Read Western Highland Purepecha Apocalipsis 20 Bible Online

Apocalipsis 20 - Western Highland Purepecha bible

Apocalipsis 20

¹Ka ánjelini ma exespka enga auandarhu kétseni jápka, ka uarhicho jauanhekuarhu anapu mítakua kámaxapti, ka tiámu tepekata iósti ma jupikatini.

²Ka ima, t'arhe k'éri kakonini jupikaspti, enga iónisï akuitseka, enga Nóambakitika ka Satanasini, ka tiámu tepekata jimbo míli (1,000) uéxurhini jójkusti.

³Ka uarhicho jauanhekuarhu k'uaninhasti eska iretechani nóteru támisï jánhastaapiringa, ka sési mínhaspti ka mínda ma jatsimutani, enga jamberi míli uéxurhini andangupiringa; ka tátsekua k'uaniati eska sóndi jurajkunhaka.

⁴Ka tátsekua uaxantskuechani máru exeaspka, ka jimaksï uaxakaspti ima engaksï juramukua intsïnhapka úni arhinharhikpeni; ka máteru, kachujchakatecheri ánima exeaspka, engaksï ísï úmenhapka, jimbokaksï Jesusiri ka Diósïri ambe uandantaspka, ka jimbokaksï nósesi jásï tsípitini nómeni k'éri arhispka ka ni imeri diósï eratakatani, ka jimbokaksï no jurajkutakorhespka imeri mínda jatsirhukunhani o jatsijkunhani; ima ánimechaksï ménderu uéntaspti irekani ka Diósïri újchakurakata jinguni míli uéxurhinksï juramuspti.

⁵Ka máteru uarhiricha engaksï pakarani jápka nóksï tsíntaspti, eka no urheta míli uéxurhini nitamapiringa. Imaksï uénaspti tsíntani.

⁶Tsípeatiksï ka Diósïriksï erakukatesti ima engaksï uénaka tsíntani; jimboka enga ménderu uarhinhaaka, uarhikua nóteru ambe ma úkuauatia, Diósïri ka Krístueri táteuatiksï, ka ima jingunksï míli uéxurhini juramuati.

⁷Enga na míli uéxurhini nitamaakia, Satanasi petanhantaati,

⁸ka niuati iretechani tandonhastaani engaksï parhakpeni t'ápuru pírhukutini jaka, Góguini ka Magoguini, tánantauati uarhipekuarhu páani; xánksï uaneati eska kutsari japundarhu anapu.

⁹Ka ma parhakpeni, iámu kóstiksï xanharaspti, ka Diósïri erakukatechaniksï ka imeri ireta xénhchakatantuksï uirhipandaspti. K'óru auandarhu uératini chpíri uekorhespti ka iámu kurhiraani.

¹⁰Ka Nóambakiti tandonhastpiri, japundarhu k'uanimanhaspti, jima enga kurhimeni jaka ka janhajanhajkundini jarhani, jima engaksï k'éri nósesi jásï tsípiti ka diósïri uandari eratakorheri jakaia; jimaksï chúrekua ka jurhiakua, méntkisï nósesi p'ikuastanhani jauati.

¹¹Ka tátsekua k'éri uaxantskua urapitini ma exespka, ka ima enga jima uaxakatini jápka. Imani japarinksï parhakpeni ka auanda sïpakorhekuspti ka nónesptiksï.

¹²Ka uarhirichantuni exeaspka engaksï k'éri ambepka, ka engaksï no k'éri ambepka, k'éri uaxantskuarhu urhepaniksï anhaxurhitin jarhani, ka karakatechaksï máru p'irakunhaspti, ka uarhirichaksï arhinharhikunhaspti eskaksï karakatecha na arhimpka, néna engaksï jámapka; ka karakata tsípekueri tátsekua p'irakunhaspti.

¹³Ka japunda íntspeantaspti uarhirichani enga jima jatsiapka, ka tata uarhicha uarhirichani íntspeantaspti enga uarhicho jatsiapka; ka arhinharhikunhasptiksï mándani arhini ísï eskaksï na jámapka.

¹⁴Ka tátsekua tata uarhicha ka imeri juramukua chpíriri japundarhuksï k'uanimanhaspti. Jimasï uarhinhajti tsimani úni jámani,

¹⁵ka ima enga no xénhantapka karakata tsípekuerirhu imajtu jima k'uanimanhaspti.