Read Western Highland Purepecha Apocalipsis 6 Bible Online

Apocalipsis 6 - Western Highland Purepecha bible

Apocalipsis 6

¹Ka exespka na enga karichi uénapka ma selluni p'ikuparhakuni, ka kurhaspka ima ma isï t'ámu manakorheri tsípitini enga characharameni uandempka: “¡Jútkini!”

²Ka eraspka ka tekechu urapitini ma exeni; ka ima enga jatarini jápka pitoki ma kámaxapti ka kanakua ma intsinhaspti, ka andapitini uéraspti, ka andatiteru.

³Ka enga tsimani úni jámani selluni p'ikuparhakupka, kurhaspka máteru manakorheri tsípitini uandani: “¡Jútkini!”

⁴Ka máteru tekechu charhapiti ma uéraspti, ka ima enga jatarini jápka sésikua intsïnhaspti sési pájperakua parhakpenirhu kénditani, ka eska uándikperanhaaka, ka k'éri ma tiámueri uándikpetarakua intsïnhaspti.

⁵Ka enga tanimu úni jámani sellu p'ikuparhakupka, kurhaspka máteru manakorheri tsípitini uandani, “¡Jútkini!” Ka eraaspka ka tekechu turhipitini ma exeni, ka ima enga jatarini jápka k'uetsapetarakua ma jupikatini jarhani.

⁶Ka uandakua ma kurhaspka teruakuni jima engaksï t'ámu manakorheri tsípiticha jápka, uandanksï: “Tríju ma k'uetsaperakata o sebada tanimu k'uetsaperakata, ma jurhiatekueri andakua jukaparhaati, k'óru asetini ka kauikuani ásï jukaparhara.”

⁷Ka enga t'amu úni jámani selluni p'ikuparhakupka, kurhaspka máteru manakorheri tsípitini uandani: “¡Jútkini!”

⁸Ka eraaspka ka tekechu xúnhuptsïni ma exeni, ka enga jatarini jápka Uarhikua arhinhasïrempti, ka uarhichao chúxapaxapti, ka uinhapekuaksï intsïnhaspti uándikuani ma t'ámu arhustakata parhakpeni anapuechani tiámu jimbo ka k'arhindekua jimbo, ka p'amenchakua, ka parhakpeni anapu apejpentsticha jimbo.

⁹Ka enga iúmu úni jámani selluni p'ikuparhakupka, exeaspka kéjtsïtakuarhu kétsekuaksï jarhani, imecheri ánimecha engaksï uarhikuarhu jamberi no jurajkuntapka Diósïri karakatani uandantani.

¹⁰Ka uinhachasïremptiksï uandani: “Acha engari pímbinhaxetika ka mintsinharhikuendi ¿Na jatinimenduri, ikimiaua parhakpeni anapuechani ka uándikuantandi, ísï eskajtsïni juchantsïni na uándikuka?”

¹¹Ka xukuparhakua urapitiksï intsïnhaspti, ka arhinhanksï erokorhe je sánderu, engaksï jamberi máteru erachi jántsïpiricha uándikunhaaka, ima engajtuksï Diósïni marhuakuni jámani májkueni uarhiaka.

¹²Ka Karichini exespka, enga kuímu úni jámani selluni p'ikuparhakupka, ka k'éri ma jenchespti; ka tata jurhiata iámu ónharhikuspti ka takusï turhipitini jáxentaspti, ka nana kutsï iurhirini charhacharhaxentaspti.

¹³Ka jóskuechaksï auandarhu uératini uekorhespti echerindu andatserani, ísï eska jígusï tsírku na uekorhejka enga akuitse jánikua uauarhutajka.

¹⁴Ka auanda sïrandeni p'arhakurhintatini nónespti, ka iámendu juátechaksï ka ómekuechaksï móskunhaspti.

¹⁵Ka parhakpeni anapu irechecha, ka k'érati achamasïcha, ka p'urhejkuti urhejtsïkuricha, ka jatsikorhericha, ka uinhapekua jatsiricha, ka iámendu jántspiricha ka no játspirichajtuksï porhotecharhu ka k'érendecharhu juátarhu ísïksï jirikorhespi.

¹⁶Ka juátechani ka k'erendechani arhiasïremptiksï, “Jatachakujtsïni ka jískajtsïni, eskajtsïni imeri ikiata enga k'éri uaxantskuarhu uaxakatini jaka o Karichiri ikiata no andanguaka.

¹⁷Jimboka niaraskia k'éri jurhiata imeri ikimperateri, ¿Ka ne ua xáni tekantani?”