Read Western Highland Purepecha 1 Juan 4 Bible Online

1 Juan 4 - Western Highland Purepecha bible

1 Juan 4

¹Xénhchakatecha, ásï jáma je ne uéjkini jakajkukuni, urheta ts'éjkua je eska imecheri espiritu Diósïriska, jimbokaksï parhakpeni jámaxaka uánekua Diósïri uandari eratakorhecha.

²Enga arhijtsïkpiri ma uandajka ka jakajkuni eska ísïska eska Jesukristu k'uiripueni jurhaska parhakpeni, ima Diósïni jimbo uandaxati.

³Ka ne engaksï Jesusini no jiókorhejka, imaksï no Diósïristi ka imaksïsï Krístu eratakorhejti. Chájtsï mítetixapkia eska ísï jánhaskorhepiringa, ka ísï janhaskorhexatiia.

⁴Jucheti uátsïticha, chájtsï Diósïriska ka imechantsï andaarixakaia. Jimboka ima enga cha jinguni jaka sánderu k'ériska eska ima enga parhakpeni jámani jaka.

⁵Imaksï parhakpeni anapuesti, jimboksïsï parhakpeni anapu ambe uandaxejti, ka parhakpeni anapuechaksï jarhasïndi kurhajchaani.

⁶Juchachi Diósïriska. Ka imajtsïni kurhajchasïndi ne enga Diósïni míteka, ka ne enga no Diósïrika, imajtsïni no kurhajchasïndi. Ísïchi jánhaskasïnga eska espiritu sési jimboesïnga o eska nósesi jimboesïnga.

⁷Jucheti xénhchakatecha, ju je xénhchperani, jimboka xénhchperata Diósïriska, ka ne enga xénhchpejka, Diósïri kueraakatesti ka Diósïni mítesti.

⁸Ne enga no xénhchpejka, Diósïni nótki mítesïndi, jimboka Diósï, xénhchperakueska.

⁹Ima jimbo xarharasti eskajtsïni Diósï xénhchasïnga, enga parhakpeni axaka májku Uájpani enga kángorheka, eskachi imani jimbo tsípekua jatsiaka.

¹⁰Imeri xénhchperakua arisïsti: Nóchi juchasï Diósïni xénhchaka, imajtsïnisï xénhchati ka Uájpantsïni axachesti eska juchari k'amanharhintskuechani jimbo ima uándikunhapiringa.

¹¹Jucheti xénhchakatecha, engajtsïni Diósï xáni xénhchaka, juchajtuchi jatsiska májkueni xénhchperani.

¹²Diósïni nómeni, nónema exeristi. Engachi xénhchperajka, Diósï jucha jinguni jarhasïndi ka imeri xénhchperakuajtsïni k'amak'amasï janochestia.

¹³Jimbokajtsïni imeri Espirituni íntskusïngia, ísï jimbochi jánhaskasïnga eskachi ima jinguni jarhasïngia ka eska imajtu jucha jinguni jarhasïngia:

¹⁴Ka juchachi exekorheriskia ka uandantasïngachi eska Táte, Uájpani axaska eska iámu parhakpeni anapuechani ima p'íjpantaapiringa.

¹⁵Ne enga uandajka eska Jesusi Diósï uájpeska, Diósï jinguni irekaxati ka Diósïjtu ima jinguni irekaxati.

¹⁶Ísï jámanichi mítesïnga eskajtsïni Diósï xénhchasïnga ka mintsikasïngachi imani xénhchperakuani. Diósï xénhchperakuesti ka ne enga xénhchpejka, Diósï jinguni jarhasïndi ka Diósïjtu ima jinguni jarhasïndi.

¹⁷Ísï jámani úsïndi xénhchperata k'amak'amasï juchantsïni jinguni jarhani ka ísï jámanchi mintsikani jauaka imani jurhia enga arhinharhikperanhaaka, jimbokachi jucha ixu parhakpeni májkueni írekaxakaia eska Jesukristu.

¹⁸Ne enga xénhchpejka, chéta no jatasti. Sánderu sáni k'amak'amasï xénhchperata jatasti, xénhchperata chétani kénditatspesïndi, jimboka chéta ikimekua jinguniska. Ísï jimbo ne enga chéjka, arhikuekasïndi eska nótki k'amak'amasï xénhchpesïnga.

¹⁹Juchachi xénhchpesïnga jimbokajtsïni Diósï urheta xénhchaska.

²⁰Eka nema uandajka: “Ji Diósïni xénhchasïnga”, ka erachi jémbani kurhunheni, ima chkuándiresti; jimboka ne enga erachi jémbani no xénhchkajka, enga exeni jaka, no úati Diósïni xénhchani enga nómeni exerika.

²¹Ka Jesusijtsïni arisï juramuchesti: Ne enga Diósïni xénhchajka, erachi jémbantu xénhche.