Read Western Highland Purepecha 1 Pedro 4 Bible Online

1 Pedro 4 - Western Highland Purepecha bible

1 Pedro 4

¹Krístunchkaksï nósesi kántaspti atani, chájtu ísï eratseni ja je eskajtsï atanhaaka: Ima enga atanhani kánhakia, nóteru úsïndia k'amanharhintani,

²ka engateru jamberi nótki uarhini jauaka, nóteru ísï irekorheati eskaksï parhakpeni anapuecha na nósesi jánhchajka, eska ísï irekorheakia eska Diósï na uéjka.

³Sésku jarhasptia ísï jámani eskaksï na jámapka ísï eska no jakajkuticha, tsînchekorhentatini, ka ísku jámanhchani, ka jukarijtsï kauisïrempka, ka diósï eratakatechanijtsï k'éri ambe arhiasïrempka.

⁴Indeni jimboksïnisï no jakajkuticha nósesi xéchejti engajtsï cha nóteru imecha jinguni jurajkutakorhentka nósesi ambe úni, ka jimboksïnisï xáni uandatsechejti.

⁵Imaksï Diósïni japarini uandantaati imani jimbo engaksï újka, ima enga tsípiticha ka uarhirichani k'uetsaperantajka.

⁶Jimboksïsï uarhiricha jamberi Ambakiti aiangperakuani aiangunhantati, ka arhinharhikunhatinksï ambe engaksï xáni úka engaksï tsípiti jámani jápka, eska imecheri espiritu úaka Diósï jinguni jarhani.

⁷Janoxatiia ima jurhia enga iámendu ambe k'amakurhiaka. Míakua juka je ka míani ja je ka méntku uandamukukorheni ja je.

⁸Ka sánderu sáni kánekua xénhchpera je, jimboka xénhchperakua uánekua k'amanharhintskuechani púatspeantaasïnga.

⁹Iámenduechani chénio sési eroa je, méntku nómbe ma uadatsejpeparini.

¹⁰Ka máteruecha jinguni sési úra je ambe engaksïni Diósï kóndeka.

¹¹Eka nema uadajka, ísï uande eska Diósï uandani jarhani; ka eka nema marhuatspeaka, ima uinhapekua jinguni marhuatspe enga Diósï íntskuka, ka ísï Diósï enga méntkisï k'érika ka uinhapekua jatsini, iámendu ambe jimbo Jesukrituni jimbo k'érikuarhu péranhaati, ka ísïue.

¹²Tátecha, ásï nósesi xe je indeni ts'éjkperakuechani jimbo engajtsï úkorhenchani jaka, ásï ísï xe je eskajtsï támusï ambe ma úkorhenchani jaka,

¹³sánderu sáni tsípe je engajtsï méntkueni nósesi kánhani jaka eska Krístu, ka chájtujtsï kánekua tsípeaka jiájkani enga Krístu k'érikuarhu xarhantaaka.

¹⁴Tsípe je cha engajtsï Krístuni jimbo útamenhaaka, jimboka Espiritu t'íntskueri, enga Diósïri Espiritueka cha jinguni méntkisï jámaxaka.

¹⁵Ásï nema jukanche nósesi p'ikuatanhani ka k'uratsetanhani jimboka atajpitiska ka jimboka sïpajkurheska ka jimboka nósesi úriska ka jimboka arhirperakua ínchaakutspeni jámsïnga.

¹⁶K'óru eka nema nósesi ambe úkorhenchaska ka Krístuni mintsikani, ásï k'uratse, k'éri ambe arhi Diósïni, jimbokajtsï Krístuni mintsikasïnga.

¹⁷Jimboka jurhiata janoskia enga Diósï imo anapuechani uénaaka arhinharhikuani. Enga jucha jinguni uénaaka, ¿Ambeksï xáni nósesi úkorhencha ima engaksï Diósïri ambakiti aiangperakuani no jakajkujka?

¹⁸Eka kaxumbiti ma úkua jimbo p'ímutantskorheaka, ¿Ambexamuksï xáni úkorhenchaa ima engaksï nósesi ambe újka ka k'amanharhintsticha?

¹⁹Ísï jimbo, ima engaksï ambe úkorhenchajka jimboka Diósï ísï uékasïnga, sési ambe ue ka imeri tsípekuani Diósï K'uerajpirini jurajkukue enga no jurajpejka.