Read Western Highland Purepecha 1 Pedro 3 Bible Online

1 Pedro 3 - Western Highland Purepecha bible

1 Pedro 3

¹Chájtu májkueni nanecha, chéti achetini kurhajcha, eka ma ísï acheti uandakuani no jakajkujka, eskaksï chári jángua jimbo imajtu jakajkuaka,

²engaksïni exeaka eskajtsï cha kaxumbeska ka eskajtsï janhanharhpesïnga.

³Ásï tájtsïkuntku kasïpentsï je; mámaru újtsïntatini ka mámaru ambe uekajchatini, ójtu ambakiti xukurhaparhatini,

⁴sánderu sáni sési jásï mintsita xarhata je, jimboka kaxumbekua no k'amakurhisïnga, ka Diósïni jimbo kánekua sési ambesti.

⁵Urhetkuksï xárhantasïrempti uarhiti pímbinharhaticha engaksï Diósïni mintsikempka, ka uámbanksï kurhajchasïrempti;

⁶Sara Abranini, Acha arhisïrempti ka kurhajchaspti. Chájtsï engajtsï sési ambe újka, Sara uájpeskajtsï, ka nójtsï chésïnga.

⁷Chájtu májkueni tatecha, irekuarhu uarhitini kurhanguku je, indeksï sési kánguesti, sési arhia je míaparini eskaksï indejtu tsípekueri kóntperakuani intsïnhaska. Janhanharhia je ka engajtsï ísï káaska, Diósïksïni kurhajchaati.

⁸Jinisïni arhikuekani jaka, eskajtsï iámendu ambe jimbo terukutsperaaka, ka kurhangutspera je, ka xénhchpera je eskaksï erachicha na xénhchperajka, p'amojkpera je ka méntkisï kétsekua uéra je.

⁹Engaksïni nósesi ambe úcheska, ásï nósesi útspentsï je, ka engaksïni útacheska, ásï útatspentsï je; méntku ménderueni, újchakurpe je, jimbokaksïni Diósï újchakuranisï ióarhika.

¹⁰Ima enga tsípekuani xénhchajka, ka sési irekorhekuekani, p'ímukukorhe, ásï uémuskorhe uandani ka ásï chkuádire,

¹¹ásteru nósesi ambe u je, sési ja je ka jángorhetsï je sési arhijperani jarhani.

¹²Jimboka Acha kaxumbitichani eranguani jarhasïnga ka kurhauasïndi engaksï uandamukorheni jarhajka, ka imechani engaksï nóambarhajka no xénhchaasïndi.

¹³Ísï, ¿Néksïnisï nósesi ambe úchea, engajtsï méntkisï sési ambe úaka?

¹⁴Ka engajtsï nósesi ambe úkorhenchaska imani ambe jimbo enga ísïka, chánksïni jimbo sésisti. Ásï nemani chérhe je ka ásï jáma je ísku úndani chéni.

¹⁵Méntku ménderueni, Achani, Krístuni chári mintsitecharhu k'érikuarhu péra je, ka méntkisïjtsï aianguaka imani engaksïni imani ambe kurhamarheaka enga cha mintsikani jaka.

¹⁶Kaxumbitku ka sési jásï mintsita jinguni ka janhanharhpeparini. Sési irekani ja je, ka ísïjtsï k'uratsetaaka imani engaksïni ambe arhiparhatani jaka, engajtsï cha sési jámaaka ka xarhatantsï eskajtsï Krístuni jakajkuparini irekaxaka.

¹⁷Enga Diósï ísï uéjka, sánderu sésisti nósesi ambe nitamanchani sési ambe úrini, eska nósesi nitamanchani nósesi ambe úrini.

¹⁸Jimboka Krístujtu, engajtsïni Diósï jinguni páka, juchari k'amanharhintskuechani jimbo, ma xanharkusï uarhika, ima enga no k'amanharhintstika, k'amanharhintstichani jimbo uarhisti, uándikunhasti ka espirituni jimbo tsíntasti.

¹⁹Ka Espiritu jimbo niraspti aianguantaani imani espirituechani engaksï jupikata jápka,

²⁰imechani engaksï Diósïni no uékapka kurhandirakuni jiájkani enga Noe k'éri icharhutani úni jápka, Diósï erokorhexapti eskaksï andarhentapiringa. Jiájkani engaksï no uánekua p'ímutanhantapka, engaksï iúmu tanimu k'uiripujku itsï jimbo p'ímutanhantapka;

²¹ka ima itsï, iásï itsï atajtsïkua arhikuekaxati engaksïni p'ímutantani jaka, ka no juparhekorhentskuesti, jinisï arhikuekajti eska sési jáxentaakia Diósïni japarini, Jesukristueri tsíntskua jimbo,

²²ka enga Jesukristu kénchentaka, Diósïni jurhijkandani jakusti, ka ánjelichaksï ka juramuticha ka juramukuechaksï kurhajchasïndi.