Read Western Highland Purepecha Apocalipsis 1 Bible Online

Apocalipsis 1 - Western Highland Purepecha bible

Apocalipsis 1

¹Tata Jesukristueri jánhastperakua enga Diósï exeraka, eska jántspiri jémbechani íntsapiringa ambe enga úkorheni jámka, ka ísï jimbo Jesukristu ánjeli jémbani axaspti, jántspiri jémba Juánuni jánhastarani,

²eska Diósïri uandakuani uandantaaka, ka ístu Tata Jesukristueri ambe uandantani, ka iámendu ambe enga xékorheka.

³Tsípeati ne enga arhintajka, ka ima engaksï kurhani jaka ambe enga arhini jaka i uandakuecha, ka úranksï jarhani ambe enga xáni karakata jaka, jimbokaksï jurhiatekuecha janoxaka.

⁴Ji Juánu, uandajperata ma axakuasïnga, iúmu tsimani tángorhekuechani engaksï Ásia jaka: Cha jinguni jaue sési pájperakua ka kóntperata, imeri enga jindeka, enga jindepkia ka enga juuaka, ka ístu iúmu tsimani espirituecheri engaksï imeri k'éri uaxantskuarhu urhepani jaka,

⁵ka ístu Jesukristueri enga mintsinharhikueka ka enga urheta tsíntaka, enga iámendu irechechani íni parhakpeni k'érikuaani jaka. Ka engajtsïni xénhchajka ka imeri iurhiri jimbo k'amanharhintskuechantsïni kénditacheani,

⁶ka májku iretajtsïni úntasti, jima engaksï Diósïni tátjembani jántspekuaka, k'éri ambe arhinhe ka k'éri ambesti imeri uinhapekua méntkisï, ka ísïue.

⁷¡Era je, janikuecharhu ísï juuati! Iámenduechaksï éxeati, imaksï jamberi exeati engaksï p'orhonhapka, iámendu ireta parhakpeni anapuechaksï p'amondakorheati. Jo ísïuati.

⁸“Jíska uénakua ka k'amarhukua,” uandaxati Acha Diósï, “Enga jindeka ka enga jindepka ka enga jurhani jaka, enga iámu uinhapetika.”

⁹Ji Juánu, chári erachi, ka engani méntkueni nósesi nitamakorheka, ísï eska Jesusi jámaparini ka tekantsparini, Pátmusï ómekuarhu jupikata jarhaspka, jimbokani Diósïri ambe uandantasïrempka, ka Jesusiri jurhentpekuani tsïrimerani.

¹⁰Acheri jurhiatekua jimbo Espiritueri uinhapekuarini p'iraspti, ka kurhaspka nemarini tátsepani uinhachacheni, eska kústakua ma p'uninhanhani.

¹¹Engarini arhimpka: “Karantsï ka takurantsï ambe engari exeaka, ka iúmu tsimani tángorhekuechani: Éfesu ka Esmirna ka Pérgamu ka Tiatira ka Sárdisi ka Filadelfia ka Laodisea anapuechani axakua.”

¹²Ka eraparhaspka exekuekani nérinisï uandaxecheni japi, ka iúmu tsimani tiripitiri ch'urhinguechani exeaspka,

¹³ka ch'urhinguecharhu terujkani jarhaspti, Acheti uájpeni jásï ma jantsirirhu jamberi xukuparhantatini ka jonguarhekua tiripitiri ma p'andanhetini.

¹⁴Kánekua t'upujtsïni eska xurhata ka eska iéstakua, ka chpírini éskasïrempti;

¹⁵ka tiámu tsárakateni jándurhaspti, enga kánekua tinhameni jarhajka; ka iurhekua k'érini ma uandasïrempti, enga uinhamu kétsemani jarhajka.

¹⁶Ka t'irejkandani iúmu tsimani jóskuechani jatsiaspti; ka atajpetarakua ma tsimoru sési uarhomutini uéchasïrempti; ka t'ít'ijkusïrempti, eska tata jurhiata t'éjkamatirhu jarhani.

¹⁷Engani éxepka, kuarhatsespka ka miripakurhini ka méntkuni imani andandukuererani; ka imarini jájki t'irejkandani jimbo p'arhespti, ka arhisptirini: Ásï che, jíska uénakua ka k'amarhukua,

¹⁸engani tsípiti jaka, uarhirixapka exe iásï tsípekua jatsiska enga nómeni k'amakurhiaka, ka uarhikueri mítakuechani ka ístuni uarhicho anapu ji jatsiaska.

¹⁹Karantsïchka ambe engari exeka: Ka ambe engari exeni jaka, ka ambe engateruri exeaka.

²⁰Ísti jánhastperakua iúmu tsimani jóskuecheri engarini jurhijkandani erajkuaka, ka iúmu tsimani tiripitiri ch'urhinguecheri: Iúmu tsimani jóskuechaksï ánjelichesti engaksï tángorhekuecharhu jaka, ka iúmu tsimani ch'urhinguechaksï tángorhekuesti.