiska ka k'óru no p'ímukukorheni, jandiojku tandojchakorhexati ka imeri jakajkukua nósani jukaparhasti.

²⁷Jakajkukua enga juchari Táte Diósïni jimbo jukaparhaka ka pímbinhaxeni, aristi: Jarhuataani uerandi jupindichani ka uarhiti tsîndichani engaksï kómu nitamakorheni jauaka, ka eska parhakpeni anapu nósesi jásï ambe nósani jájkuaka.