Read Western Highland Purepecha Apocalipsis 13 Bible Online

Apocalipsis 13 - Western Highland Purepecha bible

Apocalipsis 13

¹Ka tátsekua nósesi jásï tsípiti manakorherini exespka enga témbeni sïuangua ka iúmu tsimani éjpu jukaaka, k'éri japundarhu uémeni jarhani ka sïuanguecharhu kanakua jukajtsïatini, ka nósesi jásï ambe k'éramakorhetarakua kararhutini enga Diósïni útakuenka.

²Ka nósesi jásï tsípiti manakorheri engani exeka místu pápueni jáxespti, ka ósueni jándurhani, ka púkini jándirani. Ka k'éri kakoni uinhapekua ka irechekua ka iámu juramukua imani íntskusti.

³Ka éjpurhu ma kánekua arhajtsïtixapti, k'óru nimajtsïspti jima enga xáni kánekua arhajtsïtini jápka. Ka iámenduechaksï ísku pakaraspti nósesi jásï tsípiti manakorherini exerini ka chúxapastiksï,

⁴ka k'éri kakoninksï tinguixurhikuspti, jimboka nósesi jásï tsípiti manakorherini uinhapekua íntskuspka, ka ístuksï tinguixurhikuspti nósesi jásï tsípitini arhiparinksï: “¿Nema ua nósesi jásï tsípitini andani? Ka ¿Nema ua indeni jinguni uarhipeni?”

⁵Ka sési xekorheparini uandaranhaspti, Diósïni arhimarheni, ka tsimani ekuatse ka tsimani kutsï juramukua intsïnhaspti;

⁶ka ima uénaspti nósesi ambe uandani, Diósïni arhimarheni ka imeri k'umanchekuani ka iámendu auandarhu anapuechani.

⁷Ka sésikua intsïnhaspti Diósïri pímpinhasï iretani urhutakuani ka andani, ka iámendu k'uiripuechani iápuru ísï anapuechani ka iámendu jásï uandarichani ka iretechani juramukuaspti,

⁸ka k'éri ambe arhiatiksï iámendu parhakpeni anapuecha engaksï no xarhantaka tsípekueri karakatarhu enga uénakuarhu urheta jaka, enga karichi uándikukaterika.

⁹Ne enga újka kurhani, kurhaue:

¹⁰“Ne enga k'ataperakuarhu pákueka, k'ataperakuarhuchka pánhaati, ka ne enga tiámu jimbo uándikpeaka, tiámu jimbo uarhiati.” Ixu jakajkuticheri tekaantskua ka mintsikua uétarhesïndi.

¹¹Ka tátsekua máteru nósesi jásï tsípiti manakorherini exespka echerindu uétseni jarhani, ka tsimani sïuangua jukaaspti karichirini jarhati, ka k'éri kakonini uandasïrempti.

¹²Iámu juramukua jatsisti máteru nósesi jásï tsípitiri enga uémepka, ka eska parhakpeni anapuechaksï nósesi jásï tsípiti urheta anapuni k'éri ambe arhipiringa, imani enga nimajtsïpkia.

¹³Ka k'érati míndechani úasïrempti, chpíri jamberi auandarhu uératini uekopasïrempti, k'uiripueri japandiru,

¹⁴ka parhakpenirhu anapu k'uiripuni imani míndechani jimbo tandonhastaani, enga sésikua intsïnhapka nósesi jásï tsípitini marhuakuparini, arhiaparini parhakpeni anapuechani eskaksï nósesi jásï tsípitini eratakua ma úkupiringa, enga atajpetarakua uarhomuti jimbo atakata jápka ka ménderu tsíntani.

¹⁵Ka sésikua intsïnhasti eska eratakata úkatani tsípekua íntskuaka, ka eska eratakata úkata úpiringa uandani ka uándikutarkorheani néni enga imani no k'éri ambe arhipiringa.

¹⁶Ka iámenduechani t'irejkandani jatsijkutarkorheasïrempti o jatsirhukutarkorheani mínda, k'érati ka sapirhatichani, jatsikorheri ka no jatsikorherichani, ka ánchetpirichani ka jántspirichani;

¹⁷ka eska nónema úpiringa ambe piáni o atarantani, imajku engaksï mínda jukapiringa engaksï nósesi jásï tsípitiri jakangurhikuani o imeri miurantskuani jukapiringa.

¹⁸¡Mímixekua ixu jarhasti! Ne enga újka jánhaskani, eratsekunte nósesi jásï tsípitiri miukua; tanimuestiksï kuímuecha, (666) k'uiripueri miuntskua máesti.