Read Western Highland Purepecha Santiago 4 Bible Online

Santiago 4 - Western Highland Purepecha bible

Santiago 4

¹¿Andi cha ambe jimbosï úrhutajki? ¿Andi no imani nósesi jásï p'ikuarhenhekua jimboesïni engaksïni ataakuni jarhajka?

²¿Chájtsï ambe tsitinhchasïnga ka nójtsï úsïnga kángorheni? Mámaru ambe jimbojtsï epurhpesïnga ka jimbokajtsï no úsïnga kámani ambe engajtsï xáni kánhchani jarhajka, úrhutasïngajtsï, ka uarhipesïngajtsï. Ka nójtsï intsïnhasïnga jimbokajtsï Diósïni no kurhakusïnga.

³Ka engajtsï kurhajkorhejka nójtsï intsïnhasïnga jimbokajtsï nósesi ambe niátataranhchani kurhajkorheni jarhajka.

⁴¡Ísku jándicha! ¿Andi nójtsï míteski, eska engajtsï parhakpeni anapu ambeni xénhchaaka, arhikuekasïnga eskajtsï Diósïni ikiakusïnga? Ima enga parhakpeni anapu ambe pámpiri újka, no Diósï jingunisti.

⁵¿O cha uandasïnki eska Karakata ískusï arhijka eska Diósï kánekua xénhchasïnga Espirituni engajtsïni íntskuka?

⁶K'órujtsïni Diósï sánderu kóndentasïndi; jimbosï karakata jimbo uandati: Diósï no xénhchaasïndi imani engaksï k'éramakorhejka ka kóndeasïndi imechani engaksï kétsekua uératspejka.

⁷Diósïni kurhandiraku je, ka nóambakitini anhatseku je ka imaksïni ísï kéndikucheati.

⁸Diósïni andarhera je ka ima cha jinguni jauati. K'amanharhintsticha, jupajkuntsï je, ka cha engajtsï tsimanitsimaneajka, mintsitani pímbinhajkuntsï je.

⁹Jiókorhe je eskaksï nómbema jatsikorheska, mískorhe je ka uera je. Jurajkue chári tsípekua uekuentani, ka chári tsípekua mískorhekua úkorhentani.

¹⁰Jurajkuksïni Diósï kámani eskamendu ima na uéjka ka imaksïni k'érikuarhu péraati.

¹¹Erachicha, ásï jáma je uandatsejpeni. Jimboka ne enga erachini ma uandatsejka o arhinhchani, juramukuanisï arhinhchani jati. Ka ekari juramukuani no jaiapanhentani jaka, t'újturi ísï jámani juramukuani no kurhandirakuxaka, ka ísï jimbori t'újtu útatspiri úkorheskia.

¹²Ka májkusï juramukua íntspejti, ka imajkusï arhinharhikpejti ka imajkusï p'ímutpentajti o k'amajkpeni. ¿Ka t'u ambemendueski engari máteru nemani arhinharhikuni uéjka?

¹³Ka iásï kurha je sési cha engajtsï uandajka: “Iásï o pauanichi amani k'éri iretarhu niuaka, ka jimachi jauaka ma uéxurhini, atarantaakachi ambe ka andakuakachi”;

¹⁴chájtsï no míteska pauantsï ambe úkorhenchaa. ¡Jimbokajtsï cha xántku ísïska eska xúmu enga sóndijku xarharka ka jimajku nóneni!

¹⁵Ka nójtsï sáni uandasïnga: “Enga Acha uékaska, sésichi jámani jauaka ka arini o amani ambechi úaka”.

¹⁶Chájtsï iásï jukari k'éramakorhexaka, ka inde k'éramakorhekua nósesi ambesti.

¹⁷Ima enga jurhenaka néna sési ambe úni ka jini no ísï jámani, k'amanharhintaxati.