Read Western Highland Purepecha 1 Juan 2 Bible Online

1 Juan 2 - Western Highland Purepecha bible

1 Juan 2

¹Jucheti uátsïticha, íni ambeksïni karachexaka, eskajtsï ísï jámani no k'amanharhintaaka. Ka eka nema k'amanharhintaska, kángorhesïngachi ma, ne engajtsïni Diósïni japarini kuájpentaaka: Jesukristuni, enga kaxumbitika.

²Jesukristu, juchari k'amanharhintskuechani jimbo aiakorhesti uarhini, ka no juchari jimbojku, iámu parhakpeni anapuechani jimbo uarhisti.

³Ekachi Diósïri juramukuechani kurhandirakuajka, indeni jimbochi xarhatasïnga eskachi Diósïni míteska.

⁴Ne enga uandajka: “Ji Diósïni míteska” ka jini no kurhandirakuni imeri juramukuechani, chkuándiresti ka ima ambe enga ísïka no ima jinguni jámaxati.

⁵Diósïri xénhchperakua iámu xarharasïndi enga nema uandakuani kurhandirakujka. Ka indeni ambe jimbochi mítesïnga eskachi imani jinguni jarhasïngia.

⁶Ne enga uandajka eska Diósï jinguniskia, uétarhesïndi eska ísï irekaakia eska Jesukristu na irekapka.

⁷Jucheti xénhchakatecha, nóksïni jimbanhe ma juramukua karachexaka, imesti enga cha uénani jámantki jatsirini jápkia; íni ióntki anapu juramukuantsï kurhariskia.

⁸Ka k'óruksïni ísï íntskuxaka eska ambe jimbanheni, enga chári jimbo ka Jesukristueri jimbo ísïka; jimboka pájpakandekua nitamaxakaia ka jimboka t'ímarhandekua, enga ísïka, t'íntskaraxakaia.

⁹Eka nema uandajka eska t'ímarhandu jarhaskia ka jini erachi jémbani kurhunhekuni jarhani, útasteru pájpakandu jámaxati.

¹⁰Ne enga erachi jémbani xénhchajka, t'ímarhandu jarhasti, ka nómbema ójkutasïndi;

¹¹ka jimini ménderueni, ne enga erachi jémbani kurhunhejka pájpakandu jámaxati, ka no mítesti nani niraxamki, jimboka pájpakandekua pátenharhitaskia.

¹²Jucheti uátsïticha, íni ambeksïni karachexaka jimbokaksïni Diósï, Jesukristuni jimbo k'amanharhintskuechani puáchentaskia.

¹³Íni ambeksïni karachexaka chánksïni engajtsï míakua jukarikia, jimbokajtsï cha míteska imani enga uénani jámantkikia. Ka chánksïni tumbicha, karachexakaksïni jimbokajtsï nóambakitini úska andani.

¹⁴Jucheti uátsïticha, karacheskaksïni jimbokajtsï Táteni míteskia. Chánksïni engajtsï sapichani káajka, karacheskaksïni jimbokajtsï míteskia imani enga uénani jámantkikia. Tumbicha, karachexakaksïni jimbokajtsï uinhapiti jarhaska, Diósïri uandakua cha jinguni pakarasïndi ka nóambakitintsï andaskia.

¹⁵Ásï parhakpeni anapu ambe xénhcha je ka imani ambejtu ásï xénhcha je enga parhakpeni jaka. Eka nema parhakpeni anapu ambe xénhchajka, Táteri xénhchperakua no imani jinguni jarhasti.

¹⁶Jimboka no Táteriska iámendu ambe enga xáni parhakpeni jaka: Ísku jánhchani; iámu ambe atamarheni, ka jatsikorhekua jimbo sési xékorheni.

¹⁷Íni parhakpeni anapu atamarhekua ísku nitamamasïndi; ka ima enga Diósïni kurhandirakujka méntkisï jauati.

¹⁸Jucheti uátsïticha, parhakpeni k'amarhuxamtia ka chájtsï míteska eska Krístu eratakorheti juuaka, ima enga Krístuni ikiakujka; enga úka, uánekuaksï Krístueri ikiatspiricha xarharastia. Jimbochisï míteka eska parhakpeni k'amarhuxamkia.

¹⁹Imaksï jucha jingunispti, enga úka, nóksï jucharispti. Ekaksï sési jimbo jucharipiringa, jucha jinguniksï pakarapirindi, ka imaksï nirasti ka ísï jámanksï xarhatasïndi eska nóma ima jucharispka.

²⁰Ka chánksïni k'óru, Krístu enga Sántueka, imaksïnisï Espiritu Sántuni íntskuti, jimbojtsïsï iámenduecha míteka ambe enga ísïka.

²¹Nóksïni karachexaka jimbokajtsï no míteska imani enga ísïka, sánderu sánksïni karachexaka jimbokajtsï míteskia; ka jimbokajtsï míteska eska nóma chkuándirakua imeriska enga ísïka.

²²Ka nóchka imasï chkuadire andi enga uandajka eska Jesusi no Krístueska. Indechkaksïsï Krístu eratakorhejti engaksï Krístuni ikiakujka jimbokaksï Táteni no jiókorhesïnga ka engaksï Uájpantu no jiókorhejka.

²³Ne enga Uájpani no jiókorhejka, Táteni no kángorhesïndi; ka ne enga uandakorhejka eska Uájpa jinguniska, ima Tátentu kángorhesïndia.

²⁴Ísï jimbo patsanhekorhe je imani ambe engajtsï uénani jámantki kurharikia; eka chári mintsitarhu ima ambe jaka engajtsï uénani jámantki kurhaka, chájtujtsï Uájpa ka Táte jinguniuaka.

²⁵Indenimendujtsïnisï Jesukristu aiacheti: Eska chári tsípekua nómeni k'amakurhiaka.

²⁶Íni ambeksïni karachexaka imechani míaparini engaksïni uéjka támu jánhastani.

²⁷Enga úka, chájtsï kámaxaka Espiritu Sántuni, engaksïni jimbo Jesukristu míngorhentaka, ka nójtsï uétarhenchasïnga eskaksïni máteru nema juuaka jurhendani, jimboka ima Espiritu engaksïni ima íntskuka, imaksïni iámu ambe jurhendasïndi ka ima ambe nómbema chkuándirakuesïndi, iámendu ambe ísïsïndi. Cha Krístu jinguni jámani ja je, eskaksïni Espiritu na jurhendaka.

²⁸Ka iásïa, jucheti uátsïticha, Krístuni jinguni ja je, ísï jamantsï nómbema chérheaka enga ima xarhantaaka ka nómbemachi k'uratsenharhini enga junguakia.

²⁹Ekajtsï mítetini jaka eska Jesukristu kaxumbeska, mítetini jakajtujtsï eska Diósï uájpeska ne engaksï kaxumbeka.