Read Western Highland Purepecha Apocalipsis 14 Bible Online

Apocalipsis 14 - Western Highland Purepecha bible

Apocalipsis 14

¹Ka tátsekua eraspka, ka juátarhu enga Sióni arhinhka Karichini ma exespka anhajtsïkuni jarhani, ka imani jingunksï jarhani iúmu tsimani ekuatse ka t'ámu míli (144 míli) k'uiripuecha engaksï Karichiri ka Tátjemberi jakangurhikuani kararhutini jápka.

²Ka auandarhu uinhamu kurhanchengorhespti, eska kánekua itsï iurheni jarhani ka eska k'éri ma charancheni; ka ima k'éri kúskakua engani kurhauempka uánekua sétimuenksï kurhakorhespti.

³Ka k'éri uaxantskuani ka t'ámu tsípitichani, ka achamasïchani pirekua jimbanheksï ma pirekuasïrempti. Ka nónema úsïrempti pirekuani jurhengorheni, imajkuksï iúmu tsimani ekuatse ka t'ámu míli (144 míli) mítespti, engaksï parhakpeni euajpenhantapka.

⁴Íksïsï uarhimasïni nómeni p'árheti, tumbistiteruksï. Íksï karichini iápuru isï chúxapasïndi, ka parhakpenirhuksï p'ímutanhantasti ka íksï uénaspti Diósï ka Karichi jingunintani.

⁵Ka nóksï ma chkuándirakua jinguni p'iáranhasti, jimbokaksï kaxumbitiska.

⁶Ka máteru ánjelini exespka auandarhu teruncheni isï kárani jarhani, ka ambakiti aiangperakua kámaxapti enga parhakpeni anapuechani ka iámendu k'érati iretechani ka iámendu jásï uandarichani aianguapiringa.

⁷Arhiasïrempti uinhachaparini: “Diósïni chérhe je ka pirekuni je, jimboka utatsperakueri jurhiatekueskia. K'éri ambe arhi je imani enga auandani ka parhakpenini, ka japundani ka itsïarhuechani kueraaka.”

⁸Ka máteru ánjeli chúngumasïrempti, arhiparini: “Babilonia xerendurhinhastia k'amajkunhastia, k'éri ireta enga iámendu iretechani kauiraapka, imeri kauikua jinguni enga ískjandi újpejka.”

⁹Ka máteru tanimu úni jámani ánjeli chúngumaspti uinhachaparini: “Eka nema nósesi jásï tsípitini ka imeri úkatani komarhiska, ka jurajkutakorheni imeri míndani jatsirhukunhani o jatsijkunhani,

¹⁰imajtu Diósïri ikiateri kauikua intsïnhaati, enga nósani jeuetantskata jaka, ikimperatajkusï jatati. Chpíri jimbo ka janhajanhajkukua jimbo nósesi p'ikuarheratanhaati, imeri pímbinharhati ánjelicheri ka Karichini japarini,

¹¹ka imeri nósesi p'ikuerherakua sïrateni tarharaati méntkisï, nómenksï mintsikorheati chúrekua ka jurhiakua nósesiksï p'ikuarheratanhaati, imecha engaksï nósesi jásï tsípitini ka imeri úkatani k'éri ambe arhijka, méntkuenksï nitamanchaati ne engaksï imeri mindani jukaaka.”

¹²Ixu jarhasti erakukatecheri tekaantskua, engaksï Diósïri juramukuechani kurhandirakuajka ka Jesusinksï mintsikani.

¹³Ka auandarhu uératini uandakua ma kurhaspka, arhindini eskani ísï karapiringa: “Iásï uératinksï újchajkurakateuati ima engaksï Achani mintsikaparini uarhijka. Espiritujtu ísï uandaspti: Jo ísïsti, mintsikorheeksïa, jimboka imecheri ánchekorheta úkata jarhaskia.”

¹⁴Tástsekua eranchespka ka jánikua urapitini ma exeni; ka janikuarhu Acheti Uájpeni jásï ma uaxajtsïkutini jarhani, enga kanakua tiripitiri ma inchajtsïtini jápka, ka uarhojpatarakua ma sési uarhomukuntatini jupikatini jarhani.

¹⁵Ka máteru ánjeli tióstarhu uéraspti, ka uinhachakuspti imani enga janikuarhu uaxajtsïkupka: “Chéti uarhojpatarakua jimbo uarhojpantsï, jimboka jurhiatekueskia ka echerindu anapu tarheta xanistia.”

¹⁶Ka ima enga janikuarhu uaxajtsïkupka, iámu parhakpeni uarhojpantaspti ka iámendu uarhotakatani tántaspti.

¹⁷Ka uéraspti máteru ánjeli tióstarhu enga auandarhu jaka, imajtu uarhojpatarakua ma sési uarhomuti kámsïrempti.

¹⁸Ka kéjtsïtakuarhu máteru ánjeli uéraspti, enga chpírini juramukuempka, ka uinhachakuspti imani enga uarhojpatarakuani kámani jápka: Úberi t'imbirichani kachurhutaa, ka ma parhakpeni iámendu t'imbirichani kachurhutaa, jimbokaksï iámu ninirhukurhaskia.

¹⁹Ka ánjeli iámu parhakpenirhu úbechani kachurhutaaspti imeri uarhojpatarakua jimbo, ka úbechani k'éri ma tsitaratakuarhu jatsiraaspti, jima enga Diósï iámu puchandurhiauaka,

²⁰ka úba iretarhu uéramani t'auajchakunhaspti, ka tsitaratakuarhu kánekua iurhiri tsîmespti, ka tekechuechani kuakamuteraaspti ka tembeni iumu ekuatse (300) kilometru jamberi iurhespti.