Read Western Highland Purepecha Santiago 5 Bible Online

Santiago 5 - Western Highland Purepecha bible

Santiago 5

¹Ka iásï cháia jatsikorhericha, kánekua uera je imani ambe jimbo engajtsï úkorhenchani jámka.

²Chári jatsikorhekua terestia ka chári xukuparhakuani seperi k'amajkustia;

³chári tumina púxati ka enga ísï púni jaka, inde chári ts'éjperatesti ka indeksïnisï xántku ísï k'amajpaati eska chpíri na k'amajpejka. Iásïjtsï jatsikorhekua kánerakorheskia enga jurhiatekuecha k'amarhuni jámkia.

⁴Exe je; p'ikuntstichaksïni uinhachachexati imani tumina jimbo engajtsï no iámu maiamuaka; ka Acha, enga p'urhejkuticheri k'érika, kurhauastia ánchekorherichani engaksï uinhachani jaka.

⁵Chájtsï ixu parhakpeni ískusï irekorheni jaka, ka íntskukorhentasïngajtsï imani ambe engajtsï tsitijka; sésijtsï p'ukurakata jarhaskia eskaksï úakasïcha engaksï niáranchajkia uarhojchakunhani.

⁶Kaxumbitichantsï arhiaska eskajtsï na uékaka arhiani ka uándikuaskajtsï ka imaksï nómbe ma uandakorhesti.

⁷Erachicha kánekua tekaantsï je imani jurhiatekuani erokani enga Acha k'uanhatsentaaka. Exe je, na enga tarheri ma tekaantka ambakiti p'ikuntskuani erokorheni, náuejki ióndani o sóntku janintani.

⁸Chájtu kánekua tekaantsï je; chári mintsitechani uinhaperantsï je jimboka Acha janonguaxamkia.

⁹Iámendu ambe jaiapanhetsperantsï je, ka ísïjtsï no arhinharhikunhaaka; jimboka arhinharhikpiri andamukueraxakaia.

¹⁰Chájtu májkueni tekaantsï eskaksï Diósïri uandaricha engaksï nósesi ambe nitamakorhenhchani jarhempka.

¹¹Exe je, jucha tsípekua jinguni exeasïnga imani engaksï kómu jánguani tekaantajka. Chájtsï míteska na enga Jóbi xáni tekaantaka ka na enga ambe Acha xáni íntskuka k'amarhuni jámani; jimboka Acha p'amojpesïnga ka kóntpesïndi.

¹²Ka méntku ásï méni jáma je auandani jimbo ka níjtu parhakpenini jimbo ka níjtu máteru ambeni jimbo uandani ambe ma tsïrimerani uékani. Ju je jucha jurhimbitku arhini: ¡Jo! Arhini, enga jo arhikueuaka; ka ju je ¡Nómbe! Arhini enga nómbe arhikueuaka; ka ísï jámanichi no arhinharhikunhaaka.

¹³Eka cha ma ísï kómu nitamani jaka; Uandamukukorhe. Ka eka cha ísï tsípeni jaka; Diósïri pirekuecha arhiani jaue.

¹⁴Eka cha ma ísï p'amenchani jaka, arhiaue tata k'ératichani engaksï májkueni jakajkujka eskaksï uandapekuaka, ka eskaksï tamari atarhentaaka Acheri jakangurhikua jimbo.

¹⁵Ka uandamukukorhekua p'amenchatini ambakerantaati, ka Acha p'amenchatini jauataati, ka eka ambe k'amanharhintatini japiringa, púamenhantaati.

¹⁶Aiangperantsï je cha k'amanharhintskuechani ka uandapetspera je eskajtsï ísï jámani ambakeranhantaaka, jimboka kaxumbitiri uandamukukorhekua kánekua uinhapeska.

¹⁷Eliasi májkueni jáxespti eska jucha; mémechani uéntaspti uandamukukorheni eska no janipiringa, ka parhakpeni tanimu uéxurhini ka terujkani no janispti.

¹⁸Ka tátsekua ménderu uandamumukorhespti eska janipiringa ka janispti, ka echerirhu uánekua ambe jukaspti.

¹⁹Erachicha, eka cha ma ísï jurajkupkia imani enga ísïka ka máteru nema ménderu mintsikatarantani,

²⁰mítetini jaue eska ne enga k'amanharhintstini ma Diósïni andarhetentaaka, uarhikuarhu p'ímutantaxati imeri tsípekuani, ka úxati eskaksï uánekua k'amanharhintskuecha púanhantaaka.