Read Western Highland Purepecha Apocalipsis 22 Bible Online

Apocalipsis 22 - Western Highland Purepecha bible

Apocalipsis 22

¹Ka tátsekuarini ánjeli exeraspti iurhekua sési pímbinhanharhi tsípekueri, mereanhari xani pímbinhanharhini, ka iurhekua Diósïri uaxantskuarhu ka Karichiri uaxantskuarhu uérasïrempti.

²Ka terujkani xanharu imani iretarhu, anhatapu tsípekueri jukaspti enga iurhekuani jiniani ka ixueni jamberi niárakuempka, ka témbeni tsimani xanhari amanhejchakua jukasïrempti, mándani kutsï ma xanhari; ka chkúrhichaksï marhuasïrempti iretarhu anapu p'amenchatichani ambakerantaani.

³Ka nóteru nema ikimenhati; jimboka Diósïri uaxantskua ka Karichiri uaxantskua imani iretarhuksï jauaka, ka Diósïri jántspirichaksï k'éri ambe arhiati,

⁴ka Diósïnksï erateati, ka imeri jakangurhikuanksï kararhuati.

⁵Ka jima nóteru méni chúreati; ka nóteruksï uétarhenchaati erajkutarakua ka tata jurhiateri t'íntskua nóteru uétarheati jimboka Acha Diósïri t'íntskua erajkutauaka; ka Ima méntku ísï juramuati.

⁶Ka tátsekuarini ánjeli arhispti: “Íksï uandakuecha mintsinharhikuesti ka jurhimbekueni; ka Acha Diósï enga imeri uandakua párichani p'ikuarhenhetaaka, ánjelini axasti imeri jántsïpirichani xarhatakuani ambe enga no ióni jimbo úkorheaka.”

⁷Exe je, ji junguaxaka sóntku, ima k'oria enga aiangperata uandakuani patsaaka enga íni karanharhikukatarhu karakata jaka.

⁸Ji Juánueska engani íni ambe kurhaka ka exeni. Ka ísï kurharini ka exerini, ánjelini tinguixurhikuspka k'éri ambe arhini engarini iámendu íni ambe exerapka.

⁹K'órurini ima arhispti: “¡Ásïchka ísï jámani ja! Jimbokani jíjtuni Diósïri jántspiriska ísï eska t'u ka eska chéti erachi Diósïri uandakua páricha, ka eska ima engaksï uandakuechani patsajka engaksï íni karakatarhu jaka. Diósïndisï k'éri ambe arhiaka.”

¹⁰Ka arhisptiterurini: “Ásï jáma jískani indeni aiangperakuani enga íni karakatarhu karanharhikukata jaka, jimbokaksï jurhiatekuecha janoxakaia.

¹¹Jurajku nóambakiti k'uiripu útasï nóambakeni; ka eska ikichakua úri útasï ikichakua ambe úaka; ka jurajku eska ambakiti k'uiripu ambakiti ambe úni jauakateru, ka ne enga kaxumbentakia sánderu kaxumbente.”

¹²“Exe je, ji no ióndani junguaxaka ka jucheti andakua juákorhexaka ka éskajtsï na xáni úrini jaka, mándani arhinksïni maiamuntaaka.

¹³Jísïni Alfeka ka Omegeni, uénakua ka k'amarhukua.”

¹⁴Ima k'óruksïa engaksï xukuparhakuani jupakorheaka, sésikuaksï jatsiati imani anhatapu tsípekuerini akurhutani ka iretarhu inchaakuntani.

¹⁵K'óruksï nósesi úricha uérakua pakaraati, ka sïkuamecha ka ísku jándicha, ka uándikpiticha, ka ima engaksï úkata eratakatechani diósïrajka, ka ne uéjki enga chkuándireuaka.

¹⁶“Jesusiska ji, jucheti ánjelini axaska eska tángorhekuecharhu iámendu íni ambe uandantaaka. Ji Dabiri tsîuantskateska ka sïrukua jémbeni, ji K'uanhariska[1] enga tsípa meremerejkujka.”

¹⁷Ka Diósïri espiritu ka Karichiri tembunha uandasïndi: “¡Junguaia!” Ka ne enga kurhani jaka uande: “¡Jungua ia!” Ka ne enga k'arhichani jaka, andaparhakuere; ka ne engateru xáni tsípentajka p'itakorhe itsï tsípekueri.

¹⁸Ji aianguantaxaka iámendu imechani engaksï Diósïri uandakuani kurhajka, enga ixu karanharhikukata jaka: Eka nema jámaska máteru ambe kúnharhitani, Diósï axakuauati kasïngurhikuechani engaksï ixu karanharhikukata jaka.

¹⁹Ka eka nema p'ikuntaska uandakuechani íni Diósïri karakatarhu, Diósï euantaati sésikua akurhutani anhatapu tsípekuerirhu, ka nójtu inchaati ireta pímbinhandu enga ixu karanharhikukata jaka.

²⁰Ima enga íni ambe uandantajka, uandasïndi: “Sési jimbo ji junguaxaka.” ¡Ísïmendu u, juchari Acha Jesusi jungua ia!

²¹Tata Jesukristueri kóntperata jaue iámendu chánksïni jinguni. Ísïue.