Read Western Highland Purepecha Santiago 3 Bible Online

Santiago 3 - Western Highland Purepecha bible

Santiago 3

¹Erachicha, ásï xáni uánekua jurhentpiri úkorhe je, jimbokajtsï mítetixaka eska jucha engachi jurhentpirika uinhamenduchi arhinharhikunhaaka.

²Iámenduechachi mámaru ambe arhikua jukaska; enga nema újka p'ímukukorheni, ima k'amak'amasï sési jásï k'uiripuesti, jimboka úsïngia p'íngukorheni.

³Engachi tekechuechani tiámu jatsichakuajka p'ínguani, ísïchi úsïnga tekechuni páni nani engachi ísï jucha uékaaka páni.

⁴Ka sáno májkuenisti k'érati icharhutecha jinguni: Náuejkiksï xáni k'érani ka náuejki xáni nósesi tarhiani, ima engaksï páni jarhajka úsïndiksï sapichu xóajtakua ma jimbojku jimesï páni nani engaksï ísï uékaaka páni.

⁵Katambajtu no k'ésti, k'óru, k'éri ambe úsïndi. Exe je na enga misiri májku újka k'éri juátarhu kurhuntskarani.

⁶Katamba chpíristi: Kánekua nósesi ambechi jatachaska. Iámendu ambe engachi jucha jatsikunhaka; katamba sánderu nósesi ambesti enga infiernurhu anapu chpíri jimbo t'ixarajka; ka katamba iámu juchari irekuani k'amajpasïndi ka ikichakueni jájpesïndi.

⁷K'uiripu úsïndi káani manakorheri ikimenharhichani ka káratichani ka akuitsechani ka k'éri japundarhu anapu manakorherichani.

⁸Katambani k'óru nónena úsïndi ísku jatsini; nósesi ambesti ka no ísku janhejchasïndi ka katambarhu uarhirperakua ambejkusï jati.

⁹Acha juchari Tátenchi katamba jimbo k'éri ambe arhisïnga, ka ístuchi katamba jimbo útakuasïnga imani enga Diósï xájkukorheaka eska ima na jáxeka.

¹⁰Katamba jimbochi sési ambe arhijpesïnga ka ístuchi katamba jimbo útatspesïnga. Inde ambe erachicha no ísïpirindi.

¹¹¿Andi itsarhu ma ua itsï p'untsumarha k'amemarha jinguni andarani?

¹²Erachicha, ¿Andi jígusï ma úsïnki aseituna jukani? O ¿Andi úsïnki ubarhu jígusï jukani? Ístu no úati itsarhu enga itsï etumarha andarka itsï p'untsumarha jinguni andarani.

¹³Enga cha ma ísï sánderu mímixetika o míakua jukari p'ikuarherani; xarhate sési jámaparini ka kétsekua uératspeparini.

¹⁴K'óru engajtsï epurhpenhchajka ka iámendu ambe jimbojtsï andani uékani, ásï k'éramakorhe je jimboka inde chkuándirakua ambeska enga ójchakurajka imani ambe enga ísïka.

¹⁵Indeni jásï mímixekua no auandarhu anapuesti, parhakpeni anapuesti, k'uiripueri eratsekuesti, nóambakitiristi.

¹⁶Jimboka nani enga epurhperanhajka ka andaperanhani, jima nósesi irenhasti ka iámendu nósesi jásï ambe jima jarhasti.

¹⁷Ka auadarhu anapu mímixekua enga sánderu pímbinhaxeka, enga kurhangutspejka ka tekaatspentani, enga kurhandirajka, enga p'amojpejka ka sési ambeni, iámenduechani májkueni káasïndi ka no chkuándirasïndi.

¹⁸Ima engaksï sési arhijperakua ambe uéjka, sésiksï arhinhaati.