Read Western Highland Purepecha Apocalipsis 21 Bible Online

Apocalipsis 21 - Western Highland Purepecha bible

Apocalipsis 21

¹Ka tátsekua jimbanhe auandani ka jimbanhe parhakpenini exespka; jimboka urheta anapu auanda ka urheta anapu parhakpeni nónespkaksïa, ka k'éri japunda nóteru jarhasptia.

²Ka Jerusaleni jimbanheni exespka, ireta erakukatani enga auandarhu uératini kétseni jápka, jini uératini enga Diósï jaka. Sési xukuparhantatini eska tembunha ma enga tembuchani nirajka kúmani.

³Ka kurhaspka nema k'éri uaxantskuarhu uératini uinhachani jarhani: “Exe je Diósïri k'umanchekua ísti enga k'uiripu jinguni jaka, ka Diósïri ireteuatiksï, ka Diósï imecha jinguniuati ka imecheri Diósïuati.”

⁴Ka Diósï, iámendu uekua kutsunharhikuauati, ka nóteru uarhinhatia ka nóteru uenhaatia ka nóteru p'amondakorhenhatia ka nóteru p'ameranhaatia jimboka uénakuarhu anapu irekua nóteru jarhaskia.

⁵Ka ima enga uaxakatini jápka k'éri uaxantskuarhu uandaspti: “Exe iámu ambe jimbanhe úntaaka.” Ka arhisptiterurini: “Kara, jimboka íksï uandakuecha mintsïkueska ka ísïstiksï.”

⁶Ka arhisptiterurini: “Iámendu ambe úkata jarhastia. Jísïni Alfaeka ka Omegeni, uénakuaka ka k'amarhukuani; Ne enga k'arhichaaka ji itsïarhu anapu itsï tsípekueri intsïmataaka.

⁷Imeriuati iámendu ambe enga ts'iuentaaka ka no kuatantani: Ka ji imeri Diósïuaka ka ima jucheti uátsïtiuati.

⁸K'óruksï chémsïcha ka no jakajkuticha ka nósesi irericha ka uándikpiticha ka ísku jándicha ka sïkuamecha ka engaksï úkatechani diósïrajka ka iámendu chkuándirechaksï chpíriri japundarhuksï k'uanimanhaati, jima enga janhajanhajkundini jaka, jimasï tsimani úni jámani uarhinhajti.”

⁹Ka ánjeli márini andarheraspti enga iumu tsimani tsúntsuechani káani jápka, enga k'amakurhikueri kasïngurikuechani uiniraatini jápka, ka uandajpasptirini arhiparini; “Jútkiria, tembunhankini exeraaka, enga karichiri témbeka.”

¹⁰Ka espiritueri jánhaskua jimbo, ánjelirini k'éri juáta iótatirhu ma páspti, ka Diósïri ireta Jerusaleni erakukatarini exeraspti, auandarhu uératini kétseni jarhani,

¹¹Diósïri t'íntskua jinguni. Imeri t'íntskua, tsakapu merearini jáxespti, enga xunhupenharhi meremerejkuni jarhajka,

¹²Ka ma uirhipandani tsïntsïkata iótati ótakorhespti, ka témbeni tsimani inchakua jukaspti, ka mándani inchakuarhu ánjelichaksï jarhaspti; ka témbeni tsimani jakangurhikuechaksï karamukurhaspti engaksï iúmu tsimani ireta Israeli uájpecheka;

¹³tanimuksï jurhiata andarhakuarhu ísï jukaspti; ka tanimuksï karhamani isï jukaspti; ka máteruksï tanimu kétsemani ísï jukaspti, ka máteruksï tanimu jurhiata inchajtsïkukuarhu isï.

¹⁴Ka tsïntsïkata témbeni tsimani tsakapuecharhu píjtsïkuspti, ka témbeni tsimani tsakapuchani Karichiri uandakua páricheri jakangurhikua jukanharhispti.

¹⁵Ka ánjeli enga jinguni uandaxeni jápka, tíripitiri p'atamu ts'éretatarakua ma kámaxapti enga jimbo iretani ts'éretapiringa ka inchakuechani ts'éretapiringa ka tsïntsïkatani enga uirhipandapka.

¹⁶Ka k'éri ireta t'ámu tsumbindikua jukaaspti; méntkueni ióskaspti ka kóskani. Ánjeli p'atamu jimbo iretani ts'éretaspti: Iúmu irepeta kilometru jópkurhani k'éspti, xáni iótaspti ka ióskani ka kóskani iápuru isï.

¹⁷Ka ánjeli tsïntsïkatani ts'éretaspti: Ka iúmu tsimani ekuatse ka t'ámu ióxurhakua iótaspti, eska ma k'uiripu na ióxurhajka ánjelijtu ísï ts'éretaspti,

¹⁸ka tsïntsïka tsakapu xunhupenharhi meremeresï jimbo tsïntsïkatespti; ka ireta tiripiti meremerejkutirispti.

¹⁹Ka tsïntsïkata, k'énharhi tsakapuecharhu píjtsïkuspti, engaksï sési kasïpeni jápka: Tsakapu xunhupenharhi meremeresï uénani, ka máteru tsakapu safirueri, ka tanimu úni jámani ágateri, ka t'amu úni jámani esmeralderi.

²⁰Ka iúmu úni jámani óniseri, kuímu úni jámani kornalineri, ka iúmu tsimani úni jámani krisolitueri, ka iúmu tanimu úni jámani berilioueri, iúmu t'ámu úni jámani topasioueri, ka témbeni úni jámani krísopraseri, ka témbeni ma úni jámani jasintueri, ka témbeni tsimani úni jámani amatisteri.

²¹Ka témbeni tsimani inchakuechaksï pérlerispti; mándani inchakua ma pérlespti. Ka ireteri kópekua tiripiti pinbinhanharhirispti.

²²Ka ima iretarhu no ma tiósïo exespka, jimboka Acha Diósï enga iámendu ambe újka úni, sési iápuru isï jarhaspka, ka Karichijtu iápuru ísï jarhaspti.

²³Ka ireta no uétarhenchasïrempti eska tata jurhiata o nana kutsï eramarharantskapiringa, jimboka Diósïri t'íntskuasï t'íntskarempka, ka Karichi imeri eramarhandekuesti.

²⁴Ka iretechaksï imeri eramarhandekuarhu xanharaati, ka parhakpeni anapu irechecheri k'érikuaksï imani k'érikua íntskuntaati.

²⁵Ka inchakuechaksï chúskutani no míkorheati, jimboca jima nómeni chúreaka.

²⁶Ka iretecheri k'érikuechanksï jima pérakuati ka iámendu imecheri jatsikorhekua.

²⁷Ka jima nómeni ikichekueni jásï ambe inchaati, ka níjtu nema enga ikichakua ambe niátajka o chkuándireni, imajkuksïsï inchaati engaksï Karichiri tsípekueri karanharhikukatarhu jataka.