Read Western Highland Purepecha Apocalipsis 19 Bible Online

Apocalipsis 19 - Western Highland Purepecha bible

Apocalipsis 19

¹Tátsekua i ambe nitamatinia, kurhaspka auandarhu uánekua uinhachanhani janhani uandanksï: “¡Aleluia! P'ímutantskua ka t'íntskua ka uinhapekua juchari Acha Diósïristi;

²jimboka Diósï sési k'uetsaperpentasïnga; jimboka uarhiti ísku jándini ikimeska, enga iámu parhakpenini ikichakua úka imeri ísku jángua jimbo, ka maiampetarantastia enga imeri erakukatechani uándikukuapka.”

³Ka ménderuksï uandaspti: “¡Aleluia! Imeri sïrata méntkisï tarharaxati ka nómeni k'amajpeati.”

⁴Jimajkani ma ekuatse t'ámu achamasïchaksï ka t'ámu tsípiti manakorherini jarhatichaksï kápatsentaspti Diósïni k'éri ambe arhini, enga k'éri uaxantskuarhu jaka, arhinksï: “¡Ísï úkorhestia, jo ísïue!”

⁵Ka uaxantskuarhu uandakua ma kurhakorhespti, enga arhimpka: “Juchari Acha Diósïni pireku je, iámendu k'érati ka sapirhaticha iámendu engajtsï jántspekujka ka engajtsï janhangarhijka.”

⁶Ka ísï kurhaspka eska ambe uánekua uinhachani janhani, ka eska kánekua itsï uekorheni jarhani, ka eska ambe k'érati charancheni jarhani, arisï kurhaspka: “¡Aleluia! Jimboka Acha uénaskia juramuni, juchari Diósï enga iámendu ambe újka úni.

⁷Ju je tsípeni kánekuachi tsípeaka ka k'éri ambe arhini, jimboka jurhiatekua niaraskia enga Karichi tembuchaaka. Ka tembunha jima jarhastia,

⁸ka ambakiti xukuparhakua urapiti t'uput'upusï jatsikunhantastia, xukuparhakua urapiti Diósïri kaxumbiticheri ambarhati úkuechesti.”

⁹Ka ánjelirini arhispti: “Ísï kara: Ima k'oria engaksï Karichiri tembuchakuarhu p'imarhenhaka t'ireni.” Ka arhisptiterurini: “Íksïsï Diósïri uandakuechamendueti.”

¹⁰Ka ánjelini k'éri ambe arhini tinguixurhikuspka, ka imarini arhispti: “Ásï ísï jáma, jíjtuni májkueni Diósïri jántspiriska eska t'u, ka eska chéti erachicha engaksï Jesusiri uandakuani p'itini jaka. Diósïndisï k'éri ambe arhiaka.” Jimbokaksï Jesusiri uandakuechasï, uandakua párichani uandarajka.

¹¹Ka exespka auanda mítakorhetini jarhani; ka tekechu urapiti ma xarharaspti: Ka jatari arhinhasïrempti: “Mintsinharhikua” ka “No chkuándira”; ka sési juramutspesïndi ka sési jimbo uarhipeni.

¹²Ka chpíri jemberatini járhati éskasïrempti; ka uánekua kanakua jukajtsïaspi; ka jakangurhikua karakata ma kámaxapti enga imajku mítepka.

¹³Ka takusï iurhiri panchoki jasï ma xukuparhatixapti; “Diósïri uandakua” arhinhansïrempti.

¹⁴Ka auandarhu anapu uarhipitichaksï tekechu urapiti jatarini chúxapaxapti, ambakiti takusï urapitiksï t'uput'upusï xukuparhatini.

¹⁵Ka tiámueri uarhipetarakua ma sési uarhomuti uéchasïrempti, enga jimbo no jakajkutichani atapiringa. Ka uinhapekua jinguni juramukuauati. Imasï ubachani tsitarhatakuarhu puchandurhiajti kauika tsitarhukuni, enga ísïka eska Diósïri kurhunhekua ikimpekua, Diósï enga iámendu ambe újka úni.

¹⁶K'uaparhakuarhu karaparhaspti ka tsíkajtakuarhu karajtarhaspti jakangurhikua ma enga: “Irecha irechecheri ka Acha achecheri” arhijka.

¹⁷Ka ánjelini ma exespka tata jurhiatarhu anhajtsïkutini jarhani, ka iámendu manakorheri káratichani engaksï iótakuarhu kárajka uinhachakuasïrempti arhiani: Ju je, Diósïri k'éri t'irentskuarhu tángorhentsï je,

¹⁸ka irechecheri k'uiripetajtsï auaka, ka p'urhejkuti urhejtsïkuricheri k'uiripetajtsï auaka, ka acheti ts'iueraticheri k'uiripetajtsï auaka, ka tekechueri k'uiripetajtsï auaka ka tekechu jataricheri k'uiripetajtsï auaka, ka iámendu jásï k'uiripueri k'uiripetajtsï auaka, ka ánchetpiricheri ka jántspiricheri k'uiripetajtsï auaka, ka k'érati ka sapirhaticheri k'uiripetajtsï auaka.

¹⁹Ka tátsekua k'éri nósesi jásï tsípitini exespka, ka parhakpeni anapu irechechani imeri p'urhejkuticha jingunksï tángorhentatini jarhani, jimbokaksï tekechu jatarini ka imeri uarhipetiachani jinguni uarhiperapiringa.

²⁰K'óru k'éri nósesi jásï tsípiti jupinhaspti. Ka diósïri uandari eratakorherijtu jupinhaspti enga nósesi jásï tsípitini míndechani úkuauempka, ka tandonhastaani imechani engaksï k'éri nósesi jásï tsípitiri mínda uékapka jukani, ka imechani engaksï k'éri nósesi jásï tsípitiri úkatani k'éri ambe arhimpka. Imaksï tsimarheni chpíriri japundarhu tsípitku k'uanimanhapti, enga janhajanhajkundini kurhini jaka.

²¹Ka máteruenchaksï tiámu uarhomuti jimbo uándikuaspti, enga tekechu jatari uéchempka, ka iámendu manakorheri káratichaksï niáchantaspti auantaani.