Read Western Highland Purepecha Apocalipsis 5 Bible Online

Apocalipsis 5 - Western Highland Purepecha bible

Apocalipsis 5

¹Ka imani enga k'éri uaxantskuarhu uaxakatini jápka, erajkuspka jurhijkandani karakata ma kámani jarhani, enga tsimapuru karanharhikukata jápka, ka iúmu tsimani sélluechanksï jatsiparhakukata jarhani.

²Ka ánjelini uinhapitini ma xéspka, enga uinhachaparini kurhangorhempka: “¿Néua ima enga nitatarheaka sélluechani kueraparhakuani ka karakatani p'irakuni?”

³Ka nónema nitatarhespti, auandarhu o parhakpeni o echerindu inchatsekua, enga úpiringa karakatani p'irakuni ka eranharhikuni.

⁴Ka ji ueraniuerasïrempka, jimboka nónema xarharasïrempka enga nitatarhepka karakatani p'irakuni ka eranharhikuni.

⁵K'óru ima ma achamasïrini arhispti: “Ásï uera; exe, Judea anapu Púki andastia, Dabiri sïrukua; ima úati p'ikuani iúmu tsimani selluechani ka karakatani p'irakuni.”

⁶Ka xéspka karichi atakateni jásï ma anhandetini jarhani, terujkani jakuani k'éri uaxantskuarhu ka t'ámu manakorheri tsípitichani ka Achamasïchani, Iúmu tsimani sïuanguechani jukaspti ka iúmu tsimani éskuechani, engaksï iúmu tsimani espirituecheka enga Diósï ma parhakpeni axaaka.

⁷Ka ima Karichi niraspti ka karakata euajkuspti imani enga jurhijkandani kámani jápka, enga k'éri uaxantskuarhu uaxakatini jápka.

⁸Ka karakatani euajkutinia, t'ámu manakorheri tsípitichaksï ka ma ekuatse t'ámu achamasïchaksï Karichini tinguixurhikuspti. Iámenduksï árpechani jinguni, ka tiósxunhanda jatakuechanksï tiripitiri uiniraatini káaxapti, engaksï Diósïri erakukatecheri kómu-akueka,

⁹ka pirekua jimbanhe máksï piresïrempti arhiparini: “T'u k'óruri nitatarheska karakatani jupikani, ka selluechani p'ikuani; jimbokari atanhaska; ka chéti iurhiri jimbori piájpentaska ka iápuru ísï anapuechaniri ka iámenduri jásï uandarichani ka iámendu iretechani Diósïniri íntsantaska.

¹⁰Ka imecha jinguniri irechekua ma úska engaksï Diósï Táteni marhuakuaka, ka ma parhakpenksï juramuati.”

¹¹Ka exespka, ka kurhauaspka engaksï uánekua ánjelicha k'éri uaxantskuani ka manakorheri tsípitichani ka achamasïchani uirhipandaatini jápka. Xánksï uánespti engaksï jamberi no úempka miiunhani,

¹²ka uinhachasïremtiksï uandani: “Karichi enga uándikunhaka uinhapekua ka jatsikorhekua nitatarhesti p'irani, ka mímixekua ka juramukua ka k'érikua ka t'íntskua ka k'éri ambe arhinhani ka píremenhani.”

¹³Ka kurhaspka iámendu ambe enga Diósï kueraaka, enga auandarhu, ka echerindu inchatsekua ka japundarhu jaka, arhinksï jarhani: “Ima enga k'éri uaxantskuarhu uaxakatini jaka ka Karichijtu, K'éri ambestiksï ka janhanharhikuestiksï, t'íntskua ka juramukuaksï jatsisti iásï ka méntkisï.”

¹⁴Ka t'ámu manakorheri tsípitichaksï uandasïrempti: “¡Ísïmendue!” Ka achamasïchaksï tinguixurhispti, ka k'éri ambeksï arhini.