Read Western Highland Purepecha Santiago 2 Bible Online

Santiago 2 - Western Highland Purepecha bible

Santiago 2

¹Jucheti erachicha, ásï erakpera je cha engajtsï Acha Jesukristu k'éri t'íntskuani mintsikani jaka.

²Ju je eranhaskani eskajtsï cha tángorhentatixaka, ka jatsikorheri ma jiájkani niárani ambakiti ambe jukajkurhatini ka sési xukuparhatini, ka máteru jimajku incherani enga no jatsikorheka ka kómu jáxeni.

³Ka cha imani eraani enga sési xukuparhaka ka arhintsï: “Axu, k'érikuarhu uaxaka je,” ka no jatsikorherintsï arhini: “Jimintkurini eroka o jiminisï uaxandiku.”

⁴Ekajtsï cha ísï jámaska, erakpexakajtsï ka nósesi jimbojtsï erakpexaka.

⁵Íni ambe kurha je jucheti erachicha: Diósï parhakpeni anapu, no jatsikorherichani erakuasti eskaksï ima jakajkukua jimbo jatsikorheriuaka. Ka eskaksï ima p'iuaka imani irechekuani enga Diósï imechani aiakuaka engaksï xénhchajka.

⁶¡Chájtsï kómu jándichani néuejkini káasïnga! ¿Andi nóksïni jatsikorherichasï tsitarantki? ¿Nóksïni imasï juramukuarhu antsikupajki páni?

⁷¿Andi nóksï imasï chári Acha Jesukristueri xáni sési jásï jakangurhikuani nósesi ambe uandaparini jámki?

⁸Ekajtsï juramukuani sésimendu kurhandiraska eska Karakata na arhijka: “Xénhchpeakari ísï eskari t'u xáni xénhchakorhejka.”

⁹Ka ekajtsï erakperaaka, k'amanharhintaxakajtsï ka Diósïri juramukuantsï no kurhandirakusïnga.

¹⁰Jimboka ima enga juramukuechani kurhandirajka ka ma ambejku no kurhandirani, méntku iámendu juramukuechani jimbo tsîrhukuxati.

¹¹Ima Diósï enga uandaka: “Ásï jáma ísku jándi úkorheni.” Ístu uandasti: “Ásï uandikpe.” Ekari no ísku jándika ka jiniri uandikpitini, iámu juramukuandi no kurhandirakuxaka.

¹²Chájtsï jatsiska ísï jámani ka ísï uandani eskaksï ima, engaksï imani juramukuani jimbo arhinharhikunhaaka enga p'íjpentka.

¹³Jimbokaksï ima engaksï no p'amojpejka, Diósïjtu no p'amojkuantauati arhinharhikuani. ¡P'amojkperakua andaati jiájkani enga arhinharhikperanhaaka!

¹⁴Erachicha, ¿Andi ambe andasïni ma uandani jarhani eska jakajkusïnga ka jini nómbe ma úni? ¿Ima jakajkukua p'ímutantaa?

¹⁵Ju je eranhaskani eska erachi ma, o eska pirenchi ma nómbe ma xukuparhaxaka ka eskaksï t'irekua nómberakorheska,

¹⁶ka cha ísï arhini: “Diósïksïni újchakure, jukakorhentsï je ambe, ka atsïkorhe je sáni ambe.” Ka jinijtsï no intsïmbeani ambe engaksï ima uétarhenhchani jaka, ¿Ambe marhuaua?

¹⁷Jakajkukua jingunti xántkusï ísïti, enga nómbe ma sési únhaaka, xásï jakajkukua nómbema marhuasïndi, uarhirixati.

¹⁸Ka nema jamberi uandaati: “T'úri jinijkusï jakajkujka, ka ji sési ambe úsïnga.” Xérachurini chéti jakajkukua nómbe ma sési úparini; ka jíkini jucheti jakajkukua jángua jimbo xarhatacheaka.

¹⁹¿Jakajkusïngari ano eska Diósï májkueska? ¡Sési jarhasti! Enga úka, nóambakitichajtuksï jakajkusïndi ka manarantasïndiksï xáni chéni.

²⁰Ásï tandosï úkorhe je, jánhaska je eska jakajkukuajkua jimbojku nómbema marhuasïnga.

²¹Juchari tua anapu Abrani, Diósïni xarhatakuspti eska kaxumbitispka, enga Diósïni uájpa Isakini aiakuntapka.

²²¿Exexakiria na enga Abraniri jakajkukua, jánguani jarhuataka? Ka imeri sési jángua jimbo, sésimendu jájkustia imeri jakajkukuani.

²³Ísï úkorhesti eska na karakata jaka: “Abrani Diósïni mintsikasti ka jimbosï Diósï Abranini jaiapanhentati.” Jimboksïsï Abranini arhimpti eska Diósïri pámpirispka.

²⁴Xéxakajtsï na enga Diósï sési jángua jimbojtu jaiapanhentpejka ka no jakajkukua jimbojkusï jaiapanhpentajti.

²⁵Rajabi, ima uarhiti tua anapu enga ísku jándipka, májkueni jámaspti; Diósï jaiapanhentaspti, jimboka ima, imechani engaksï sïpasïpajtsïpapka, chéni jémbo pakataaspti ka máteru xanhari jimbo axaaspti eskaksï sïpakorhepiringa.

²⁶Ísï eska anhanhatakua na uarhirini jarhajka enga espirituni no kámka; májkuentu jakajkukua uarhirini jarhasïndi enga nómbe ma sési únhaaka.